NEHEMIA 11 - Pathien Lekhabu Inthieng (BSI)

Jerusalema umhai

¹ Mipuihai hotuhai chu Jerusalema chun an um a; sâwm laia pakhat pei khawpui inthieng Jerusalema um ding le sâwm laia pakuo khaw danga um dinghai inhrietna dingin, mi dang po chun ṭhum an vâwr a.

² Lungnitaka Jerusalema um dinga inpehai po po chun mipuihai inpâk an hlaw a.

³ Hienghai hi chu rama Jerusalema hotu umhai chu an nih: amiruokchu, Juda rama khuoahai chun, an khuoa mâni chan ding sengah an um a; chuonghai chu Israel mihai, thiempuhai, Levi mihai, temple siehlawhai le Solomon siehlaw thlahai chu an nih.

⁴ Jerusalema chun Juda mi le Benjamin mihai chu an um a. Juda mihai laia mi Perez thlahai laia mi Mahalalel naupa Sephatia, chu naupa Amaria, chu naupa Zekaria, chu naupa Uzzia, chu naupa Athaia le

⁵ Silon mi naupa Zekaria, chu naupa Joiarib, chu naupa Adaia, chu naupa Hazaia, chu naupa Kolhoze, chu naupa Baruk, chu naupa Maaseia.

⁶ Perez thlahai Jerusalema um chu mi huoisen za li, sâwmruk pariet an nih.

⁷ Chun, Benjamin mihai chu hieng hi an nih: Jesaia naupa Ithiel, chu naupa Maaseia, chu naupa Kolaia, chu naupa Pedaia, chu naupa Joed, chu naupa Mesullam, chu naupa Sallu.

⁸ Ama hnunga chun Gabbai hai, Sallai hai, mi za kuo, sâwmhni pariet.

⁹ Chun, Zikri naupa Joel chu an hotu a na; Hassenua naupa Juda chu khaw hotu tak dawttu a nih.

¹⁰ Thiempuhai laia mi; Joiarib naupa Jedai hai, Jakin hai,

¹¹ Pathien in hotu Ahitub naupa Meraioth, chu naupa Zadok, chu naupa Mesullam, chu naupa Hilkia, chu naupa Seraia hai;

¹² an unau, ina rawngbâwltuhai chu, za riet, sâwmhni pahni an nih; chun, Malkija naupa Pas-hur, chu naupa Zekaria, chu naupa Amzi, chu naupa Pelalia, chu naupa Jeroham, chu naupa Adaia,

¹³ le a unauhai, an sûngkaw luhai leh za hni, sâwmli pahni an nih; chun, Immer naupa Mesillemoth, chu naupa, Ahzai, chu naupa Azarel, chu naupa Amasai,

¹⁴ le an unau mi hrât huoisen za, sâwmhni pariet an nih; an hotu chu Haggedolim naupa Zabdiel a nih.

¹⁵ Chun, Levi mihai laia mi: Bunni naupa Hasabia, chu naupa Azrikam; chu naupa Hassub, chu naupa Semaia leh;

¹⁶ Levi mi an ṭhuoituhai laia mi Pathien in puotieng sin enkawltu Sabbethai le Jozabad;

¹⁷ Asaph naupa Zabdi, chu naupa Mika, chu naupa lâwmthu hrila ṭawngṭaina ṭantu tak Mattania le, a unauhai laia a dawttu Bakbukia; Jeduthun naupa Galal, chu naupa Sammua, chu naupa Abda hai.

¹⁸ Khawpui inthienga Levi mi um po po chu za hni, sâwmriet pali an nih.

¹⁹ Chuong naw khawm chu kawtkhâr vêngtu Akkub hai, Talmon hai le, an unauhai kul kawtkhâr vêngtuhai za, sâwmsari pahni an nih.

²⁰ A bâk Israelhai le thiempuhai le Levi mihai chu Juda ram khaw tinah mâni ram sengah an um a.

²¹ Temple siehlawhai ruok chu Ophelah an um a; Ziha le Gispa chu temple siehlawhai hotu an nih.

²² Jerusalem khuoa Levi mihai hotu chu Asaph naupa hla saktuhai laia mi Mika, chu naupa Mattania, chu naupa Hasabia, chu naupa Bania, chu naupa Uzzi a nih; Pathien in tieng sin ngaituotu a nih.

²³ An sûngkaw chungchâng thuah lal thupêk a um a, hlasaktuhai chu ni tina an tlâk tâwk ding ruotpêk ding thu a um bawk a.

²⁴ Juda naupa Zera thlaa mi Mesezabel naupa Pethahia chu mipuihai chungchâng thua iengkima lal aiaw a nih.

Jerusalem puoha umhmunhai

²⁵ Chun, an khuo le an ram thua chun, Juda thlaa mi ṭhenkhathai chu, Kiriath-arba le a khawpera dâm, Dibon le a khawpera dâm, Zekabzeel le a khawpera dâm;

²⁶ Jesuaa le Moladaa le Bethpeleta dâm,

²⁷ Hazarsuala dâm, Beer-sebaa le a khawpera dâm;

²⁸ Ziklaga dâm, Mekonaa le a khawpera dâm;

²⁹ En-rimmona dâm, Zoraa dâm, Jarmuth-a dâm;

³⁰ Zanoaa dâm, Adullama dâm, le an khawpera dâm, Lakis le a rama dâm, Azeka le a khawpera dâm chun an um a. Chuongchun, Beer-sebaa inthawkin Hinnom ruom chenin umhmun an khuor a.

³¹ Chun, Benjamin mihai chu Geba khêl tieng, Mikmas-a dâm, Aija-a dâm, Bethel le a khawperahai dâm:

³² Anathoth-a dâm, Nob-a dâm, Anania-a dâm,

³³ Hazor-a dâm, Rama-a dâm, Gittaim-a dâm,

³⁴ Hadid-a dâm, Zeboim-a dâm, Neballat-a dâm,

³⁵ Lod-a dâm, themthiemhai ruom Ono-a dâm an um a.

³⁶ Chun, Juda rama um hlak Levi mihai pâwl ṭhenkhat chu Benjamin rama chun an ṭhang ta a.