ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 7 - Pathien Lekhabu Inthieng (BSI)Inneinaa inthawka inentirna 1 Anleh, unauhai, dân chun mi a dam sûng po a chungah ro a rêl hlak ti in hriet naw am a nih? (Dân hre mihai kuomah ka hril a ni hi). 2 Nuhmei pasal nei chu a pasal dam sûng po dânin a pasala khuopdein a um hlak; nisienlakhawm, a pasal a thi chun, pasal kawngah dâna inthawka insuoin a um hlak. 3 Chuongchun, a pasal dam sûnga mi dang a nei chun “uirenu” tîng an tih; a pasal a thi ruok chun, chu dâna inthawk chun inthlain a um a; chuongchun, mi dang nei sien khawm uire a ni ta nawh. 4 Chuongchun, unauhai, Krista taksa pêng in ni leiin dân kawnga sukhlumin in lo um ta a, mi dang, mithi laia inthawka a keitho kha, in nei thei tah, Pathien tienga kan ra theina dingin. 5 Tisaa ei um lai khan Dân leia nuom zâwng suol hung suokhai chun ei taksa pêngahai thina khawpa ra dingin sin a hung thaw hlak. 6 Tu ruok hin chu a mi cheltu chu thisanin, Dâna inthawkin inthlain ei um tah; chuleichun lekha ziek hlui ang ni lovin, Thlarau tharin rawng ei bâwl theina dingin. Dân le suolna 7 Ieng am hril tâng ei ta? Dân chu suol am a nih? Teu lo e a; Nisienlakhawm, Dân leia hriet ni naw sien chu suol ka hriet naw ding bah; Dân chun, “Inhnar naw,” ti naw sien chu inhnar hi ka hriet naw ding bah. 8 Nisienlakhawm, suolin thupêk lei chun remchâng lai hmuin, inhnarna tinrêng ka sûngah ân umtir a. Dân naw chun suolna chu a thi a nih. 9 Chun, kha hma khan kei dân nei lovin ka hring a; nisienlakhawm, thupêk chu a hung um phingleh suolna chu a hung har a, kei chu ka thi ta a. 10 Chun, hringna dinga thupêk chu thina ding lem a nih ti ka hung hriet ta a; 11 suolna chun thupêk lei chun, remchângna hmuin a mi lo hlêm a, thupêk chu hmangin a mi sukhlum tah a nih. 12 Chuongchun, Dân chu ân thieng a, thupêk khawm chu ân thieng a, a fel a, a ṭha a nih. Mihriema mizie pahni um chu 13 Anleh, thil ṭha chu keia ta dingin thina a lo ni am a nih? Teu lo e a! Suolna chu keia ta dingin thina a hung ni ta lem a nih; chuongchun, suolna chu suolna a nih ti ân lang theina dingin, thil ṭha chu hmangin a mi sukhlum a nih. Suolna chu thupêk lei khan suol nasatak a ni theina dingin. 14 Dân chu Thlarau tieng thil a nih ti ei hriet si a; kei ruok chu tisa tienga mi, suol suoka zawr ta hnung ka nih. 15 Sin ka thawhai hi a ngaina ka hriet si naw a, ka thaw hlakhai hi ka thaw nuom zâwng khawm a ni si naw a; ka itheida zâwngtak chu ka thaw lem hlak a nih. 16 Ka thaw nuom naw zâwng chu ka thaw si chun, Dân chu a ṭha tia awi nîng ka tih. 17 Chuongchun, thil ka thawhai hi keiin ka thaw a ni ta naw a, suolna keimaa um chun a thaw a ni lem a nih. 18 Keimaa hin, chu chu ka tisaa hin tina a nih, thil ṭha hrim a um nawh ti ka hriet, thil ṭha thaw nuomna chu keimaah a umdea chu, thil ṭha thawna chu a um si naw a. 19 Ṭhatna thaw ka nuoma chu ka thaw naw a, suolna ka thaw nuom naw chu ka thaw si a. 20 Ka nuom naw zâwng ka thaw si chun, a thawtu chu kei ka ni ta naw a, suol keimaa um chu a ni lem a nih. 21 Chuongchun, hi dân hi ka hung hriet suok tah; thil ṭha thaw ka nuom laiin suolna ka kuomah a hung um hlak a nih. 22 Ka lungril takin Pathien dân chungah ka lâwm si hlak a; 23 nisienlakhawm, ka taksa pênghaia hin dân danglam a um ti ka hriet, chu chun ka lungrila dân chu a do a, ka taksa pênghaia suolna dân umhai chun salah a mi ṭhuoi a nih. 24 Mi rimsi ka va ni ngei de aw! Hi thina taksaa inthawk hin tuin am mi sansuok a ta? 25 Isu Krista ei Lalpa lei chun Pathien kuomah lâwmthu ka hril a nih. Chuongchun, keima tak chun, ka lungril chun, Pathien dân rawng ka bâwl hlak, ka tisa ruok chun suolna dân rawng ka bâwl hlak. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India