RORELTUHAI 5 - Pathien Lekhabu Inthieng (BSI)

Debora le Barak hla

¹ Chuongchun, Debora le Abinoam naupa Barak chun chu ni chun hla an sak a:

² “Hotuhai chun Israel lai hin hma an ṭhuoi a, Mipuihai chu inhâwktakin an hung inpe ta hi; Lalpa chu inpâk ro.

³ Aw, nangni lalhai, lo ngai ta u, Aw, nangni rorêltuhai, na lo sit ta u, Keima ngeiin Lalpa chawimawiin hla sak ka ta, Lalpa Israelhai Pathien inpâkin hla sak ka tih.

⁴ Lalpa, Seir rama inthawka i hung suok a, Edom phaia inthawka i hung suok khan, Hnuoi chu ân thin dur dur a, vânhai khawm a hung far a; Anih, sûmhai chun ruo an insûrtir a.

⁵ Tlânghai chu Lalpa hmaah an hung chim a, Sinai tlâng chen khawm saw Lalpa Israelhai Pathien hmaa chun.

⁶ Anath naupa Samgar nihaia le, Jael nihaia chun, tlâng lamhai chu a ṭhing ṭhup a; Inzin invâkhai chu lam inthlep kuolhaiah an fe hlak a.

⁷ Israel ram khuohai chu hluo lovin a ram zo a, a ram zo a, Kei Debora ka châng a, Israel ram nu ka châng hmakhat khan chu.

⁸ Pathien tharhai an chel a, Daikawtkhâr bulhaia khan indona a hung um a, Israel rama mi sîng li zet laia khan Phaw le fei kha um hrim a um am a nih?

⁹ Ka lungril chu Israelhai hotuhai,rorêltuhai, Mipuihai laia inhâwktaka inpetuhai lai chun a um a; Lalpa chu inpâk ro.

¹⁰ Nangni sabengtung vâr chunga chuonghai, Nangni puondâp sataka ṭhunghai, Nangni lampuia inlawnhai,chuong thu chu puong ro.

¹¹ Tuichawina hmunhaia thil rimawi rihai, hlasakmihai ri chun, Lalpa thil fel thawhai chu an hril an hril a, Israel mihai hnena ngei chu, Chun, Lalpa mipuihai chu dâikawtkhâr tieng chun an fe thla a,

¹² Har la, har la, Debora, Har la, har la, hla sak rawh; Tho la, Barak, i manhai chu salah ṭhuoi rawh, Aw nang Abinoam naupa.

¹³ Chun, mi lien la um sunhai le mipui chu an hung thla a, Mi thawpui dingin Lalpa mipui chu mi hrâttak leh an hung thla a,

¹⁴ Amalek zungzâmhai chu Ephraima inthawkin an hung thla a, Benjamin, i mihai laia miin an hung zui che, Makira inthawkin ram rorêltuhai an hung thla a, Zebuluna inthawk chun hotu lien hmawl chawihai an hung thla a,

¹⁵ Issakar mi lienhai chu Debora kuomah an ṭhang a, Issakar chu Barak ta dingin a ringum a, Ruom tieng chun a kaiza vêngtu ama leh an tlân thla a, Reuben mihai laia ruok chun inṭhena ro a um a, Fe ve thu an sukthlûk thei naw a.

¹⁶ Iengdinga berâm huon kârhaia i ṭhung zing am, Berâm ruol kona theihle ngai el dingin? Reuben mihai laia ruok chun inṭhena a um a, Fe ve thu an sukthlûk thei nawh.

¹⁷ Gilead mihai chu Jordan râlah an um zing a, Dan mihai chu iengdinga lawnghaia an um zing am? Aser mihai chu tuisuoriet pangah an ṭhung ṭawk ṭawk a, An likilkawihaia chun an um zing a.

¹⁸ Zebulun mihai le Naphtali mihai hi Phûl hmun insânghaia thi huom zing zing mi an nih.

¹⁹ Lalhai chu an hung a, an do a, Chuongchun, Kanaan lalhai chun Megiddo tui kâwl Ta-anaka chun an do a; Râllâk sum hrim an lâk nawh.

²⁰ Vâna inthawkin arasihaiin an hung do a, An hmuna inthawkin Sisera chu an hung do a.

²¹ Kison vadung chun anni a hnâwl hmang vawng a, Tienlai vadung, Kison vadung chun. Aw ka thlarau, hrâttakin fe pei rawh!

²² Chun, sakawrhai chun an ke an tet tlut tlut a, An ke tinhaia hnuoia inchâwm inchâwmin.

²³ Lalpa vântirkoin, ‘Meroz chu ṭawngsie inphur ro, Chutaka umhai chu nasatakin ṭawngsie inphur ro. Lalpa ṭhangpui dinga an hung naw leiin, Lalpain mi hrâttak a thawnaa ṭhangpui ding chun,’ a tih.

²⁴ Nuhmei lai poa chun Jael Ken mi Heber nuhmei hi hamṭha nîng a tih.

²⁵ Ama chun tui a hung hni a,nênetui a lo pêk a; Miṭha noin nênetui inkhal a pêk a.

²⁶ Kilna a chawi a, A changtiengin sinthaw mi hembâwk; Hembâwk chun Sisera chu a hem a,a luah a hem tlang a, A bek takah a hem a,a hem bûr ta ngur a.

²⁷ A ke bula chun a awp rawk a,a tlu a, a bawk ta dêr a, A ke bulah a awp rawk a, a tlu ta a; A awp rawkna hmuna chun a thi ta dêr a.

²⁸ Sisera nu chu tukverah a hung dâk a, Zâwngdaikal âwnga chun a ko a; ‘Iengtiziea tawlailîr chu hung tlung intak am a ni a? Iengdinga tawlailîr kehai chu muong vieu am a ni a?’ a ti a.

²⁹ A nuhmei vartakhaiin an lo dawn a, Anih, ama le ama ân dawn fâwm nâwk a,

³⁰ ‘Râllâk thilhai chu an hmuin an insem ni lo am a nih? Mi tinin nunghâk pakhat pahni amani seng. Sisera chan ding chu râllâk puon ze tum tum, Hnêtu rînga bât ding puon a khing hnia ṭiel mawi, ze tum tumhai chu?’ tiin.

³¹ Chuong ang chun aw Lalpa, i hmêlmahai po po chu bohmang vawng hai sien, Nangma hmangaituhai ruok chu hrâttaka fe nisa ang hi ni raw hai se,” tiin. Chun, ram chu kum sâwmli sûng râlmuongin a um a.