RORELTUHAI 3 - Pathien Lekhabu Inthieng (BSI)

Israel fietu dinga tira um hnamhai

¹ Hieng hnamhai hi an nih Lalpain Israelhai Kanaan rama râl la thaw ngai hlek lohai fiena dinga a inumtirhai chu:

² chuong Israel thlahai suon, kha hmaa iengkhawm la hre ngai dêr lohai chun an hung hrietna ding le râl thaw dân inchûktira um dinga inumtir an nih.

³ Chuong hnamhai chu: Philistinhai lal pangahai,le Kanaan mi po po, Zidon mihai,le Hiv mihai, Baal-hermon tlânga inthawka Hamath khuo lûtna chena Lebanon tlânga Hiv mihai an nih.

⁴ Chuonghai chu Lalpain Mosie hmanga an thlatuhai thu a lo pêkhai kha an zâwm ding le ding naw hrietna dinga Israelhai fiena ding chu an nih.

⁵ Chuongchun, Israel thlahai chu Kanaan mihai, Hit mihai, Amor mihai, Periz mihai, Hiv mihai, Jebus mihai lai chun an um a;

⁶ an naunuhmeihai chu nuhmeiin an nei a, chun an naunuhmeihai chu anni naupasalhai an inneitir thung a, an pathienhai rawng chu an bâwl ta a.

Othnielin Israel a sansuok

⁷ Chun, Israel thlahai chun Lalpa mithmuah thil suol an lo thaw a, Lalpa an Pathien chu an theinghil a, Baalhai le Aserah rawng an bâwl a.

⁸ Chuongchun, Lalpa chu Israelhai chunga chun a lunginsen ta a, Mesopotamia ram lal Kushan-risathaim thu hnuoia chun kum riet an um a.

⁹ Chun, Israel thlahai chun Lalpa chu an ko phingleh Lalpa chun Israel thlahai chu sansuoktu a hung siempêk a, ama chun a hung sansuok ta a, chu chu Kaleb sang Kenaz naupa Othniel a nih.

¹⁰ Lalpa thlarau chu a chungah a hung a, chuongchun, Israelhai ro chu a rêlpêk ta a; râl do dingin a vân thawk a; chun Lalpain Mesopotamia ram lal Kushan-risathaim chu a pêk a; Kusan-risathaim chu a hne a.

¹¹ Chun, ram chu kum sâwmli râlmuongin a um a. Chun Kenaz naupa Othniel chu a thi ta a.

Ehudin Moaba inthawk Israel a sansuok

¹² Chun, Israel thlahai chun Lalpa mithmuah thil suol an thaw nâwk ta a; chuongchun, Lalpa mithmuah thil an lo suksuol lei chun Lalpain Moab lal Eglon chu Israelhai chunga hrâtin a siem a.

¹³ Ama chun Ammon mihai le Amalek mihai ân pun a, chuongchun, Israelhai chu a va thaw a; tûm khawpui chu a nei ta a.

¹⁴ Chuongchun, Israel thlahai chu Moab lal Eglon hnuoia chun kum sâwmpariet an um a.

¹⁵ Nisienlakhawm, Israel thlahai chun Lalpa an ko phingleh Lalpa chun Gera naupa Ehud, Benjamin mi, mi vawikawlawng, sansuoktu a hung siempêk a. Israel thlahai chun Moab lal Eglon pêk ding chu siechawi an inchawitir a.

¹⁶ Ehud chun kâwlhnâm ngeituo tawng chena seiin a sut a; chu chu a êlpui changtieng puon hnuoiah a taivawn a.

¹⁷ Moab lal Eglon chu siechawi chu a hang pêk a. Eglon chu mi thâutak a nih.

¹⁸ Siechawi chu a hang pêk zo chun siechawi chawituhai chu ân fetir nâwk ta a.

¹⁹ Ama ruok chu Gilgal kâwla lung sutna hmuna inthawkin a kîr nâwk a, “I aw lalpa, thurûk hril ding che ka nei,” a ti a. Lal chun, “To ṭhiep ro khai,” a ti a; chuongchun, a bula ngîrhai po chun an suoksan ta vawng a.

²⁰ Chun, Ehud chu a kuomah a va fe a; ama chu a thlan sukdeina pindana chun a khât chauin a lo ṭhung a. Ehud chun, “Pathienin i kuoma hril ding thu a mîn cha a nih,” a ti a. Lal chu a ṭhungphaa inthawk chun a tho a.

²¹ Ehud chun a vawitiengin a êlpui changtienga kâwlhnâm chu a phawi a, a phîngah a chiu ta pawp el a;

²² a ha khawm chu a lût tlum hiel a, chun, a kâwlhnâm chu a thâuin a chîpnel ta tlat a, a phînga kâwlhnâm chu a phawi si naw a, a hnungtieng chen a tlang hiel a.

²³ Chuongchun, Ehud chu tuolpûk chung awnga chun a suok a, pindan chung kawtkhârhai chu a khâr a, a kal tâwl ta a.

²⁴ Chun, chuonga a suok hnung chun a siehlawhai chu an hung a, sâwng chung kawtkhârhai chu lo inkal tlatin an hmu a, “A thlan sukdeina pindanah a va châwl dam hri a ni ngei âwm hi,” an ti a.

²⁵ Hrilhai rak chenin an nghâk el ta a; nisienlakhawm, pindan kawtkhârhai chu a hawng ta dêr da el a; chuongchun, chabi an lâk a, an hawng a, an lalpa chu ṭuonga chun thisaa lo zâl dêrin an hmu ta el a.

²⁶ Ehud hlak kha khânga an nghâk sûng khan a lo tlân hmang ta a, lung sutna hmun kha a khêl a, Seiraah a tlân ta a.

²⁷ Chu hmun chu a va tlung chun, Ephraim tlâng rama chun tawtawrâwt a mût a; chun, Israel thlahai chu tlâng rama inthawk chun a kuomah an zuk fe a, ama chun an hma chu a ṭhuoi ta a.

²⁸ Chun, ama chun, “Mi zui ro khai, Lalpain in hmêlma Moab mihai hi a pêk ta cheu a nih,” a ti a. Chuongchun, an zui thlâk a, Moab ram dep Jordan vadung kaihai chu an lâk a, tukhawm an inkaitir phal ta naw a.

²⁹ Chu ṭum chun Moab mi sîng khat lai, mi âwmkhau ṭhieu le mi hrât ṭhieu an that a, pakhat khawm a tlân suok an um nawh.

³⁰ Chuongchun, chu ni chun Moab mihai chu Israelhai hmaa chun an tlâwm ta a. Chun, ram chu kum sawmriet sûng râlmuongin a um a.

Samgarin Philistinhaia inthawk a sansuok

³¹ Chun, ama hnunga chun Anath naupa Samgar a hung inlang ve a, ama chun Philistin mi, mi za ruk sebâwng sunna hmawlin a sun hlum a; ama bawk chun Israelhai chu a sansuok a nih.