NAMBAR 36 - Pathien Lekhabu Inthieng (BSI)

¹ Chun, Josef sûnghai laia mi Manasse naupa Makir naupa Gilead thlahai pahnam ṭhuoituhai laia mihai chun an hung hnai a, Mosie le hotu Israel mihai ṭhuoituhai hmaa chun thu an hril a,

² “Lalpa chun kan pu chu Israel thlahai chu ṭhum vâwra an hluo ding ram pe dingin thu a pêk a; chun, Lalpain kan pu chu kan naupa Zelophehad hluo ding chu a naunuhmeihai pe dingin thu a pêk a;

³ chun, anni chun Israel thlahai laia mi hnam dang tu nauhai khawm pasala an nei chun, kan pi le puhai ram an hluo chu lâkpêk a, an va ṭhangnahai rama bel ding nîng a ta, chuong ang chun kan ram chanpuola inthawk ṭhe suok hung nîng a ta.

⁴ Chun, Israel thlahai Jubili a hung tlung pha chun an ram chu an va ṭhangna ding taphawthai hnam rama bel nîng a tih; chuongchun, kan pi le puhai hnam rama inthawkin an ram chu lâk hêkin a hung um ding a nih,” an ta.

⁵ Chun, Mosie chun Lalpa thu angin Israel thlahai chu thu a pêk a, “Josef naupasalhai hnam hin an hril dik a nih.

⁶ Zelophehad naunuhmeihai chungchâng thua Lalpain thu a pêk chu hieng ang hin a nih: ‘ṭha an ti taphawt nei hai sienla, amiruokchu, an pahai hnam chanpui laia mi ngei an ni ding a nih,’ tiin.

⁷ Chuongchun, Israel mihai ram chu pahnam dang dang kuomah sawn sawn ni naw nih. Israel mihai chun an pi le puhai hnam ram chu an chang zing ding a nih.

⁸ Chun, Israel thlahai laia rohluotu ding naunuhmei taphawt chu Israel mihaiin an pi le puhai ram an hluo seng theina dingin an pahnam chanpui laia mi ngei nuhmei a ni ding a nih.

⁹ Chuongchun, ram chu hnam dang dang kuoma sawn sawn a ni naw ding a nih. Israel thlahai chun anni ram seng chu an chang ding a ni si a,” tiin.

¹⁰ Chun, Lalpain Mosie chu thu a pêk ang charin Zelophehad naunuhmeihai chun an thaw a.

¹¹ Zelophehad naunuhmei Mahla hai, Tirza hai, Hogla hai,

¹² Milka hai, Noa hai chun an pa unaupa naupasalhai an nei tâwl a, Josef naupa Manasse naupasalhai an nei a, an ram chu an pahnama chun a um zing ta a.

¹³ Hieng hi Lalpain Mosie hmanga Jeriko zâwn Jordan râl Moab phaia Israel thlahai a pêk, thupêkhai le rorêl dânhai chu a nih.