RORELTUHAI 2 - Pathien Lekhabu Inthieng (BSI)

Bokima Lalpa vântirko chu

¹ Chun, Lalpa vântirko Gilgala inthawkin Bokimah a hang fe a. Ama chun, “Aigupta rama inthawk khan kân suoktir cheu a, in thlatuhai kuoma inkhâma ka ilo tiem tah rama khan ka ṭhuoi lût cheu a; ‘In kuoma thu ka ithlung kha bawse naw tawp ka tih;

² chun hi rama umhai le hin thu thlung naw unla, an maichâmhai chu sukchimpêk ro’, ka ti kha. Nisienlakhawm, ka râwl chu ngai lova, iengdinga hienga hi thaw am in ni a?

³ Chuleiin, tuhin, ka hril cheu hi, Anni chu hnawt suokpêk ta naw ning cheu a, in nâkphêkhaia chun hling ang hung ni tâng an ta; an pathienhai chu in ta dingin châng nîng an tih,” a ti a.

⁴ Lalpa vântirkoin Israel thlahai po po kuoma chuong thu chu a hang hril chun, mipui chu râwl insuo meuin an ṭap tâwl ta a.

⁵ Chu hmun hminga chun Bokim an inbûk a, chutaka chun Lalpa kuomah an inthâwi ta a.

Josua thi thu

⁶ Josuain mipui ân ṭîntir hnung chun Israel thlahai chu mi tin mâni chanpuol seng ram chu hluo dingin an fe ta a.

⁷ Josua dam sûng le Josua damkhêltu upahai, Lalpain Israelhai ta dinga thil ropuitak a thawhai po po hmu hlaktuhai dam sûng chun mipui chun Lalpa rawng an bâwl hlak a.

⁸ Chun, Nun naupa Josua Lalpa siehlaw chu kum za le sâwm miin a thi a.

⁹ Gaash tlâng hmârtieng pang Ephraim tlâng rama ama chanpuol ramri sûng Timnath-heresa chun an phûm ta a.

¹⁰ Chu ṭhanga mihai po po khawm chu an thlatuhai kuomah an fe zo tâwl ta a, chun chuong mihai hnunga chun Lalpa le Israelhai ta dinga a thilthawhai khawm hre lo suon dang an hung um ta a.

Israel Pathien nghatsanna le Rorêltuhai rorêlna

¹¹ Chun, Israel thlahai chun Lalpa mithmuhah thil suol chu an lo thaw a, Baalhai rawng an bâwl ta a.

¹² Lalpa an thlatuhai Pathien, Aigupta rama inthawka anni ṭhuoi suoktu kha an nghatsan a, pathien dang, an kâwl vêla umhai pathienhai laia mi chu an zui a, chibai an bûk a; chuongchun, Lalpa chu an suklungsen ta a.

¹³ Lalpa chu an nghatsan a, Baal le Astaroth rawng an bâwl ta a.

¹⁴ Chuongchun, Lalpa chu Israelhai chungah a lunginsen ta a; anni rawk hlaktuhai kuta chun a pêk tâwl ta a; an hmêlma an kâwl vêla umhai kuoma chun a zawr a: chuongchun, an hmêlmahai chu an dang zo ta naw a.

¹⁵ An fena tieng tiengah Lalpa kut chu a se tiengin an chungah a tla pei a, Lalpain a lo hril ta ang le Lalpain an kuoma inkhâma a lo hril ta ang khan; chuleiin, duoiin an lunginzing ta naw a.

¹⁶ Chun, Lalpain rorêltuhai a siempêk a, chuonghai chun anni rawk hlaktuhai kuta inthawk chun an sansuok ta a.

¹⁷ Chuong sa khawm chun an rorêltuhai râwl chu an ngai naw a, pathien danghai kuomah an uire a, chibai an bûk ta lem a; an thlatuhaiin Lalpa thupek chu awia an hraw hlak lampui chu an lo pêtsan ta a.

¹⁸ Lalpain rorêltuhai a siempêk pha chun Lalpa chu rorêltu kuoma chun a um a, rorêltu dam sûng chun an hmêlmahai kuta inthawk chun a sansuok pei a; anni sukrimsitu le nêksâwrtuhai leia an inrûm chun Lalpa chun za a ngai nâwk hlak a.

¹⁹ Nisienlakhawm, rorêltu chu a thi phingleh an hnungtawl nâwkin, pathien danghai rawng bâwla chibai bûk dinga zui thuah an thlatuhai nêkin an thaw ṭha naw nâwkzuol a, an thil thaw hlakhai le an lûlulna khawm an bân chuong naw a.

²⁰ Chun, Lalpa chu Israelhai chunga chun a lunginsen ta a; chuongchun, “Hi hnamhai hin an thlatuhai thu ka ipêk, ka thuthlung chu an bawsiet a, ka râwl khawm an ngai ta si naw a;

²¹ chuleiin, kei khawma tuta chin chu Josua thi hmaa hnawt suok bâk hnamhai hi hnawt suokpêk ta naw ning ah:

²² an thlatuhai ihraw ang khan Lalpa dân an hraw ding le ding naw Israelhai fiena dingin anni chu hmang ka tih,” a ti ta a.

²³ Chuongchun, Lalpa chun chuong hnamhai chu hnawt suok nghâl lovin ân umtir ta a; Josua kuta khawm a pêk ta chuong bawk naw a.