ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 10 - Pathien Lekhabu Inthieng (BSI)

¹ Unauhai, ka lung nuom zâwng le, anni ta dinga Pathien kuoma ka ṭawngṭaina san tak hi, sandam an hung ni theina ding a nih.

² Pathien tieng ṭhahnem an ngai ti ka hrietpui a nih, hrietna indiktak leia ṭhahnemngaina ruok chu a ni nawh.

³ Pathien felna hre lovin, anni felna sukdet an tum a, Pathien felnaah an inpêk lût si nawh.

⁴ Krista chu ama ringhai po ta dingin felna an hmu theina dinga Dân suktâwpna a ni si a.

Mi popo ta dinga sandamna

⁵ Mosie chun, “Mi Dâna felna zâwm chu, chu felna zâra chun hring a tih,” tiin a ziek a.

⁶ Ringnaa felna ruok chun, hieng hin a hril, “In lungrilin, ‘Tu am vânah lâwn a ta?’ (chu chu Krista hung ṭhuoi thla ding tina a nih)

⁷ amanih, ‘Tu am vânsamah zu ṭum a ta?’ (chu chu mithi laia inthawka Krista zu ṭhuoi suok ding tina a nih) ti naw ro,” tiin.

⁸ Anleh, ieng am a hril a? “Thu chun a hnai che, i bau le i lungrila khawm a um,” tiin a hril a nih. Chu chu ringna thu ei hril hlak hi a nih:

⁹ I bauin, “Isu chu Lalpa a nih” tia i ṭan a, mithi laia inthawkin Pathienin a keitho ti i lungrila i ring phawt chun sandamin um i tih.

¹⁰ Mihaiin an lungrilin an ring a, felna an hmu hlak, bauin an ṭan a, sandamna an hmu bawk hlak a nih.

¹¹ Pathien Lekha Thuin, “Tûkhawm ama ring taphawt chu muolpho naw ni hai,” a ti a nih.

¹² Juda le Grik mihai chu ienga khawm an danglam chuong si naw a. Lalpa pakhat an rênga chunga Lalpa a nih; ama lamtuhai po chunga chun ṭhatna a hau si a.

¹³ “Tukhawm Lalpa hming lam taphawt chu sandamin um an tih,” a ti a nih.

¹⁴ Anleh, an awi naw chu iengtin am lam an ta? A thu an hriet naw chu iengtin am awi an ta? Thuhriltu um lovin iengtin am hrieng an ta?

¹⁵ Tir an ni naw chun iengtin am thu hril an ta? “Thil ṭha chanchin lâwmum intluntuhai ke chu a va mawi de!” tia ziek ang khan.

¹⁶ Nisienlakhawm, Chanchin Ṭha chu an rêng chun an ring vawng nawh. Isaiin, “Lalpa, kan thu hril tuin am a ring a?” a ti si a.

¹⁷ Chuongchun, ringna chu hrietna leiin a hung um hlak a; chun, hrietna chu Isu Krista leiin a hung um.

¹⁸ Anleh, an nain an hriet naw am a nih? Hre e le! “An ri chu ram tinah ân thang a, An thu chu kâwlkawdawng chenin ân thang suok tah.”

¹⁹ Anleh, Israel mihaiin an hriet naw am a nih? “Chia hril khawp lohai chu hmangin, Inthîktir ka ti cheu a, Hnam invêthai chu hmangin, Suklungsen ka ti cheu,” tiin Mosiein a hril hmasatak a.

²⁰ Chun, Isaiin huoitakin, “A mi zawng nawhai hmuin ka um a, A mi lam nawhai kuomah inhriettirin ka um a,” a ti a.

²¹ Amiruokchu, Israelhai thua chun, “Mi timawhai le sêlhrâthai ta dingin, Sûnnithlâkin ka bânhai ka phar hlak kha,” a ti a.