PHILEMON 1 - Pathien Lekhabu Inthieng (BSI)

Chibai bûkna

¹ Paula Isu Krista mi intâng le ei unaupa Timothe chun:

² Kan dittak le kan sininrimpui Philemon kuoma dâm, kan farnu Aphi kuoma dâm, kan sipaipui Arkippa kuoma dâm, i ina kohran inkhâwmhai kuoma dâm:

³ Pathien ei Pa le Lalpa Isu Krista kuoma inthawka lunginsietna le inremna in kuomah um raw se.

Philemon hmangaina le ringna

⁴ Ka ṭawngṭainahaia chun i hming lam rawpin ka Pathien kuoma chun lâwmthu ka hril hlak a.

⁵ Lalpa Isu tieng le mi inthienghai po po tiengah hmangaina le ringna i nei chu hre zingin;

⁶ i ringna mîn ṭâwmpuina chu nangnia um thil ṭha tinrêng hriet famkimna kawnga chun, Krista tienga a ṭhathnem theina dingin;

⁷ unaupa, nangma zâra mi inthienghai lungril a har ta leiin i hmangainaa chun ka hlimin ka thlamuong bêk bêk a nih.

Onesima ta dinga ngênpêkna

⁸ Chuleiin, a âwmtâwk chu thaw dinga thupêk chu Kristaa chun ngam bêk bêk lang khawm,

⁹ hmangaina leiin (Paula tarsie rau lo ni tah, tuta Krista mi intâng ni bawk hin) a ngênin ka ngên lem che,

¹⁰ ka nau Onesima, kawl bun puma ka inei ta ding hin i kuomah ka ngênpêk a nih.

¹¹ Ama chu inhma khan i ta dingin a ṭangkai naw a, tu ruok hin chu kei le nanga ta dingin a ṭangkai.

¹² Ama ngei, ka lungril ngei hi, i kuomah ka hung tir kîr nâwk a nih:

¹³ ama chu Chanchin Ṭhaa kawl ka bunnaa hin nanga aia rawng a mi bâwlpêk theina dingin ka kuoma inumtir zing ka nuom hle a,

¹⁴ nisienlakhawm, i lungsietna chu lunginsiet luitir ang ni lovin, i thu ang a ni thei lemna dingin i thu naw chun iengkhawm ka thaw nuom nawh.

¹⁵ Sâwt nawtê a ṭhe che hi kumkhuoa ama chu i nei sawngna ai a ni lem rawi mawh;

¹⁶ ama chu suok ang ni lova, suok nêka ṭha, unau dittak ang lemin ka ta dingin dittak a ni bîk a, nanga ta ding lem chun tisaa le Lalpaa chun a va ni nâwk zuol âwm de!

¹⁷ Chuongchun, ruola i mi ngai chun keia angin ama hi lo lâwm la.

¹⁸ Chun, i chungah thil suksuolin amanih, bat dâm amanih a nei chun keia batah ruot rawh.

¹⁹ Kei Paulain keima kut ngeia ka ziek a ni hi; keiin thung pêk ka tih, ka kuoma nangma ngei khawm în batzie hril che lem chu ka ni nawh.

²⁰ Anih, unaupa, nanga leiin Lalpaa chun mîn lâwmtir la, Kristaa chun ka lungril sukhar rawh.

²¹ Ka hril nêka nasa lem hmanin thâwng i tih ti ka hriet leiin, i awi ringin i kuomah ka ziek a nih.

²² Iengkhawm ni sienla, chu chau chu thaw lovin, tlungin ding khawm mi lo buotsaipêk bawk la, in ṭawngṭainahai leiin in kuomah pêk ka ni ding a nih ti ka ring si a.

Inthlâna thu

²³ Epaphra, Krista Isua ka intângpuipa hin chibai a bûk che:

²⁴ ka sinthawpui Marka hai, Aristarka hai, Dema hai, Luka hai khawmin chuong ang bawkin an bûk che.

²⁵ Ei Lalpa Isu Krista lunginsietna in thlarau kuomah um raw se. Amen.