NAMBAR 19 - Pathien Lekhabu Inthieng (BSI)

Inthiengnawhai Sukthiengna

¹ Lalpa chun Mosie le Aron a biek a,

² “Hi hi Lalpa thupêk dân chu a nih: Israel mihai chu bâwngla sen, demkailo, hmêlhemlo, ringkawl la bât dêr lo hung kei dingin hril rawh.

³ Thiempu Eleazar pêng i ta, ama chun riebûk puoah ṭhuoi suok a ta, a hmaa chun that a ni ding a nih.

⁴ Thiempu Eleazar chun a kutpârin a thisen chu lâng a ta, intuokna puon in hma tienga chun vawi sari thêng a tih.

⁵ Chun, mi tuin amanih bâwngla chu a mithmuah râwng a ta, a vun dâm, a sa dâm, a thisen dâm, a êk dâm leh râwng a tih.

⁶ Thiempu chun sidar thing le husop le patzai lâng a ta, bâwgla an râwnaa chun a peilût ding a nih.

⁷ Chun, thiempu chun a silfênhai sâwp a ta, insil a ta, chu zoa chun riebûka chun fêng a ta, zântieng chenin thiempu chu thienglo nîng a tih.

⁸ A rawtu khawm chun a silfênhai sâwp a ta, insil a ta, zântieng chenin thienglo nîng a tih.

⁹ Insukpawrchenaw mi pakhatin bâwngla vâm chu la khâwm a ta, riebûk puo hmun faiah sieng a ta; chuonghai chu, suol thaihmangna dinga, Israel mipuihai inthieng nawna sukfaina tui siemna dingin sie ṭhat nîng an tih.

¹⁰ Chun, bâwngla vâm la khâwmtu chun a silfênhai sâwp a ta, zântieng chenin thienglo nîng a tih. Hi hi Israel mihai le hnam dang an kuoma umhai ta dinga kumkhaw dân ding a nih.

¹¹ “Tu ruong khawm themtu chu ni sari thienglo nîng a tih.

¹² Ama chu ni thum ni le ni sari ni chun inthien a ta, thieng ni tâng a tih, amiruokchu, ni thum ni le ni sari nia ân thien naw chun ni sari ni khawm chun thieng la ni naw ni.

¹³ Tukhawma tu ruong khawm a thema ân thien naw chun Lalpa biekbûk a sukpawrche a nih; ama chu Israel mihaia inthawka tuithlâr ding a nih; inthienna tui chu a chunga the lo a ni leiin thieng naw a nih, ân thieng nawna chu a chungah a la um a nih.

¹⁴ “Mi puon inah a thi chun hi hi a dân ding a nih: puon in lût taphawt le puon in sûnga um taphawt chu ni sari thienglo nîng a tih.

¹⁵ Chun, bûrlebêl inhawng a sînnaa sîn lo chu thienglo a nih.

¹⁶ Tukhawmin khawhnâwma kâwlhnâma that amanih, mithi ruong amanih, mihriem ru amanih, thlân amanih a tâwk chun ni sari thienglo a nih.

¹⁷ An thiengnawhai puola suol thâwina vâm chu lâng a ta,

¹⁸ bêlah tuikhur tui leh sung a tih. Chun, mi thiengin husop lâng a ta, tuia chun inchieng a ta, puon in dâm, bûrlebêl po pohai, chutaka mi um po pohai, ru amanih, that ruong amanih, mithi ruong amanih, thlân amanih tâwktuhai chu thêng a ta;

¹⁹ chun, mi thiengin ni thum ni le ni sari niin mi thieng naw chu thêng a ta, ni sari ni chun sukthieng a ta; a silfênhai sâwp a ta, insil a ta, zântieng chun hung inthieng tâng a tih.

²⁰ Mi thienglo, inthien lo ruok chun Lalpa hmun inthieng a sukpawrche leiin ama chu pungkhâwmhai laia inthawka tuithlâr ding a nih; inthienna tuia the lo a na, thienglo a nih.

²¹ Hi hi an ta dinga kumkhaw dân ding a nih; inthienna tuia thea um taphawt chun an silfênhai sâwp an ta, chun, inthienna tui tawk taphawt chu zântieng chenin thienglo nîng a tih.

²² Mi thienglovin a tâwk taphawt chu thienglo ni ve pei a ta; chun, chu tâwktu taphawt chu zântieng chenin thienglo nîng a tih,” tiin.