PHILIPPI 2 - Pathien Lekhabu Inthieng (BSI)

Inthuruol ding le indawtuo dinga infuina

¹ Chuongchun, Kristaah lungmuongna hrim hrim dâm, hmangai thlamuongna hrim hrim dâm, Thlarau pâwlna hrim hrim dâm, lainatna le lunginsietna hrim hrim dâm a um chun,

² lungril hmunkhata umin, hmangaina hmunkhat neiin, inthuruola lungril hmunkhata umin, ka lâwmna sukfamkim ro.

³ Esêlna le inngaihlut leia iengkhawm thaw lovin, mi tinin inngaitlâwmtakin mâni nêkin mi dang ṭha lemah ngai seng raw hai se.

⁴ Mâni ta chau en lovin, mi dang ta khawm en seng lem ro.

Krista inngaitlâwmna le chawimawia a umna

⁵ Hi lungril, Krista Isu khawma um kha, nangniah um raw se.

⁶ Ama chu Pathien nina neia um zing ni sien khawm, Pathien tluka um zing chu, tum lui tlat dingah a ngai naw a,

⁷ mihriemhai anga hung insiengin, suok angin ân siem a, ama le ama ân sukruok ta lem a.

⁸ Chun, mihriem anga hung umin ân ngaitlâwm a, thi khawp raka thu zâwmin a lo um ta a, krawsa thina ngei chu.

⁹ Chuleichun, Pathienin ama chu nasatakin a chawimawi ve thung ta a, hming po poa hming chunghnungtak chu a pêk ta a;

¹⁰ Isu hminga mi tin, vâna mihai, hnuoia mihai, hnuoi hnuoia mihai leh, an dingṭhaṭhuonna ding le,

¹¹ Pa Pathien sukropuina dingin, “Isu Krista chu Lal a nih,” tia lei tinrêngin a puongna dingin.

Var anga khawvêla var ding

¹² Chuongchun, ka idittakhai, thu in zâwm rawp ang khan, ka um lai chau ni lovin, tûta ka um naw kâr hin nasa lem hmanin, ṭi le inthin pumin in sandamna thaw suok ro,

¹³ ama lâwmna dinga thaw tum ding le thaw dinga nangnia sin thawtu chu Pathien a ni si a.

¹⁴ Chierna le insêlnahai um lovin iengkim thaw ro,

¹⁵ suon rilo le kâwmawhai laiah, demkâilo le pawitâwklo, Pathien nau sawisêlbohai in ni theina dingin. Annirawi laia hringna thu in inhlan pha chun, khawvêla hin sukvartu dingin insuklang ro.

¹⁶ Chuongchun, a thlâwna tlân ka ni naw a, a thlâwna sininrim ka ni bawk naw leiin Krista nia chun suong ding nei thei ka tih.

¹⁷ Anih, in ringna inthâwina le rawngbâwlna chunga chun bunthlâka um ding ni lang khawm ka lâwm a nih, in rêngin ka lâwmpui bawk cheu a nih.

¹⁸ Chuong ang bawkin nangni khawm lâwm unla, mi lâwmpui ve ro.

Timothe le Epaphrodita

¹⁹ Nisienlakhawm, in chanchin ka hrieta ka lungmuong ve theina dingin sâwt nawtê hnungah Timothe hi in kuoma hung tir Lalpa Isua chun ka beisei a nih.

²⁰ Hieng anga lungril put, in umzie titakzeta ngaituopêktu ding cheu tûkhawm ka nei si naw a.

²¹ An rêngin Isu Krista thil zawng lovin, mâni thil an zawng hlak si a.

²² Nisienlakhawm, ama hi chu fiea a um tâkzie in hriet, nauin a pa rawng a bâwl angin, Chanchin Ṭha sukdar kawngah rawng a mi bâwlpui hlak kha.

²³ Chuongchun, ka chanchin ding ka hriet phingleh ama hi hung tir nghâl lang ka ti a nih.

²⁴ Nisienlakhawm, kei ngei khawm sâwt nawtê hnungah hung Lalpaa chun kân ring tlat a nih.

²⁵ Nisienlakhawm, Epaphrodita, ka unaupa, ka sinthawpui, ka sipaipui le in tirko, ka thil tlâksama mi sawmdâwltu hi in kuoma hung tir ṭulin ka hriet.

²⁶ Ama chun in rêngin a ngai bêk bêk cheu a, a nâ ti in lo hriet leiin nasatakin a lungngai bawk a,

²⁷ thi ngama nâ chu a ni ngei luo a. Nisienlakhawm, Pathienin ama chu a lunginsiet a; chun, ama chau khawm ni lovin, lungngaina chunga lungngai nâwkzuolna ka nei nawna dingin kei a mi lunginsiet a ni fâwm bawk a.

²⁸ Chuongchun, ama hi in hmu nâwk phaa in lâwm theina ding le, kei ka lungngai a ṭhathnem theina dingin ka hung tir inhmaw deu a nih.

²⁹ Chuongchun, ama hi hlimna tinrêngin Lalpaah lo lâwm unla, hieng ang mi hi ngaihlu ro.

³⁰ In mi sawmdâwlna tlin bâk chu sunzawm dingin thi huoma thâtak suoin, Krista sinthawna leiin thi vângin a lo um ta si a.