RORELTUHAI 21 - Pathien Lekhabu Inthieng (BSI)

Benjaminhai nuhmei ding

¹ Chun, Israel thlahai chun Mizpaa chun, “Eini laia mi tukhawm ei naunuhmeihai hi Benjamin mihai nuhmeiah inneitir dêr nâwng ei tiu,” tiin ṭawng an inkhâm a.

² Chun, mipui chu Bethelah an fe a, Pathien hmaa chun zântieng chenin an ṭhung a, an râwlhai insuoin an ṭap rak rak a.

³ Anni chun, “Aw Lalpa, Israelhai Pathien, iengtiziea Israel thlahai lai hin hieng thil hi hung uma, vawisûn hin Israelhai hi hnam pakhata kim ta lo am an ni a?” an ti a.

⁴ Chun, a zînga chun mipui chu inhmatakin an tho a, chutaka chun maichâm an siem a, pumrawhmang thilinhlânhai le inremna thilinhlânhai an inhlân a.

⁵ Chun, Israel thlahai chun, “Israel pahnam po po laia Lalpa kuoma pungkhâwmhai laia hang ṭhang ve naw chu tuhai am an ni a?” an ti a. Mizpaa Lalpa hmaa hang fe naw taphawt chu, “Sukhlum ngei ding nîng a tih,” tiin ṭawng an lo inkhâm ta tlat si a.

⁶ Chun, Israel thlahai chun an unau Benjamin mihai chu an lainat hle el ta a, “Vawisûn ni hin Israel thlahai laia hnam khat chu sâtthlâk an lo ni ta si a.

⁷ A la um sunhai ta ding chun an nuhmei ding iengtin am ei thaw ding nîng a ta le? Ei naunuhmeihai hi nuhmeia inneitir dêr lo dingin Lalpa hming sâlin ṭawng ei lo inkhâm ta si a,” an ti a.

⁸ Chun, anni chun, “Israel pahnam laia mi a tu hnam tak am a na Mizpaa Lalpa hmaa hang inlang ve naw hi?” an ti a. Chun, pungkhâwmhai umnaa chun Jabes-gilead mi chu pakhat khawm an hung ve nawh ti an hmu ta a.

⁹ Mipui chu an hang intiem chun Jabes-gilead rama umhai chu pakhat bêk khawm an lo um ve nawh ti an hmu ta a.

¹⁰ Chun, inkhâwmhai chun mi huoisen ṭha ṭhieu sîng khat le sâng hni an tir a, thu an pêk a: “Fe unla, Jabes-gilead rama umhai chu nuhmei le naupanghai khawm va sât hlum vawng ro.

¹¹ In thaw dân ding chu hieng ang hi a nih, pasal tin le nuhmei tin, pasal zâlpui taphawt chu in sukhlum vawng ding a nih,” tiin.

¹² Chun, Jabes-gilead rama umhai lai chun nunghâk za li, pasal la pâwl ngai hleklo an hmu a, chuonghai chu Kanaan rama an inkulna Siloa chun an hung ṭhuoi a.

¹³ Chun, inkhâwmhai po po chun mi an tir a, Rimmon lungpuia um Benjamin mihai an va biek a, an kuomah inremna thu an puong a.

¹⁴ Chu phingle chun Benjamin mihai chu an kîr ta a; chun, Jabesgilead rama nuhmeihai an ihlahai chu an pêk a, chuong sa khawm chun an lân dai ta naw a.

¹⁵ Chun, Israel hnamhai laiah Lalpain insuktumna a lo siem tâk leiin mipuihai chun Benjamin mihai chu an lainat ta hle a.

¹⁶ Chuongchun, inkhâwmhai upahai chun, “A la damhai nuhmei ding hi iengtin am ei thaw ding chu? Benjamin mihai laia an nuhmeihai chu sukbohmang an lo ni ta si a,” an ti a.

¹⁷ Anni chun, “Israel hnam hi sukhmanga a um nawna dingin Benjamin mi la um sunhai hin an ta dinga rohluotu an nei ngei ding a nih.

¹⁸ Ei naunuhmeihai hlak nuhmeiah ei inneitir thei si naw a, Israel thlahai chun, ‘Tukhawm Benjamin mi nuhmei ding pe taphawt chu ṭawngsephurin um raw se,’ tiin ṭawng ei lo inkhâm ta si a.

¹⁹ Nisienlakhawm, ngai ta u, Bethel hmar tieng, Bethela inthawka Sekem fena lamlien saktieng panga Lebanon sim tienga um Siloah kum tin Lalpa ta dinga ruoiṭhe a um hlak kha,” an ti a.

²⁰ Chuongchun, anni chun Benjamin mihai kuoma chun, “Fe unla, grêp huonah vân bi unla,

²¹ lo thlîr zing unla, Siloa nunghâkhai rawi lâmnaa lâm dinga an hung suok pha, grêp huona inthawk chun hung suok unla, Silo nunghâkhai chu mâni nuhmei ding seng man unla, Benjamin mihai ramah fe vawng el ro.

²² Chun, an pahai amanih an ṭahai amanih, sawisêl dinga kan kuoma an hung leh, an kuomah, ‘Mi lunginsiet ro khai, indonaa khan an nuhmei ding kan lo manpêk seng ta si naw a; nangni hlaka in lo pêk naw bawk si a, lo pe ni unla thiemnaw in hlaw ding a ni bawk si a,’ lo tîng kan tih,” tiin thu an pêk ta a.

²³ Chun, Benjamin mihai chun chuong ang chun an thaw a, a lâmhai laia mi chu anni zât seng nuhmeiah an man a, an fe hmangpui ta a; chun, an ram tieng chun an fe a, khawpuihai chu an chei nâwk a, chutaka chun an um ta a.

²⁴ Chu phingleh chutaka inthawk chun Israel thlahai chu mâni chi chi le mâni hnam hnamin an inhlawm hran nâwk a, chutaka inthawk chun mâni ram sengah an fe nâwk ta a.

²⁵ Chuong lai chun Israelhai lai lal hrim an um naw a, mi tinin mâni ṭha ti zâwng sengin an thaw el a nih.