RORELTUHAI 12 - Pathien Lekhabu Inthieng (BSI)

Jeptha le Ephraim

¹ Ephraim mihai chu an pung khâwm ta rak el a, Jordan vadung chu Zaphonah an fe kai a, Jeptha kuoma chun, “Iengdinga Ammon mihai do dinga i hung khan i mi hung fiel ve naw am a na? I in chu nang leh kan raw ding a nih,” an ti a.

² Jeptha chun an kuomah, “Ammon mihai hi kei le ka mihaiin theipatâwp suoin kan thaw a na, kan incha lai cheu khan an kuta inthawkin in mi sansuok si nawh.

³ Nangni hlaka in mi sansuok nuom nawh ti ka hriet phingleh thi dâwn hlek lovin ka ṭhang a, Ammon mihai chu do dingin ka vân thawk a, chuongchun, Lalpain anni rawi chu ka kutah a pêk ta a; chuleiin, ieng dinga kei mi do dinga vawisûn hin hung inthawk am in ni a?” a ti a.

⁴ Chuongchun, Jeptha chun Gileada mi po po chu a ko khâwm a, Ephraim mihai chu a do ta a; chun Gilead mihai chun Ephraim mihai chu an that an that a, “Nangni Ephraim hnam tlân hmang Gileadhai, Ephraimhai lai le Manasse mihai laia ṭhang ve mei meihai,” an ti hlak leiin.

⁵ Chun, Gilead mihai chun Ephraim mihai depa Jordan vadung kaihai chu an lo man a, chun Ephraim mi tlân hmanghai tu el khawmin, “Hung kai ka tih,” a ti pha chun, Gilead mihai chun a kuomah, “Ephraim mi i ni am?” an lo ti pei a.

⁶ Ama chun, “Ni lo e,” a ti chun a kuomah, “Shibboleth hang ti ta,” an lo ti a, chun, ama chun, “Sibboleth,” a ti lem ta hlak a, a lam fie ve thiem si naw a, chuongchun, an man a, Jordan vadung kaihaia chun an lo that pei a; chuongchun, chu ṭum chun Ephraim mihai chu sîng li le sâng hni an that a.

⁷ Jeptha chun Israelhai chungah kum ruk ro a rêl a. Chun, Gilead mi Jeptha chu a thi a, Gilead rama khawpui pakhatah an phûm ta a.

Ibzan, Elon le Abdonin Israel ro an rêl

⁸ Ama hnunga chun Bethlehema mi Ibzan chun Israelhai chungah ro a rêl a.

⁹ Ama chun naupasal sâwmthum a nei a, naunuhmei sâwmthum chu ama chipui ni lohai ân neitir a; chun, a naupasalhai ta ding chun ama chipui nilo mihaia inthawkin naunuhmei sâwmthum a ṭhuoipêk bawk a. Chun, Israelhai chungah kum sari ro a rêl.

¹⁰ Ibzan chu a thi a, Bethlehemah an phûm a.

¹¹ Ama hnunga chun Zebulun mi Elonin Israelhai chungah ro a rêl a; Israelhai chungah kum sâwm ro a rêl.

¹² Chun, Zebulun mi Elon chu a thi a, Zebulun rama Aijalonah an phûm a.

¹³ Ama hnunga chun Pirathon mi Hillel naupa Abdonin Israelhai chungah ro a rêl a.

¹⁴ Ama chun naupasal sâwmli le tupa sâwmthum, sabengtungte sâwmsari chunga chuong hlak mi a nei a; ama chun Israelhai chungah kum riet ro a rêl.

¹⁵ Chun, Pirathon mi, Hillel naupa Abdon chu a thi a, Ephraim ram Amalek mihai tlâng rama Pirathon khuoah an phûm ta a.