ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 5 - Pathien Lekhabu Inthieng (BSI)

Ringna ra chu

¹ Chuleiin, ringna leia thiem changa umin, ei Lalpa Isu Krista leiin Pathien le inremin ei um a;

² ama lei bawk chun hi lunginsietnaa ei ngir detnaa hin ringnain ei lût ta a, Pathien ropuina beiseiin lâwmin ei um bawk a nih.

³ Chu chau chu ni lovin, ei rimsiknaa khawm lâwmin ei um a nih, rimsikna chun selna a siem a,

⁴ tuorselna chun hriet fiena a siem a, hriet fiena chun beiseina a siem ti ei hriet si a.

⁵ Chun, Thlarau Inthieng ei kuoma a mi pêk khan Pathien hmangaina chu ei lungrilah a hung buok ta leiin beiseina chun a mi sukbeidawng naw a.

Krista thinaa Pathien hmangaina suklanga um chu

⁶ Ei la hrât naw lai khan a hun takah Krista chu mi suolhai ai chun a lo thi ta si a.

⁷ Mi fel ta dinga thi nuom mi an vâng hle âwm si a, mi ṭha ta ding ruok chun mi tûamani bêk chun thi a lo ngam khiet rawi mawh.

⁸ Nisienlakhawm, Pathien chun a mi hmangaina chu inpâk tlâkin ân langtir a, mi suolhai ei la ni laia Krista eini aia a thinaa khan.

⁹ Chuongchun, a thisena thiem inchangtira ei um ta hin chu, ama lei bawkin Pathien lungsennaa inthawkin sandamin um ngei ei tih.

¹⁰ Hmêlma ei ni lai hmana, a Naupa thina leia Pathien le lo inrem tah ei ni chun, inrema ei um ta hnung lem hin chu a hringna leiin sandamin um ngei ei tih.

¹¹ Chuong chau khawm chu a ni naw a, inremna tuta a mîn hmutirtu ei Lalpa Isu Krista lei chun Pathienah ei lâwm bawk a nih.

Adama inthawka thina le Kristaa inthawka hringna chu

¹² Chuongchun, mi pakhat leiin suol khawvêla hin a lût a, suol leiin thina a lût bawk a; chuong ang bawkin mi po poin thil an lo suksuol ta leiin thinain mi po po a fang suok ta a.

¹³ Dân um hmain suol khawvêlah a um ta si a; dân a um si naw chun suol chu suola ngai a ni nawh.

¹⁴ Nisienlakhawm, Adama inthawk Mosie um chenin Adam bawsietna anga thil suksuol nawhai chunga khawm thina chun ro a rêl hlak a. Adam chu la hung dingpa hlimthla chu a nih.

¹⁵ Nisienlakhawm, thilthlâwnpêk chu bawsietna leh ân ang nawh. Mi pakhat bawsietna lei hman khan mi tamtak chu an thi si chun, Pathien lunginsietna le mi pakhat Isu Krista lunginsietna leia thilpêk chu, mi tamtak chungah vurin um ngei a tih.

¹⁶ Chun, chu thilpêk chu mi pakhat suol leia thil hung um le chun ân ang bawk nawh; thiemnaw inchangtirna rorêlna chu mi pakhat leiin a hung um a, thiem inchangtirna thilthlâwnpêk ruok chu bawsietna tamtak leiin a hung um ta lem a nih.

¹⁷ Mi pakhat bawsietna leiin, mi pakhat lei hmana thinain ro a rêl si chun, lunginsietna nasatak le felna thilpêk lo changtuhai khan mi pakhat Isu Krista lei khan hringnaa chun ro rêl ngei an tih.

¹⁸ Chuongchun, mi pakhat bawsietna leiin, thiemnaw inchangtirna rorêlna chu mi po po chungah a hung um a; chuong ang bawkin thil fel pakhat thaw lei chun, hringna hmuna dinga thiem inchangtirna thilthlâwnpêk chu mi po po chungah a hung um.

¹⁹ Mi pakhat thu awi nawna lei khan mi tamtak chu mi suol an hung ni tah; chuong ang bawkin mi pakhat thuawi lei khan mi tamtak chu mi fel hung nîng an tih.

²⁰ Chun, bawsietna chu ân lang nawk zuol theina dingin Dân a hung um nâwk nghâl a. Nisienlakhawm, suol a pungna poah lunginsietna chu a pung zuol pei hlak;

²¹ suol chun thinain ro a rêl ang takin, lunginsietna chun, felnain kumkhaw hringna changna khawp hielin ei Lalpa Isu Krista zârah ro a rêl theina dingin.