RORELTUHAI 14 - Pathien Lekhabu Inthieng (BSI)

Samson le Timnaa nuhmei chanchin

¹ Samson chu Timna khuoah a zu fe a, Timnaa chun Philistin mihai naunuhmeihai laia mi nuhmei pakhat hi a zu hmu a.

² A hung nâwk chun a nu le pa chu a hril a, “Timna khuoah Philistin mihai naunuhai laia mi nuhmei pakhat ka hmu a, ka nuhmei dingin mi neipêk ro,” a ti a.

³ A nu le pa ruok chun a kuomah, “I unauhai naunuhmeihai laia manih, ei chihai po po laia hin amanih nuhmei an um dêr naw nîng a ti maw, Philistin mi, sertanlohai laia nuhmei ding i zu zawng el chu?” an ti a. Samson ruok chun a pa kuomah, “Mi neipêk el rawh, ka dit êm i sawnnâwm ie,” a ti a.

⁴ Nisienlakhawm, a nu le pa chun, chu chu Lalpa thaw a nih ti an hriet naw a; Philistin mihai chunga remchâng a zawng a ni si a. Chuong lai chun Philistin mihai chun Israel mihai chungah ro an rêl a.

⁵ Chuongchun, Samson chu a nu le pa le chun Timnaa chun an zu fe a, Timnaa grêp huon hi an zu tlung a; chun, ngai ta, sakeibaknei vânglai hin a lo inrûm khum a.

⁶ Chun, Lalpa thlarau chu a chungah nasatakin a hung tlung a, chuongchun, kêlte kei nâwi takin a kei nawi el ta a, iengkhawm a chawi si naw a; nisienlakhawm, a thil thaw chu a nu le pa chu a hril nawh.

⁷ Chun, a zu fe a, nuhmei chu a zûn biekpui a, Samson chun a dit hle el a.

⁸ Chun, a nakie deu chun zu nei tumin a zu fe nâwk a, sakeibaknei ruong kha en tumin a va pêt a; chun, sakeibaknei taksaa khuoi lo um mur mur le a zu khawm lo um chu a hmu a.

⁹ Chu chu a lâk a, a fe nâwk ta a, fe malam chun a fâk pei a; chun, a nu le pa kuom chu a hang tlung a, anni khawm a pêk ve a; anni khawm chun an fâk a, amiruokchu, khuoizu chu sakeibaknei taksaa inthawka a lâk a nih ti iengkhawm a hril naw a.

¹⁰ Chun, a pa chu nuhmei kuoma chun a zu fe a; chun, chutaka chun Samson chun ruoi a ṭhe a, chu chu tlângvâlhai thaw dân hrim a ni a.

¹¹ Chun, mipuiin ama chu an hmu phingleh a kuoma um ve dingin ruolhai sâwmthum a ṭhuoi a.

¹² Chun, Samsonin an kuomah, “Tuhin thukhir indawn ka ti cheu le; ruoiṭhe ni, ni sari sûnga in mi hrilfie theia in hriet suok thei chun puon zai inhmi sil sâwmthum le inthlengna puon sâwmthum pêng ka ti cheu;

¹³ amiruokchu, in mi hrilfie thei naw chun, puon zai inhmi sil sâwmthum le inthlengna puon sâwmthum in mi pêk ding a nih,” a ti a. Anni chun a kuomah, “I thukhir chu hang hril ta la, lo ngai kan tih,” an ti a.

¹⁴ Chun ama chun an kuomah, “Fatua inthawka fâk ding hung suok a, Hrâttaka inthawka thlumtak hung suok, ti hi,” a ti a. Chun, ni thum sûng chun chu thukhir chu an hrilfie thei ta naw a.

¹⁵ A ni sari ni chun Samson nuhmei kuoma chun, “I pasal hi hi thukhir hi mi hrilfie dingin thlêm rawh, chuong naw chun nang le i pa sûnghai hi kan raw el ding a nih, mi sukrethei dingin a ni maw in mi fiel? A nih ni lo am a nih?” an ti a.

¹⁶ Chuongchun, Samson nuhmei chu a hmaa chun a ṭap a, “Mi hmangai lovin i mi theida a lo ni lem hi tie: ka chihai chu thukhir în dawn a, kei hlak i mi hrilfie ve si naw a,” a ti a. Ama chun a kuomah, “Ngai ta, ka nu le ka pa khawm ka hril naw a, nang ka hril ding che maw?” a ti a.

¹⁷ Chun, a ruoiṭhe, ni sari sûng po chu a hmaah a ṭap a ṭap el a, chun a ni sari ni chun a ngên tlut tlut el leiin a hril ta khawng khawng a; chun, ama chun thukhir chu a chihai chu a hril ve ta a.

¹⁸ Chun, a ni sari ni, nisa tlâk hmain chu khuoa mihai chun a kuomah, “Khuoizu nêka thlum lem ieng am a ni a le? Sakeibaknei nêka hrât lem ieng am a ni a le?” an ti a. Ama chun an kuomah, “Ka bâwngla hin hnuoi inlet naw unla chu, Ka thukhir hi in hriet suok dêr naw ding bah,” a ti a.

¹⁹ Chun, Lalpa thlarau chu a chungah nasatakin a hung tlung a, chun Askelonah a zu fe a, chu khuoa mi sâwmthum a that a, an thuom a hlîppêk a, inthlengna puonhai chu thukhir hrilfietuhai chu a pêk ta a. Lungsen êm êmin a pa in tieng a kîr nâwk ta a.

²⁰ Chun, Samson nuhmei chu inneinaa ṭhien dinga a hmang, a ruolpa kha an lo pêk ta a.