RORELTUHAI 15 - Pathien Lekhabu Inthieng (BSI)

¹ Chu hnung sâwt rak loa chun, bu sîk hun lai hin, Samson chun kêlte chawiin a nuhmei chu a va kan a, “Pindan sûnga sawn ka nuhmei kuomah ka va lût ding a nih,” a ti a. Nisienlakhawm, a pa chun a lût a lo phal ta naw a.

² A pa chun, “Ama hi i theida hle rawi am a nih ka ti a, chuleiin, i ruolpa ka lo pêk tah a nih; a sang hi ama nêkin a hmêl a ṭha lem a ni naw am a nih? A aiah ka ngên che hi, ama hi nei lem el raw khai,” a ti a.

³ Samson chun an kuomah, “Tuta ṭum chu Philistin mihai pawi tâwk lang khawm dem kai naw ning ah,” a ti a.

⁴ Chuongchun, Samson chun sihal za thum a va man a, meiser a lâk a, an mei le mei chu a sui mat a, an mei inkâr senga chun meiserhai a sie a,

⁵ Chun, meiserhai chu a raw zo chun Philistin mihai bu ngîr lai chun ân tlânluttir tâwl ta a, buphal le bu la ngîrhai chu, oliv hmunhai chenin a kâng ta vawng a.

⁶ Chun, Philistin mihai chun, “Hi hi tu ithaw am an leh?” an ti a. Anni ma chun, “Timnaa mi mâkpa Samson thaw a ni el hi tie, a nuhmei a lâkpêk a, a ruolpa kha ân neitir leiin,” an ti a. Chun, Philistin mihai chu an hung a, chu minu le a pa chu an raw hlum ta a.

⁷ Chun, Samson chun an kuomah, “Hieng anga in thaw a ni si chun in chungah phuba ka lâk hmakhat chu to naw ning,” a ti a.

⁸ Chuongchun, nasatakin a thaw a, a that a that a, chun a fe thla a, Etam lungpui kawi kârah a um ta a.

Samsonin Lehiah Philistinhai a hne

⁹ Chun, Philistin mihai chu an hang fe a, Juda rama chun an hang inkul a, Lehi hmuna chun an inzar a.

¹⁰ Juda rama mihai chun, “Iengtiziea mi do dinga hung el am in ni a?” an lo ti a. Anni chun, “Samson kha khuop a, kan chunga a thaw ang bawka a chunga thaw ve dingin kan hung a nih,” an ti a.

¹¹ Chun, Juda rama mi, mi sâng thum Etam lungpui kawi kâra chun an zu fe a, Samson kuoma chun, “Philistin mihai hi kan chunga rorêltuhai an nih ti i hriet naw am a nih? Iengtiziea kan chunga hieng thil hung thaw el am i ni a?” an ti a. Ama chun an kuomah, “Ka chunga an thaw ang bawkin an chungah ka thaw ve a ni kha,” a ti a.

¹² Anni chun a kuomah, “Nang hi khuop chea, Philistin mihai kuta pe ding chein kan hung thla a nih,” an ti a. Chun Samsonin an kuomah, “Nangni chun chu mi sukhlum lo dingin ka kuomah ṭawng inkhâm ro,” a ti a.

¹³ Anni chun a kuomah, “Sukhlum lo e a, amiruokchu, khuop tlat kan ti che a, an kutah kan pêk el ding che a nih; that chu that dêr naw ning ung che,” tiin an hril a. Chuongchun, hruihruol thar pahniin an khuop a, lungpuia inthawk chun an ṭhuoi tung ta a.

¹⁴ Lehi hmun a hung tlung chun, Philistin mihai chun an lo tuok a, an lo khêk dur dur a; chun, Lalpa thlarau chu a chungah nasatakin a hung tlung a, chuongchun, a bân khuopna hruihruol chu ziza zai kâng tan ang el hi a hung ni ta a, a khuopnahai chu a kuta inthawk chun a tla ta tawp el a.

¹⁵ Chun, sabengtung khâkru a tharlâm deu hi a hmu a, a hei ban a, a lâk a, chu chun mi sâng khat a vuok hlum a.

¹⁶ Chun, Samson chun, “Sabengtung khâkruin pâwng thûr pâwng thûr e, Sabengtung khâkruin mi sâng khat ka vuok hlum ie,” a ti a.

¹⁷ Thu a hril zo chun a khâkru chawi chu a pei ta a; chun, chu hmun chu Ramath-lehi an hung ti ta a,

¹⁸ chun, a dang a hung châr ta êm êm el a, Lalpa chu a ko ta a, “Nangin i siehlaw kut hi hmangin ropuitakin i mi lo sansuok ta a, tuhin dangchârin ka thi elin, sertannawhai kuta hin ka tlulût el ding am a nih?” a ti a.

¹⁹ Chuongchun, Pathien chun Lehi hmuna khur um chu a hung sukkak phuk a; chun, tui a hung inchik suok ta a; chu chu a hang dâwn chun a lungril a hung hrât nâwk ta a, a hung har ta huoi a, chuongchun, chu hminga chun En-hakkore an ti ta a, tu chen hin Lehi hmuna chun a la um zing a nih.

²⁰ Chuongchun, Philistin mihai hun laia chun Israelhai chungah kum sâwmhni ro a rêl a nih.