ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 3 - Pathien Lekhabu Inthieng (BSI)

¹ Anleh Juda mi chun sâwtna ieng am a nei chuong bîk a? Sertan khawm chu a sâwtna ieng am a ni leh?

² Kawng tinrêngah a sâwt hle. Pathien thuhai an kuomah inkawltira a um lei a ni tak.

³ Anni laia ṭhenkhathai ringum nawhai sien khawm ieng am a ni chuong leh? An ringumnawna chun Pathien ringumzie chu ieng khawm ni lovin a siem chuong am a nih?

⁴ Teu lo e! Pathien chu mi indiktak lo ni raw se, mi tin chu mi khêlhlip lo nihai sien khawm: “Nangin i thu hrilin thiem în changtir thei a, rorêlpêka i um khawma i hne theina dingin,” ti ziek ang khan.

⁵ Nisienlakhawm, ei fel nawnahai hin Pathien felna chu a suklang mawi zuol si chun ieng am hril ei ta? Pathienin mi a hrem hin, mi fel lo a ni am a nih? (Mihriem dân takin hril ta inla).

⁶ Teu lo e! Chuong a ni chun Pathienin iengtin am khawvêl ro rêl a ta?

⁷ Nisienlakhawm, ka khêl hril leia Pathien thu indikzie ama sukropui khawp raua ân lang nâwk pei chun, ieng dinga kei khawm mi suol anga thiemnaw inchangtira la um rawp am ka na?

⁸ Mîn an mi hêk a, mi ṭhenkhatin ka hril naw tawp an mîn hriltir angin ieng dinga, “Thil ṭha a hung theina dingin thil suol thâwng ei tiu,” tiin ei hril lem naw? Chuong ang mihai chun thiemnaw an chang chu a fel a nih.

Tukhawm mi fel an um nawh

⁹ Annawleh, eini Judahai hi anni nêkin ei ṭha chuong bîk am a nih? Teu lo e ! Judahai le Grikhai chu angkhat rawnga suolna suoka um vawng ei nih ti hi hma khawmin ei hril ta kha;

¹⁰ “Tukhawm mi fel hrim an um nawh. Pakhat bêk khawm an um nawh,

¹¹ Tûkhawm a hre thiem hrim an um nawh, Tûkhawm Pathien zawng hrim an um nawh.

¹² A ni naw tieng an pêt vawng ta a, Ienga khawm hmang tlâk lovin an um vawng ta a; Tûkhawm thil ṭha thaw hrim an um nawh; Pakhat bêk khawm an um nawh.

¹³ An hnuk chu thlân inhawng a na, An leiin inhlêmna thu a hril a, An bau sûngah rûl tûr a um a,

¹⁴ An bau chu ṭawngseinphurna le thu khain a sip a.

¹⁵ An ke chu thisen insuo dingin a pên hrât a;

¹⁶ An lampuia chun bohmangna le rinumna a um a.

¹⁷ Lungmuongna lampui khawm an hriet nawh.

¹⁸ An mithmuah Pathien ṭina hrim a um nawh,” ti ziek ang khan.

¹⁹ Dânin iengkhawm a hril taphawt chu Dân thu thua umhai kuomah a hril a nih ti ei hriet a, bau tinrêng hupa a um theina ding le, khawvêla mi po po Pathien rorêla an um theina dingin.

²⁰ Chuongchun, mi tukhawm Dâna thilthaw leiin a mithmuah thiem changin um naw ni hai; Dân leiin suol hriet famkimna a hung um a ni si a.

Ringna leia felna

²¹ Nisienlakhawm, tuhin Dân ṭhang lova Pathien felna chu suklangin a um tah; Dân le zâwlneihai thu khawma a hril kha a nih;

²² chu chu Pathien felna, Isu Krista ringna leia ama awitu taphawt kuoma suklanga um chu a nih; a danglamna hrim a um naw a.

²³ Mi po poin thil an suksuol vawng ta a, Pathien ropuina an chang zo ta naw a nih.

²⁴ Chuong a ringtuhai chu Krista Isua intlanna um lei chun, lunginsietnaa a thlâwna thiem inchangtirin an um a.

²⁵ Pathienin ama felzie inentir dingin Krista Isu chu a thisen ringnaa suol thuphachawina dingin a ruot a. Pathien zaidawtheinain inhmaa suolnahai chu hriet naw tehlêm a thaw a nih.

²⁶ Ama ngei chu mi fel a nizie le Isua ringna nei taphawt thiem inchangtirtu a ni zie tulaia inentirna dingin a nih.

²⁷ Insuongna chu khâwlai am a um leh? A puo tienga khâr nelin a um tah. Ieng dânin am a na? Thilthaw dânin am a nih? Ni lo e, Ringna dânin a ni lem.

²⁸ Chuongchun, Dân thil thaw lei ni lovin, ringna leiin miin thiem chang dingin ei ngai a nih.

²⁹ Pathien chu Judahai Pathien chau am a nih? Jentailhai Pathien khaw m a ni ve naw am a nih? Ni ve e.

³⁰ Sertanhai chu an ring leia thiem inchangtirtu ding le, sertannawhai chu an ring leia thiem inchangtirtu Pathien pakhat chau a ni si chun, Jentailhai Pathien khawm ni ve ngei naw ni.

³¹ Anleh, ringna lei ngawtin Dân chu iengkhawm ni lovin ei siem el am a nih? Teu lo e! Dân chu ei sukdet lem hman a nih.