RORELTUHAI 4 - Pathien Lekhabu Inthieng (BSI)

Debora le Barakin Sisera an hne

¹ Ehud thi hnung chun Israel thlahai chun Lalpa mithmuhah thil suol an lo thaw nâwk ta a.

² Chuongchun, Hazor khaw ṭhuttu Kanaan ram lal Jabin kuoma chun Lalpain anni chu a zawr ta a, chu mipa sipai hotu tak chu Sisera a ni a, Jentailhai ram Haroseth-a um a nih.

³ Israel thlahai chun Lalpa an ko a, Jabin chun thîr tawlailîr za kuo zet a nei si a; kum sâwmhni sûng zet Israel thlahai chu nasatakin a nêksâwr a.

⁴ Chun, zâwlneinu Debora, Lapidoth nuhmei chun chuong lai chun Israelhai ro a rêl a.

⁵ Chu minu chu Ephraim tlâng rama Rama le Bethel khuo inkâra Deboraa tûm thing hnuoia um hlak a nih; chun, Israel thlahai chu a kuomah an ro inrêltir dingin an fe hlak a.

⁶ Naphtali ram Kedesa inthawkin Abinoam naupa Barak chu ân cha a, a kuomah, “Lalpa Israelhai Pathienin, ‘Naphtali thlahai le Jebulun thlahai mi sîng khat ṭhuoi la, Tabor tlângah hang fe rawh.

⁷ Chun, Kison vadungah Jabin sipai hotu Sisera chu a tawlailîrhai le a rawihai leh hung tir ka ta; chun, ama chu pêng ka ti che,’ tiin thu a pêk che ni lo am a nih?” a ti a.

⁸ Barak chun a kuomah, “Mi fepui ve la, chuongchun, fêng ka tih, i mi fepui naw ding ruok chun fe naw ningah,” a ti a.

⁹ Chun, ama chun, “Fepui ngei ka ti che, amiruokchu, i fenaa chun hmingṭhat i hlaw naw ding a ni chu; Lalpain Sisera chu nuhmei kuomah a zawr ding a nih,” a ti a.Chun, Debora chu a tho a, Barak kuomah Kedes khuo tieng chun a fe ve ta a.

¹⁰ Barak chun Zebulunhai le Naphtalihai chu Kedesa chun ân cha khâwm a, mi sîng khat ama leh an hang fe a; chun Debora khawm ama leh a hang fe ve a.

¹¹ Chun, Ken mi Heber chu Ken mi Mosie tarpupa Hobab thlahai laia inthawkin a tumin a lo um a, Kedes kâwla Zaananim rama thingsaisuo hmun kâwlah a puon in a va zar a.

¹² Chun, Abinoam naupa Barak chu Tabor tlângah a hang fe ti Sisera chu an hril a.

¹³ Chuongchun, Sisera chun a tawlailîrhai po po, thîr tawlailîr za kuo le a rawihai Jentailhai ram Harosetha inthawk Kison vadung chena umhai chu a ko khâwm ta a.

¹⁴ Chun, Deborain Barak kuomah, “Khai le, vawisûn hi Lalpain Sisera chu a pêk ni che a nih, i hmaṭhuoitu chu Lalpa a ni naw am a nih?” a ti a. Chuongchun, Barak chu Tabor tlânga inthawk chun ama zuitu mi sîng khat leh a fe thla a.

¹⁵ Chun, Lalpain Sisera le a tawlailîrhai po po le a sipaihai po po chu Barak hmaa chun kâwlhnâmin a sukbuoi tâwl ta a; Sisera chu a tawlailîra inthawk chun a ṭum a, kein a tlân hmang ta dai a.

¹⁶ Barak chun tawlailîrhai le sipaihai chu Jentailhai ram Haroseth chenin a hnawt a; chuongchun, Sisera sipaihai po po chu kâwlhnâmin an that vawng a, pakhat khawm dam an um nawh.

¹⁷ Sisera ruok chu Ken mi Heber nuhmei Jael puon inah kein a tlân lût a; Hazor lal Jabin le Ken mi Heber sûnghai chu inrem zing an ni a.

¹⁸ Chun, Jael chu Sisera tuok dingin a hung suok a, a kuomah, “Ka lalpa, hung lût rawh, ka kuomah hung lût la, ṭi naw rawh,” a ti a. Chuongchun, puon in sûngah chu minu kuoma chun a lût ta a, ama chun puonin a lo inkhum a.

¹⁹ Sisera chun, “Ka hni che hi, tui tlâwmte dâwn ding mi hung pe ta, ka dang a châr êm el,” a ti a. Amanu chun nênetui bâwm a hang hawng a, ân dâwntir a, ama chu ân khum nâwk ta a.

²⁰ Sisera chun, “Puon in kawtkhâra khan ngîr la, chun, ‘Hitaka hin mi an um am?’ tia an hung indawn che chun, ‘An um nawh,’ lo ti pei rawh,” a ti a.

²¹ Nisienkhawm, Heber nuhmei Jael chun puon in kilna zum a lâk a, hembâwk chu a kutin a chawi a, to ṭawkin a pan phei a, a chau leia imu inhniktaka a zâl laiin kilna zum chun a bek takah a hem a, a hem tlang a, hnuoiah ân bûr ta ngur el a; chuongchun, a thi ta a.

²² Chun, Barakin Sisera a hung hnawt chun Jael chu ama lo tuokin a va suok a, a kuomah, “La hung ta khai, i mi zawng chu lo inentir ka ti che,” a ti a. Chu nu puon ina chun a va lût a, Sisera a bekah puon in kilna zum inbûr ngura thisaa zâl chu a hmu a.

²³ Chuongchun, Pathienin chu ni chun Israel thlahai hmaah Kanaan ram lal Jabin chu a suktlâwm ta a.

²⁴ Chun, Israel thlahai kut chu Jabin chunga chun a hung hrât ta deu deu a. Kanaan lal Jabin chu an suksiet dêr el ta a.