NEHEMIA 8 - Pathien Lekhabu Inthieng (BSI)

Ezrain mipuihai kuomah Dân a tiem

¹ Chun, mi po po chu lungril hmunkhatin Tui kawtkhâr zâwn hmun lienna laia chun an fe khâwm a; chun, lekhaziektu Ezra chu Lalpain Israelhai zâwm dinga thu a pêk Mosie Dân bu chu hung chawi dingin an hril a.

² Chuongchun, thla sarina, ni khat niin thiempu Ezra chun pungkhâwmhai nutling, patling le a hrethiem thei chin po po hmaa chun Dân chu a hung chawi a.

³ Chutaka mi chu Tui kawtkhâr hmazâwn hmun lienna laia chun nutling, patling le a hrethiem thei chinhai lai zîngtienga inthawkin sûn chenin a tiem a; mi po po chun Dân bu thua chun an na an sit ṭhuop el a.

⁴ Chun, chuong ang dinga an siem hrim thing dawkân insânga chun lekhaziektu Ezra chu a ngîr a, a sir changtienga chun Mattithia, Sema, Anaia, Uria, Hilkia le Maaseia hai an ngîr a; chun, a vawitienga chun Pedaia, Misael, Malkija, Hasum, Hasbaddana, Zekaria le Mesullam an ngîr a.

⁵ Chun, Ezra chun mi po po mithmua chun lekhabu ziel chu a hang sût a, (mi po po nêka insânga ngîr a na), chun, a hang sût chun mi po po chu an ngîr ta vawng a;

⁶ chuongchun, Ezra chun Lalpa Pathien ropuitak chu ân pâk a; chun, mipui po po chun an bân pharin, “Amen, Amen,” tiin an lo dawn a; chun, an kûn a, an hmaia hnuoi sikin Lalpa chu chibai an bûk a.

⁷ Jesua, Bani, Serebia, Jamin, Akkub, Sabbethai, Hodia, Maaseia, Kelita, Azaria, Zojabad, Hanan, Pelaia, Levi mihai chun mipuihai kuomah Dân an hrilfie a: mipuihai chu an ngirhmuna chun an um zing a.

⁸ Chun, Lekhabu Pathien Dân bua mi chu fietakin an tiem a; a umzie an hrilfie a, chuongchun, an tiem chu an inhriettir pei a.

⁹ Chun, ram awptu Nehemia le thiempu le lekhaziektu ni fâwm Ezra le mipuihai inchûktirtu Levi mihai chun mipui po po kuoma chun, “Vawisûn ni hi Lalpa in Pathien ta dinga ni inthieng a nih; lungriemin thlâk naw sienla cheu, ṭap khawm ṭap bawk naw ro,” an ti a. Dân thu chu an hrietin mipui po po chu an ṭap an ṭap el si a.

¹⁰ Chuongchun, ama chun an kuomah, “Fe unla, a thâu thâu fa unla, a thlum thlum dâwn unla, iengkhawm buotsai nei lohai ta dingin chanpuol inphur unla, vawisûn ni hi ei Lalpa ta dinga ni inthieng a ni hi; lungngaiin um naw ro, Lalpaa lâwmna chu in hrâtna a ni si a,” a ta.

¹¹ Chuongchun, Levi mihai chun, “To ṭawk ṭawk ro khai, vawisûn hi ni inthieng a ni si a; lungngai khawm lungngai nuom naw ro,” tiin, mipui po po chu an sukto ta ṭhuop el a.

¹² Chuongchun, thu a hrilfie chu an hrietthiem leiin mipui po po chu fa ding dâmin, dâwn ding dâmin, mi dang chanpuol thawn ding dâmin, hlimtaka um ding dâm chun an ṭîn ta vawng a.

Sâwlbûk ruoiṭhe

¹³ Chun, a ni hni ni chun sûngkaw tinrênga a luhai dâm, thiempuhai dâm, Levi mihai chu Dân thu inchûk ding bawk chun lekhaziektu Ezra kuoma chun an fe khâwm a.

¹⁴ Chun, Lalpain Mosie hmanga zâwm dinga thu a pêk dâna chun thla sarina ruoiṭhe laia Israel mipuihai sâwlbûka an um ding thu le,

¹⁵ an ziek anga, “Tlângah fe unla, oliv kauhai, oliv hlêm kauhai le inhmui kauhai, intûm kauhai dâm, thing lien taktak kauhai chu sâwlbûk bâwlna dingin va la ro,” tiin an khuo po poa le, Jerusalem khuoa chun an hrildar ding thu le, puong vêl ding a ni thu dâm chu an tiem a.

¹⁶ Chuong ang chun mipuihai chu an va fe a, mi po poin an in chunghaia dâm, an kawthaia dâm, Pathien in kawta dâm, Tui kawtkhâr hmun lienna laia dâm, Ephraim kawtkhâr hmun lienna laia dâm sâwlbûk an bâwl seng a.

¹⁷ Chun, sala suok pungkhâwmhai po po chun sâwlbûk an siem a. Sâwlbûkhaia chun an um a; Nun naupa Josua chena inthawk tah, Israel nauhai chun chuong ang lâwm chun an la thaw ngai naw a. Chuongchun, lâwmna nasatak a hung um ta a,

¹⁸ ni tin a ṭantir nia inthawka a tâwp chenin Pathien Dân bua mi an tiem bawk a. Ruoiṭhe chun ni sari an aw a; chun a ni riet ni chu thupêk anga a ṭumṭiekna ni chu a nih.