ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 11 - Pathien Lekhabu Inthieng (BSI)

Israel la mahlahai chu

¹ Anleh, Pathienin a mihai chu a pei thlâk am a nih? Teu lo e a! Kei khawm Israel mi, Abraham thla, Benjamin hnam ka ni si a.

² Pathienin mi a ihriet lâwkhai chu a pei thlâk nawh. Pathien Lekha Thu chun Elija, thu a hril hi in hriet naw am a nih? Ama chun Israelhai chungthu Pathien kuomah ân tlun a;

³ “Lalpa, i zâwlneihai an sukhlum a, I maichâmhai an cho chim a, Keia khât chauin ka la um a, Kei khawm mi sukhlum an tum a nih,” a ti hi.

⁴ Nisienlakhawm, Pathienin iengtin am a dawn a? “Baal hmaa la dingṭhaṭhuon ngai naw, mi sâng sari keia tâ dingin ka la hla zing a nih,” tiin a dawn a.

⁵ Chuong ang bawkin, tulai khawm hin lunginsietnaa thlang ang peiin pei thlâk mahla chu an la um.

⁶ Lunginsietna lei a ni chun thilthaw lei ni ta naw ni; chuong a ni naw chun lunginsietna hi lunginsietna ni ta naw ni.

⁷ Iengtin am ni tâng a ti leh? Israel mihai chun an zawng chu an hmu naw a; Thlanghai ruok chun an hmu a, a danghai po po chu an ngawng zo ta a.

⁸ “Pathienin vawisûn chen hin inlusukna thlarau a pêk a, hmu thei nawna mithai le, hriet thei nawna nâhai dâm le chun,” tia ziek ang khan.

⁹ Chun, David chun, “An dâwkân chu an ta dingin châng le bil le, Tlûkna le, thungna lo ni raw se;

¹⁰ An hmu thei nawna dingin an mithai hung inthim raw se; Nangin an ruongzâng inkûntir rawp rawh,” a ti a.

Jentailhai sandamna

¹¹ Anleh, an tlûk chu an tlûk sawngna ding am a nih? Teu lo e a! An tlûk leiin Jentailhai kuoma chun sandamna a hung tlung ta lem a nih; Israel mihai inthîktirna dingin.

¹² Chuongchun, an tlûkna hman khawvêl sukhausakna a na, an kiemna hman Jentailhai sukhausakna a ni chun, an famkimna chu an hausakna a va ni nasa zuol ding de!

¹³ Chuongchun, nangni Jentailhai kuomah ka hril a nih. Kei Jentailhai tirko ka ni leiin, ka rawngbâwlna sin hi ka chawimawi a nih;

¹⁴ ka chipuihai kân thîktir hrâm theina ding le, anni laia mi ṭhenkhat ka sandam theina dingin.

¹⁵ Anni pei thlâkna hman khawvêl ta dinga inrem nâwkna a ni chun, anni lâwm nâwkna ding chu, thinaa inthawka hring nâwkna naw chu ieng am ning a ta ?

¹⁶ Chun, bei tlang ât thlâk hmasatak chu inhlân thieng a ni chun a pumin chuong ang bawk chu a nih. A zung ân thieng chun a kâuhai khawm chuong ang bawk chu a nih.

¹⁷ Chun, a kâu a ṭhen chu suktlieka umin, nang oliv puopa ni si, anni laia zawma umin, oliv thing hringna ṭha în ṭawmpui ve a ni chun,

¹⁸ a kâu danghai lai chun insuong naw rawh. Insuong la khawm, nang a zung châwmtu i ni naw a, a zung chu nang a châwmtu che a ni lem a nih.

¹⁹ Chun, nangin, “Zawma ka um theina dingin a kâuhai chu suktliekin a um annâwm?” tîng i tih.

²⁰ Anih, an ring nawna leiin suktliekin an um a, nang i ringna leiin i ngîr a nih.

²¹ Chapo naw la, ṭi lem rawh. Pathienin a kâu takhai hman a hla si naw chun nang khawm hla bîk naw ni che.

²² Chuongchun, Pathien ṭhatzie le a ṭiumzie chu ngaituo rawh; a tluhai ta ding chun ṭi a um a nih; nanga ta ding ruok chun a ṭha a nih, a ṭhatnaa i um zing chun; chuong a ni naw chun, nang khawm sât thlâkin um vêng i tih.

²³ Chun, anni khawm chu awi lova an um zing naw chun zawmin um an tih; Pathienin anni a zawm nâwk thei si a.

²⁴ Nang oliv puopa hrima inthawka sât thlâk hman, pieng dân naw anga oliv thing ṭhaa zawma i um chun, chuong a kâu tak takhai chu an bulpui, oliv thing pângngaia chun zawm an va ni nasa âwm de!

Mi po po chunga Pathien zângaina

²⁵ Unauhai, hi thurûk hi in hriet naw ka nuom nghâl si naw a, chuong naw chun intivar in tih; Jentail famkimna a hung tlung hma chun Israel mi ṭhenkhat chungah ngawngna a hung tlung hri phawt a nih, ti hi.

²⁶ Chuongchun, Israel mi po po sandamin um an tih; “Ziona inthawkin Sandamtu chu hung suok a ta, Jakob kuoma Pathien ngaisak nawna sukbo a tih.

²⁷ Chu chu an kuoma ka thu thlung ding chu a nih, An suolhai ka lâk hmang pha chun,” tia ziek ang khan.

²⁸ Chanchin Ṭha tieng ngaituo chun nangni leiin hmêlma an nih; Thlang thu tienga ngaituo ruok chun, thlatuhai lei khan dittakhai an nih.

²⁹ Pathienin a thilthlâwnpêkhaia le a konaa chun a lungril a lêt ngai si naw a.

³⁰ Inhma khan Pathien thu in awi naw a, nisienlakhawm, tuhin chu an awi naw leiin lunginsietna in chang si a;

³¹ Chuong ang bawkin tuhin chu Pathienin a lunginsiet cheu lei hin, lunginsietna chu an hmu ve theina dingin anni khawm chun an awi ve ta naw a ni hi.

³² Pathienin a lunginsiet vawng theina dingin mi po po awi lonaah a khum ta vawng si a.

³³ Pathien hausakzie, a varna le hrietna hauzie chu a vân thûk de! A rorêlnahai chu hriet thei ruol le, a lampuihai chu sui thei ruol a va ni naw de!

³⁴ Lalpa lungril chu tuin am a hriet a? A remruotpêktua khawm tu am a ṭhang ta a?

³⁵ A thung nâwk dingin tuin am a kuomah thil pe hmasa?

³⁶ Amaa inthawk le ama zâr le, ama ta dinga thil po po a hung um a ni si a; ama kuoma chun chatuonin ropuina chu um raw se. Amen.