NAMBAR 18 - Pathien Lekhabu Inthieng (BSI)

Thiempuhai le Levi chihai chanvo

¹ Lalpa chun Aron kuomah, “Nang le i nâupasalhai le in sûngkuo hin hmun inthieng khawhlona maw chu phur in ta; chun, nang le i naupasalhai hin in thiempu nina khawhlona maw chu phur bawk in tih.

² Chun, Levi chi, i pa chi, i unauhaiin an zawm ve che a, i rawng an bâwl theina dingin i kâwl hnaiah inumtir la, amiruokchu, nang le i naupasalhai chu thuinhriettirna puon in bulah in um ding a nih.

³ I sina chun ṭhangpui an ti che a, puon in tieng sin po po chu chang an ta, amiruokchu, hmun inthieng bûrlebêl le maichâm chu hung hnai naw raw hai se, an thi nawna dingin, anni amanih, nang amani khawm.

⁴ Anni chun inkawppui an ti che a, puon in rawngbâwlna po poah intuokna puon in sin chu chang an ta, hnam dang chun an hung hnai ding cheu a ni nawh.

⁵ Nang chun hmun inthieng sin le maichâm sin chu chang i ta; Israel mihai chunga lunginsenna a um nawna dingin.

⁶ Chun, ngai ta, kei hin i unau Levi mihai chu Israel mihai laia inthawkin ka thlang suok a, intuokna puon in rawngbâwl dinga Lalpa kuoma pêk, i ta dinga thilpêk nîng an tih.

⁷ Nang le i naupasalhai hin maichâm le puonzâr sûngtieng in thiempu sin chu thâwng in tih. Chun, nangin rawngbâwl i tih, thiempu sin hi in rawngbâwl sin dingin ka pêk cheu a nih; hnam dang hung inrawl ve phawt chu sukhlum nîng an tih,” a ta.

⁸ Chun, Lalpa chun Aron kuomah, “Ngai ta, kei hin ka ta dinga a thêna thên thilinhlân, Israel nauhai thilinhlânhai po po pumin nang le i naupasalhai ta dingin, kumkhuoa in chanpuol dingin ka pêk cheu a.

⁹ Meia raw mahla thil inthienghai chu i ta nîng a ta; an thilinhlân tinrêng an beiphit thilinhlân dâm, an suol thâwina thilinhlân dâm, an thiemnaw thâwina thilinhlân ka kuoma an hung inhlân ding chenin nang le i naupasalhai puol nîng a tih.

¹⁰ Hmun inthieng takah fâng in ta, pasal po poin fâng in tih; in ta dingin inthieng nîng a tih.

¹¹ Hieng hi i chanpuol nîng a tih: beiphit thilinhlâna an thilpêk, Israel mihai a thêna thên thilinhlân chenin, nang le i naupasalhai le i naunuhmeihai leh kumkhuoa in chanpuolah ka pêk cheu a nih, i ina mi inthieng po po chun fa thei an tih.

¹² Hriek ṭha tak dâm, grêp ṭha tak dâm, bu ṭha tak dâm, ra hmasa tak Lalpa ta dinga an pêk chu ka pêk che.

¹³ An loa ra hmin hmasa tak Lalpa ta dinga an hung lâk chu i ta nîng a ta, i ina mi inthieng po po chun fa thei an ta,

¹⁴ Israelhai thilinhlân po po chu i ta nîng a tih.

¹⁵ Lalpa ta dinga an pêk sul hung kêu hmasa tak chu ran khawm, mihriem khawm, i ta nîng a ta; amiruokchu, naulutîr chu în tlan ding a na, ran thieng naw tê hung pieng thla hmasa tak khawm în tlan ding a nih.

¹⁶ Thla khat a ni chun intlan dinghai chu intlanna man i ruot angin hmun inthienga shekel hmang dân angin, shekel ngaa intlan ding a nih, (shekel chu gera sâwmhni a nih).

¹⁷ Amiruokchu, bâwng pieng thla hmasa tak dâm, berâm pieng thla hmasa tak dâm, kêl pieng thla hmasa takhai chu în tlan ding a ni naw a, an inthieng a nih, an thisen chu maichâmah thêng i ta, Lalpa ta dinga riminhnikah an thâuhai chu meia thilinhlânah i raw ding a nih.

¹⁸ An sa chu i ta nîng a ta, a thêna thên thilinhlân ir le a mal changtieng i ta a ni ang hin.

¹⁹ Thil inthienga thên thilinhlân, Israel mihaiin Lalpa ta dinga an inhlânhai chu in kumkhaw chanpuol dingin ka pêk cheu a nih. Lalpa hmaah nang le i naupasalhai le i naunuhmeihai le chatuon machi thuthlung a nih,” a ta.

²⁰ Lalpa chun Aron kuomah, “An rama chun rochan nei naw ti niu a, anni lai chun chanvo nei naw bawk in tih: Israel mihai laia i chanvo le i rochan chu keima hi ka nih.

²¹ “Levi mihai chu rawngbâwl sin, puon in rawngbâwl sina an sinthaw manah Israel rama sâwmapakhat po po hi ka pêk a nih.

²² Tuta chen chu Israel mipuihai chun intuokna puon in an hung hnai ding a ni nawh; suol maw phurin thi rawi an tih.

²³ Levi mihai ruok hin chu intuokna puon in rawngbâwl sin chu thâwng an ta, anni dân nîng a tih; chun, Israel mihai laiah rochan nei naw ni hai.

²⁴ Israel mihaiin sâwmapakhat Lalpa ta dinga a thêna thên thilinhlâna chu Levi mihai rochan dingin ka pêk a nih; chuleiin, an kuomah, ‘Israel mihai lai rochan nei naw ni hai,’ ka lo ti ta sa hrim a nih,” a ta.

²⁵ Chun, Lalpain Mosie kuomah,

²⁶ “Chuong thua naw khawm chun Levi mihai chu hril la, an kuomah, ‘In rochan dinga Israel mihai sâwmapakhat ka pêk cheu, annia inthawka in dawng pha chun, chu sâwmapakhata sâwma pakhat chu Lalpa kuoma a thêna thên thilinhlân dingin in inhlân ding a nih.

²⁷ Chuongchun, in thên thilinhlân chu hrizâwla bu le i uoin sâwrnaa uoin anga ngai nîng a tih.

²⁸ Chuong ang chun Israel mihai laia inthawka sâwmapakhat in dawng po poa mi chu Lalpa ta dinga thên thilinhlâna dingin in inhlân ve pei ding a nih; chun, chu Lalpa ta dinga thên thilinhlân chu thiempu Aron in pêk ding a nih.

²⁹ In thil dawng po poa mi chu a ṭha tak, ân thieng tak pei Lalpa kuomah thên thilinhlânah in inhlân ding a nih.

³⁰ Chuleiin, an kuomah, Chutaka a ṭha tak in thên pha chun Levi mihai hrizâwla hung le uoin hung tlung anga ngai nîng a tih.

³¹ Khâwlâi hmuna khawm fa thei in tih; nangni le in sûnghai khawma, intuokna puon ina in rawngbâwl man a ni si a.

³² A ṭha tak in thên chu a suol maw phur naw ti niu a, Israel mihai thil inthieng chu sukpawrche naw ti niu a, in thi naw ding a nih,’ ti rawh,” a ta.