ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 16 - Pathien Lekhabu Inthieng (BSI)

Chibai bûkna

¹ Ei farnu Phoibi, Kenkrieia kohran rawngbâwltu hi inhmêlhriettir cheu ka nuom a nih:

² Lalpa hminga mi inthienghai ang bawka in lo lâwmna ding le, in ṭhangpui a ngaina poa in ṭhangpui theina dingin. Ama ngei khawm hi mi tamtak ṭhangpuitu a lo ni hlak a, kei ngei khawm ami ṭhangpui a nih.

³ Priskilla le Akuila kha chibai mi bûkpêk ro, Krista Isua ka sin thawpui, ka nun sanhimna dinga, rîng daw ngamhai an nih.

⁴ Kei chau ni lovin Jentail kohran po poin anni kuoma chun lâwmthu an hril a nih.

⁵ An ina kohran inkhâwmhai chu chibai mi bûkpêk bawk ro. Ka dittak, Epainet, Asia rama Krista awi hmasatak kha chibai mi bûkpêk ro.

⁶ Mari in ta dinga inrimnu kha, chibai mi bûkpêk ro.

⁷ Ka chipui Andronika le Junia kân tângpuihai kha chibai mi bûkpêk ro; anni chu tirkohai laia hming inthang an na, keia nêka Kristaa um hmasa lem an nih.

⁸ Amplia Lalpaa ka dittak kha, chibai mi bûkpêk ro.

⁹ Kristaa kan sinthawpui Urbana le ka dittak Sitaku kha chibai mi bûkpêk ro.

¹⁰ Kristaa mi tak, Apellia kha chibai mi bûkpêk ro. Aristobul sûnghai laia mihai kha chibai mi bûkpêk ro.

¹¹ Ka chipui, Herodion kha chibai mi bûkpêk ro. Narkissa sûnghai laia Lalpaa umhai kha chibai mi bûkpêk ro.

¹² Truphaina le Truphossa, Lalpaa sinthaw inrimhlakhai kha, chibai mi bûkpêk ro. Dittak Persi, Lalpaa sin thaw inrim bêk bêk ta kha chibai mi bûkpêk ro.

¹³ Lalpaa thlang, Rufa le a nu, ka nu ve bawk kha, chibai mi bûk pêk ro.

¹⁴ Asunkrita hai, Phlegon hai, Hermia hai, Patroba hai, Herma hai, an kuoma unau umhai leh chibai mi bûkpêk ro.

¹⁵ Philologo le Julli, Nire le a farnu leh Olumpa leh an kuoma mi inthieng umhai po po le khan chibai mi bûkpêk ro.

¹⁶ Infâwp inthiengin chibai inbûk ro. Krista kohranhai po poin chibai an bûk tâwl cheu.

¹⁷ Chun, unauhai, inchûktirna thu, nangni inchûk nawna tieng pang inṭhena le tlukna siemtuhai chu vêng ṭha dingin le nghatsan dingin ka ngên cheu.

¹⁸ Chuong ang mihai chun, ei Lalpa Krista rawng chu an bâwl naw a, anni phîng rawng an bâwl lem hlak a nih. An bau ṭhat le an bau thiemin mi mâwlhai lungril an hlêm hlak a nih.

¹⁹ In awizie chu mi po po kuomah ân thang suok ta si a. Chuleiin, nangni chungthuah ka lâwm a nih; nisienlakhawm, a ṭha tieng in vara, a suol tieng in var naw ka nuom a nih.

²⁰ Chun, Remna Pathien chun, in kepha hnuoiah um dingin Setan chu hung suknawi vak a tih. Lalpa Isu Krista lunginsietna chu in kuomah um raw se.

²¹ Ka sinthawpui Timothe le ka chipui Lukia hai, Jason hai, Sosipater hai rawiin chibai an bûk cheu.

²² Kei Terti, hi lekhathawn ziektu hin Lalpa hmingin chibai ka bûk cheu.

²³ Kei le kohranhai po po tlunginpa, Gaia chun chibai a bûk cheu. Khuoa sum enkawltu Erasta le, a unaupa Kuorta chun chibai an bûk cheu.

²⁴ Ei Lalpa Isu Krista lunginsietna chu in kuomah um raw se. Amen.

Thu khâr ṭawngṭaina

²⁵ Tuhin ama chun, ka Chanchin Ṭha hril le, Krista thuhril le, kumkhuoa thurûk inthup suklanga um anga chun nangni a sukhrât thei cheu a.

²⁶ Chu thurûk chu kumkhuo Pathien thupêk angin zâwlneihai lekhathuin hnam tin kuomah inhriettir a ni ta a, mi tinin an ringa an zâwm theina dingin.

²⁷ Ama Pathien var tak chau kuom ngeia chun Isu Krista leiin kumkhuoin ropuina um raw se, Amen.