NAMBAR 27 - Pathien Lekhabu Inthieng (BSI)

Zelophehad naunuhmeihai ngênna

¹ Chun, Josef naupa Manasse thla, Manasse naupa Makir, ama nau Gilead, ama nau Hepher naupa Zelophehad naunuhmeihai chu an hung a; a naunuhmeihai hming chu Mahla, Noa, Hogla, Milka le Tirza an nih.

² Intuokna puon in kawtkhârah Mosie le thiempu Eleazar le mi lienhai le pungkhâwm po pohai hmaa chun an va ngîr a,

³ “Thlalêra khan kan pa a thi a, Lalpa thaw dinga pungkhâwm pâwl, Kora pâwla khan a ṭhang ve naw a, nisienlakhawm, ama suol leiin a thi a, naupasal khawm a nei naw a.

⁴ Naupasal nei naw lei elin iengdingin am kan pa hming chu a thlahai laia chun bo el a ta? Kan pa unauhai lai chanvo mi pe ve ro,” an ta.

⁵ Mosie chun an thu chu Lalpa hmaah ân tlun a.

⁶ Lalpa chun Mosie a biek a,

⁷ “Zelophehad naunuhai chu an indik a nih; an pa chanvo chu i pêk ding a nih.

⁸ Chun, Israel mihai kuomah chun, ‘Mi naupasal nei lova a thi chun a ro chu a naunuhmei in pêk ding a nih.

⁹ Nau nuhmei a nei naw chun a ro chu a unaupahai in pêk ding a nih.

¹⁰ Unaupahai khawm a nei naw chun a ro chu a pa unaupahai in pêk ding a nih.

¹¹ Chun, a pain unaupahai a nei naw chun a ro chu a laibung inhnaipui tak pêng in ta, ama chun inkhâwm a tih, chun, Lalpain Mosie thu a pêk angin Israel mihai ta dingin dân thupêk nghet nîng a tih,’ tiin hril rawh,” tiin.

Mosien a hnungthuoltu dingin Josua a ruot

¹² Lalpa chun Mosie kuomah, “Abarim tlânga khin hang fe la, Israel mihai ka pêk ding ram chu hang thlîr rawh.

¹³ Chun, i hang hmu zo chun i unaupa Aron chu a chipuihai kuomah ṭhuoi a ni ang bawkin nang khawm ṭhuoi ni tâng i tih.

¹⁴ Zin thlalêra pungkhâwmhai an chier laia an mithmuah tuia khan mi chawimawi dinga ka thupêk che kala i hel lei khan,” a ta. (Chuong chu Zin thlalêra Kadesa Meriba tuiahai chun a nih).

¹⁵ Chun, Mosiein Lalpa a biek a,

¹⁶ “Lalpa, tisa po po thlarauhai Pathien chun pungkhâwmhai chunga chun hotu ruot sienla,

¹⁷ Lalpa mi pungkhâwmhai chu vêngtu nei lo berâm anga an um nawna dingin an hmaa suok le lût a, anni ṭhuoi suoka ṭhuoi lûttu dingin,” tiin.

¹⁸ Chun, Lalpain Mosie kuomah, “Nun naupa mi lungril neitak Josua chu ṭhuoi la, a chungah i kut innghat la,

¹⁹ thiempu Eleazar le pungkhâwmhai hmaa chun inngîrtir la, an mithmua chun thuneina pe rawh.

²⁰ Chun, Israel mi pungkhâwmhai po poin a thu an âwi theina dingin a chungah i thuneina a ṭhen inhlân rawh.

²¹ Chuongchun, ama chu thiempu Eleazar hmaa chun ngîr a ta, ama chun Lalpa hmaah Urimin thu la pêk a ta, a thuin suok an ta, a thuin lût an ta, ama le Israel mi po pohai, pungkhâwmhai po po leh,” a ta.

²² Mosie chun Lalpa thupêk ang chun a thaw a, Josua chu a ṭhuoi a, Eleazar le pungkhâwmhai po po hmaa chun ân ngîrtir a;

²³ chun, a chungah kut ân nghat a, Mosie hmanga Lalpain a hril ang khan thuneina a pêk ta a.