NEHEMIA 13 - Pathien Lekhabu Inthieng (BSI)

Nehemia thil siemṭhathai

¹ Chu ni chun mipui na hrieta chun Mosie lekhabu an tiem a; chutaka chun Ammon mihai le Moab mihai chu Pathien mihai inkhâwmnaa chun ieng lai khawmin an ṭhang ve dêr ding a ni nawh ti hi a chuong a;

² Israel thlahai bei le tuia tuok lo a, anni ṭawngsie inphur dinga Balaam an ruoi lei khan; nisienlakhawm, ei Pathien chun ṭawngsie chu malsâwmnaah ân changtir ta lem a.

³ Chun, Dân chu an hang ngai zo chun Israel mihai laia inthawk chun anni chawkpawltu mipuihai chu an suktum ta a.

⁴ Chu hma chun kan Pathien in pindanhaia hotu dinga ruot thiempu Eliasib, Tobia tieng mi chun

⁵ kha hmaa Levi mihai, hlasaktuhai, kawtkhâr vêngtuhai chanvo, beiphit thilinhlân dâm, riminhnik dâm, bûr le bêlhai, bu sâwma pakhat dâm, uoin le hriek le thiempuhai ta ding a thêna thên thilinhlânhai an siena hlak pindan lientak Tobia ta ding chun a buotsaipêk a.

⁶ Nisienlakhawm, chuong thil po pohai um lai chun Jerusalem khuoah ka um naw a; Babulon lal Artazerzia kum sâwmthum pahni ân lal kumin lal kuoma chun ka fe a nih, ni ieng zât amani hnunga chun phalna ka hni nâwk a;

⁷ chun, Jerusalem khuoah ka va fe a, Pathien in inhuonna tuolsûng laia chun pindan buotsaipêka Tobia ta dinga Eliasab thil ṭha naw lo thaw chu ka hriet ta a.

⁸ A mi suklungninaw êm êm el a; chuleiin, Tobia in sûng thuomhnaw po po, chu pindana inthawk chun ka the suok vawng a.

⁹ Chun, thu ka pêk a, pindanhai chu an inthiel fai a; chuongchun, Pathien in bûr le bêlhai chu beiphit thilinhlânhai le riminhnikhai le chun ka lâklût nâwk a.

¹⁰ Chun, Levi mihai chu chanvo pêk an ni naw leiin, Levi mihai le hlasaktuhai chu mâni lo tieng sengah an tlândar ta ti ka hriet nâwk ta bawk a.

¹¹ Chuongchun, rorêltuhai chu ka khak a, “Ieng dinga Pathien in hi thlathlam a ni zing el am a ni leh?” ka ti a. Anni chu ka ko khâwm vawng a, an hmun sengah kân umtir nâwk a.

¹² Chuongchun, Juda mihai po po chun, bu sâwmapakhat dâm, uoin dâm, hriek dâm thawlâwm sie khâwmnaa chun an hung lâk khâwm tâwl a.

¹³ Chun, thiempu Selemia le lekhaziektu Zadok le Levi mihai laia mi Pedaia hai chu thawlâwm sie khâwmnahai hotu dingin ka siem a, anni ṭhangpuitu ding chun Mattania nau Zakkur naupa Hanan a um a; ringuma ngai an na; an sinthaw chu an unauhai laia thil sem vêl a nih.

¹⁴ Aw ka Pathien, hi thua hin mi hre zing la, ka Pathien in le a rawngbâwlna dinga ka thil thaw ṭhathai chu thaihmang lul naw rawh.

¹⁵ Chuong lai chun Juda rama chun châwlnia uoin sâwrna khura sir sâwr dâm, buphal hung phur dâm, uoin dâm, grêp dâm, theichang dâm, phurrik tinrêng inphurtir dinga siem sabengtung siem lai mêk dâm ka hmu a; chuong chu châwlniah Jerusalemah an hung phur lût a; fâk ding zawr nihaia chun ân dik nawzie kân hriettir a.

¹⁶ Tura rama mi chutaka chêng vehai khawmin ngahai le thuomhnaw tinrênghai an hung lâk a, châwlniin Juda mihai kuoma le Jerusalemah an zawr a.

¹⁷ Chuongchun, Juda mi lienhai chu ka khak a, an kuomah, “Châwlni sukpawrchea in thil ṭha naw thaw hi ieng am a ni a?

¹⁸ In pi le puhai khawm khan hieng ang hi an thaw a ni naw am a nih? Chun, ei Pathien chun hieng thil ṭhanawhai po po hi ei chunga le hi khaw chunga hin a hung intlungtir tah a ni naw am a nih? Chuong sa sa khawmin châwlni sukpawrchein Israel mihai chungah lunginsenna in lân tlungsatir rawp el hi,” ka ti a.

¹⁹ Chun, châwlni dinga Jerusalem kul kawtkhâr ân thim deu hlek phingleh kawtkhârhai chu khâr dingin thu ka pêk a; chun, châwlni a bo hmakhat chun hawng lo dingin thu ka pêk bawk a; châwlnia thil phur hrim hrim an lâklût nawna dingin ka mihai ṭhenkhat chu kawtkhâr kân vêngtir a.

²⁰ Chuongchun, sumdâwng mihai le thuomhnaw tinrêng zawr mihai chu vawi khat amanih, vawi hni amani chu Jerusalem puotienga chun an riek a.

²¹ Chuongchun, ân dik nawzie chu kân hriettir a, an kuomah, “Iengdinga kul bula riek am in na? Hieng anga in thaw nâwk chun in chungah ka kut thlâk ka tih,” ka ti a. Chu chena inthawk chu châwlni chun an hung nâwk ta naw a.

²² Chun, Levi mihai chu inthien faia, châwlni sukthiengna dinga kul kawtkhâr hung vêng dingin thu ka pêk a. Aw ka Pathien, hi thua khawm hin mi hre zing la, i lunginsietna nasatzie ang peiin mi hla rawh.

²³ Chuong lai chun Juda mi, Asdod nuhmei dâm, Ammon nuhmei dâm, Moab nuhmei dâm nuhmeia neihai chu ka hmu a;

²⁴ an nauhai chu Asdod ṭawngin an ṭawng lem hman hman a, chuonghai ṭawng dân ang chau naw chun Juda ṭawngin an ṭawng thei nawh.

²⁵ Chun, anni chu ka khak tâwl a, ṭawngsie kân phur a, ṭhenkhat lem chu ka vuok a, an sam dâm ka kei phawipêk a, an naunuhmeihai chu chuong naupasalhai chu inneitir lo ding le, chuonghai naunuhmeihai chu an naupasalhai ta dingin amanih, anni ta ding khawma nei lo dingin Pathien sâlin ṭawng kân khâmtir a.

²⁶ “Israel lal Solomon khawm kha hieng thilhaia hin a suol a ni naw am a nih? Chuong sa khawm chun hnam tamtak laia ama ang lal an um naw a, a Pathien mi dit zâwng tak a na, Israel ram po po chungah Pathienin lalah a siem bawk a; nisienlakhawm, ama meu khawm chu ram dang nuhmeiin an suksuol el ta a nih.

²⁷ Chuongchun, ram dang nuhmeihai neia ei Pathien chunga hin thil ṭha nawtak el hi thaw dingin in thu ei zâwm ding am a nih?” ka ti a.

²⁸ Chun, thiempu lal Eliasib nau, Joiada naupa pakhat Horon mi Sanballat mâkpa a na, chuleiin, ka kuoma inthawk chun kân tlânhmangtir ta a.

²⁹ Aw ka Pathien, thiempu nina sin le, thiemputna sin thuthlung le, Levi mihai thuthlung an sukpawrche leiin hre zing tâwl raw khai.

³⁰ Chuong ang chun ram dang mihaia inthawkin ka sukthieng a, thiempu dâm, Levi mihai ta dinga an sinthawna sengah an rawngbâwl dân ding ka ruotpêk a;

³¹ a hun ruot senga thing inhlân ding le thlai thar hmasa tak ta ding dâmin. Aw ka Pathien, a ṭha tiengin mi hre zing rawh khai.