RORELTUHAI 19 - Pathien Lekhabu Inthieng (BSI)

Levi mi le a thaikêm chanchin

¹ Chuong laia Israel rama lal um naw lai chun Levi chi, mi pakhat hi Ephraim tlâng ram tâwp tieng chun a um a; Juda rama Bethlehema mi thaikêmin a nei a.

² A thaikêm chun a uiretsan a, chuongchun, Juda ram Bethlehemah a pa kuomah a tlânsan a, chutaka chun thla li zet a um a.

³ Chun, a pasal chu a tho a, a siehlaw le sabengtung pahni ṭhuoiin va thlêma lungâwitaka ṭhuoi kîr nâwk tumin a va hnawt a. Ama chun a pa ina chun a lo ṭhuoi lût a. Nunghâk pa chun ama a lo hmuin a lo lâwm hle el a.

⁴ Chun, a tarpupa, nunghâk pa chun a kuoma um dingin a lo thlo a, a kuoma chun ni thum a um a, an fâkin an dâwn tlâng a, chutaka chun a riek a.

⁵ A ni li ni chun zingkâr inhmatakin an tho a, ama chu fe dingin an singsa a; nisienlakhawm, nunghâk pa chun a mâkpa kuoma chun, “Bei tlâwmte bêk fain i lungril insukhar phawt ta la, chu hnunga chun i la fe ding an nawm,” a ti a.

⁶ Chuongchun, a ṭhung a, an pahni chun an fâkin an dâwn tlâng a; chun, nunghâk pa chun mi kuoma chun, “Lungawitakin riek hrâm raw khai, i lungril chu hlimtakin um raw se,” a ti a.

⁷ Mi chu fe tuma a hang tho chun, a tarpupa chun a thlêm a, chuongchun, a riek nâwk ta a.

⁸ A ni nga ni zîngkâr chun fe tumin inhmatakin a tho a, chun nunghâk pa chun, “I lungril sukhar hri phawt la tie, zântieng nisa innêm hun chen bêk chu um hri raw khai,” a ti a. Chun, an pahniin bu an fâk nâwk ta a.

⁹ Chun, mi chu a thaikêm le a siehlaw leh suok tuma an hang tho chun, a tarpupa, nunghâk pa chun a kuomah, “En ta, hi khuo khawm ân hnu ta a, vawizân chu riek nâwk hrâm el raw khai. En ta, khuo khawm ân thim hnai el ta hi, hitaka hin riek nâwk la, i lungril khawm hlimtakin um raw se; chun, zingah zîngkâr tho i ta, fe de ti nih,” a ti a.

¹⁰ Nisienlakhawm, ama chun chu zân chun riek a nuom ta naw a, a tho a, a suok ta a, Jebus khaw zâwn a va tlung a (chu chu Jerusalem khuo a nih), sabengtung pahni inthuom sa a ṭhuoi a, a thaikêm khawm chu a ṭhang ve a.

¹¹ Jebus khaw kâwl an tlung chun khuo an hnu hle ta a; chun, siehlaw chun a pu kuomah, “Hung rawh, hi Jebus mihai khawpuia hin lût ei tiu a, riek el ei tiu khai,” a ti a.

¹² A pu chun a kuomah, “Israel thlahai ni si lo hnam khuoa chun lût lo e a, Gibea khuo tieng pan pei lem ei tiu,” a ti a.

¹³ Chun, a siehlaw kuomah, “Hung rawh, hieng khuo laia pakhat hi pan ei tih. Gibea khuoa manih Rama khuoa manih ei riek ding annawm,” a ti a.

¹⁴ Chuongchun, a fe nâwk ta pei a, Benjamin mihai Gibea khaw kâwl an tlung chun nisa a tla ta a.

¹⁵ Chun, Gibea khuoa riek ding chun an lût ta a; a lût a, chu khawpui khawlaidunga chun a ṭhung a, tukhawm ama intlungtir an um si naw a.

¹⁶ Chun, ngai ta, tar pakhat hi zântieng chun a lo fe a hung a, ama chu Ephraim tlâng rama mi a nih. Gibeaa chun a va um vak a nih, chutaka mihai ruok chu Benjamin mihai an nih.

¹⁷ Chun, a hang ngha a, khawlaia mikhuolpa chu a hang hmu chun, tarpa chun, “Khâwlaia fe ding am i ni a? Khâwtaka inthawka hung am i ni a?” a ti a.

¹⁸ Ama chun, a kuomah, “Juda ram Bethlehema inthawk Ephraim tlâng ram tâwp tienga fe tum ka nih; chutaka um chu ka ni a, Juda ram Bethlehemah ka va fe a, tuhin Lalpa inah fe ka tum a nih; tukhawm a mîn tlungtir an um nawa a nih.

¹⁹ Ka sabengtung ta ding lem chun bupâwl le ran bu khawm kan nei a; chun, kei le i suoknu le i siehlawhai kuoma um ve tlangvâl ta ding khawm hin bei le uoin a um bawk a, iengkhawm tlâksam chu kan nei dêr nawh,” a ti a.

²⁰ Chun, tarpa chun, “Thlamuongtakin um raw khai, i mamaw po po chu keiin tum vawng ka tih, khawlaia chun chu riek lul naw rawh,” a ti a.

²¹ Chuongchun, a inah a ṭhuoi lût a, sabengtunghai chu bu a pêk a; chun, an kehai dâm an sâwp a, an fâkin an dâwn ta a.

²² Chuong anga hlim le lâwmtaka an um lai chun, ngai ta, chu khuoa mi Belial naupasal ṭhenkhathai chun in chu an hung inhuol ta a, kawtkhâr chu an hung suk dawt dawt a, in neitupa, tarpa kuoma chun, “I ina hung tlungpa kha hung ṭhuoi suok rawh, lo pâwl kan tih,” an ti a.

²³ Chun, in neitupa chu a va suok a, an kuoma chun, “Ni lo e, ka unauhai, chuong ang êma suol chu thaw lul naw ro khai, ama hi ka mikhuol a ni hi, hieng anga thil invêtthlâktak hi chu thaw lo e a.

²⁴ En ta u, hitaka hin ka naunu nunghâk le a thaikêm an um a, anni chu hung ṭhuoi suok ka ta, anni chu intlâwm unla, ṭha in ti ang phawtin an chungah thaw de ti niu, ama chunga ruok hin chu chuong ang thil invêtthlâk chu thaw naw ro,” a ti a.

²⁵ Amiruokchu, chuonghai chun a thu an pawm nuom naw a; chuongchun, mi chun a thaikêm chu a man a, an kuoma chun a va ṭhuoi suok ta a; chun, anni chun an lo pâwl a, khawvar hmakhat chun zânkhawvârin an lo sawisa hrep a; khuo a hung var phingle chun an insuo ta a.

²⁶ Khuo a hung var phingle chun nuhmei chu a fe a, a hotupa tlunginpa kawtkhâr bula chun a tlu dêr a, khawvar hnung chenin a um ta zing a.

²⁷ Chun, a hotupa chu zîngkâr chun a hung tho a, kawtkhârhai chu a hei hawng a, fe tumin a va suok chun, a thaikêm chu a kuthai kaiṭên chunga inbânga lo tlu dêr el chu a hmu a.

²⁸ Ama chun, “Tho rawh, fêng ei tih,” a hang ti a; nisienlakhawm, a dawn ta dêr naw a. Chuongchun, sabengtung chunga chun a siekai a; a tho a, a in tieng chun a fe ta a.

²⁹ Chun, a in a va tlung chun chemtê a lâk a, a thaikêm chu a ru pumin hmun sâwm le hmun hniah a channawi a, Israel ram po poah a thawn dar a.

³⁰ A lo hmu taphawt chun, “Israel thlahai Aigupta rama inthawka an hung suok chinah hieng ang thil hrim hrim hi a la um ngai naw a, hmu khawm a ni ngai dêr nawh; ngaituo unla, inrâwn unla, hril ta u,” an ti a.