NAMBAR 2 - Pathien Lekhabu Inthieng (BSI)

An hmun khuorhai le pahnam tin hotuhai

¹ Lalpa chun Mosie le Aron a biek a,

² “Israel mihai chun an sûngkuoa inchikna târ sengin an pâwl thaw dân angin an puon in an zar ding a nih; intuokna puon in ang sengin a vêlin an zar ding a nih.

³ Nisa hung suokna khawsak tieng panga an pâwl tam dân izir ang peia puon in zar dinghai chu Juda pâwlhai nîng an ta; chun, Juda thla puipa ding chu Amminadab naupa Nason nîng a tih.

⁴ A pâwlhai tamzie chu sîng sari sâng li le za ruk an nih.

⁵ Chun, a dawta puon in zartu dinghai chu Issakar chi an ni ding a nih;

⁶ Issakar mihai ṭhuoitu ding chu Zuar naupa Nethanel nîng a tih, a pâwlhai tamzie chu sîng nga sâng li le za li an nih.

⁷ Chun, Zebulun chihai, Zebulun thlahai ṭhuoitu ding chu Helon naupa Eliab nîng a ta;

⁸ a pâwlhai tamzie chu sîng nga sâng sari le za li an nih.

⁹ An pâwl tam dân izir peia Juda mihai an tiemhai chu nuoi khat sîng riet sâng ruk le za li an nih; anni rawi hin hma an ṭhuoi pei ding a nih.

¹⁰ “An pâwl tam dân izir peiin a simtieng pangah Reuben rawihai chu um an ta; an ṭhuoitu ding chu Sedeur naupa Elizur nîng a tih.

¹¹ A pâwlhai tamzie chu sîng li sâng ruk le za nga an nih.

¹² Chun, a dawta zar ding chu Simeon chihai nîng an ta; an ṭhuoitu ding chu Zurisaddai naupa Selumiel nîng a tih.

¹³ A pâwlhai tamzie chu sîng nga sâng kuo le za thum an nih.

¹⁴ Chun, Gad chihai, Gad mihai ṭhuoitu ding chu Reuel naupa Eliasaph nîng a ta;

¹⁵ a pâwlhai tamzie chu sîng li sâng nga za ruk le sâwmnga an nih.

¹⁶ Reuben mihai tamzie chu nuoi khat sîng nga sâng khat za li sâwmnga an nih. Anni hi an dawta suok ding an nih.

¹⁷ “Chuongchun, intuokna puon in chu suok a ta, Levi mihai chu a laiah um an ta; an umna izir peiin a pâwl pâwlin an fe seng ding a nih.

¹⁸ “An pâwl tam dân izir peiin a thlangtieng panga chun Ephraimhai um an ta, An ṭhuoitu ding chu Ammihud naupa Alisama nîng a tih.

¹⁹ A pâwlhai tamzie chu sîng li le za nga an nih.

²⁰ A dawta chun Manasse chi nîng an ta.

²¹ Manasse ṭhuoitu ding chu Pedahzur naupa Gamaliel nîng a tih; a pâwlhai tamzie chu sîng thum sâng hni le za hni an nih.

²² A dawt nâwka chun Benjamin chihai: Benjamin mihai ṭhuoitu ding chu Gideoni naupa Abidan nîng a tih;

²³ a pâwlhai tamzie chu sîng thum sâng nga le za li an nih.

²⁴ Chun, Ephraim mihai tamzie chu nuoi khat sâng riet le za khat an nih. Chun, a dawttu dawt nâwktuah an suok ding a nih.

²⁵ “An pâwl tam dân izir peiin Dan mihai chu a hmârtieng pangah um an ta; Dan mihai ṭhuoitu ding chu Ammisaddai naupa Ahiezer nîng a ta;

²⁶ a pâwlhai tamzie chu sîng ruk sâng hni le za sari an nih.

²⁷ Chun, a dawta puon in zar ding chu Aser chihai nîng an tih: Aser mihai ṭhuoitu ding chu Okran naupa Pagiel nîng a tih;

²⁸ a pâwlhai tamzie chu sîng li sâng khat le za nga an nih.

²⁹ Chun, a dawt nâwkah Naphtali chihai; Naphtali mihai ṭhuoitu ding chu Enan naupa Ahira nîng a ta;

³⁰ a pâwlhai tamzie chu sîng nga sâng thum le za li an nih.

³¹ Dan mihai tamzie chu nuoi khat sîng nga sâng sari le za ruk an nih. Chun, anni hin a pâwl pâwla suokin hnung an dâl pei ding a nih,” tiin.

³² Hieng hi Israel mihai sûngkuo tina mi an tiemhai chu, an tam tieng nuoi ruk sâng thum za nga le sâwmnga an nih.

³³ Levi mihai ruok chu Israel mihai laia tiem an ni ve nawh, Lalpain Mosie thu a pêk ang khan.

³⁴ Chuong ang chun Israel mihai chun an thaw a; Lalpain Mosie thu a pêk ang peiin a pâwl pâwlin an zar a, chun, chuong ang bawkin a chi chiin, a sûngkuo peiin an suok hlak.