NAMBAR 14 - Pathien Lekhabu Inthieng (BSI)

Lalpa chunga mipui an hel thu

¹ Chuongchun, a pungkhâwmhai po po chu râwl insuo meuin an ṭap a; chu zân chun mipuihai chu an ṭap an ṭap el a.

² Israel mi po po chu Mosie le Aron chunga chun an chier a; a pungkhâwmhai po po chun an kuomah, “Aigupta rama khan lo thi law law kha ni ta lem inla aw! Annawleh, thlalêrah hin lo thi ta lem el inla aw!

³ Ieng dinga kâwlhnâma thi el dinga Pathienin hi rama hi mi ṭhuoi am a ni aw? Ei nuhmei ei nau le tehai hlak chu man el ding an ni âwm si a. Aigupta rama kîr nâwk el hi eini ta dingin a ṭha lem a ni naw am a nih?” an ta.

⁴ Chuongchun, an inbiek tâwl a, “Hotu siem ei tiu khai, Aigupta ramah kîr nâwk el ei tiu,” an ti a.

⁵ Chuongchun, Mosie le Aron chu Israel mipui pungkhâwm po pohai hmaa chun an bawkkhup a.

⁶ Chun, Nun naupa Josua le Jephunne naupa Kaleb, ram enthlatuhai laia ṭhang vehai chun an puonhai an keithlêr a;

⁷ Israel mipui pungkhâwm po pohai kuoma chun, “Enthla dingin kan va fang suok ram chu ram ṭhatak a nih.

⁸ Ei chunga hin Lalpa a lâwm chun, chu rama chun mi ṭhuoi a ta, mi pêng a tih; nênêtui le khuoizu luongna ram chu.

⁹ Lalpa chungah hel naw phawt el unla, chu rama mihai khawm chu ṭi hlek naw ro, ei bu ding an ni el annâwm, an inhumhimna chu teplo mei mei a nih; Lalpa chu ei kuomah a um annâwm; anni chu ṭi naw ro,” tiin an hril a.

¹⁰ Nisienlakhawm, a pungkhâwmhai po po chun lunga dêng an rawt a. Chuongchun, Lalpa ropuina chu intuokna puon inah Israel mi po po hmaa chun a hung inlang a.

¹¹ Chuongchun, Lalpain Mosie kuomah, “Hieng mipuihai hin ieng chen am mi ngainêp an ta, anni laia inchikna ka thaw hlak sa khawm ieng chen am mi ring lovin an um ding a na? Hriin hrem ka ta, suklungzîng ka tih;

¹² nangmaa hin an nêka ropui le thilthawthei lem hnam inngir ka tih,” a ta.

¹³ Mosie ruok chun Lalpa kuomah, “Aigupta mihaiin hre pal rawi an tih; hieng mipuihai hi ṭawng inkhâma a tiem rama chun i thilthawtheinaa i ṭhuoi suok an ni si a;

¹⁴ hi rama mihai hi hril an ta; hieng mipuihai lai hin i um ti an hriet ta a; hmaisan meuin an hmu ta si che a; i sûm chu an chungah a um hlak a; chun, sûnah sûmngîr, zânah meiin an hma i ṭhuoi hlak si a.

¹⁵ Hieng mipuihai hi ṭum khata i sukhlum vawng chun i hming inthang zie hretu hnamhai chun,

¹⁶ ‘Lalpa chun hieng mipuihai hi ṭawng inkhâma a tiem rama chun a ṭhuoi thei naw leiin thlalêrah a sukhlum a nih,’ tiin hril rawi an tih.

¹⁷ Hieng anga i lo hril ta lei khan i thilthawtheina chu sukbutling hrâm dingin ka hung ngên che a nih.

¹⁸ ‘Lalpa chu lung inuoitak, zainêmna hau, rîtlonahai le bawsietnahai ngaidam hlak, thiemlo changhai insuoktir el ngailo, pahai rîtlona leia nauhai, nauhai nau nâwk chen, suon thumna le suon lina chen khawma hrem hlak a nih,’ ti kha.

¹⁹ I zainêmna a nasat ang ngei le, Aigupta rama inthawka tu chena i ngaidam ang hin mipuihai rîtlona hi ngaidam ta khai,” a ta.

Israelhai chunga Pathien hremna

²⁰ Chun, Lalpa chun, “I thu ang chun ngaidam ka tih;

²¹ amiruokchu, ka hring zing ang le Lalpa ropuinain hnuoi pumpui a la suksip vawng ding ang bawkin thu ka tiem,

²² Aigupta ram le thlalêra ka ropuina le ka thilmak thawhai hmua, chuongsa khawma vawi sâwm zet mi la fie a, ka thu la pawm lo mi po pohai hin,

²³ an thlatuhai kuoma inkhâma ram ka tiem chu hmu naw tawp an ta, anni laia mi ngainêptu hrim hrim khawma hmu bawk naw ni hai.

²⁴ Ka siehlaw Kaleb ruok hi chu, lungril danglam puta titakzeta a mi zui leiin, a va fena rama chun ṭhuoi ka ta, a thlahai chun hluong an tih.

²⁵ Tuhin, Amalek mihai le Kanaan mihai chu ruoma chun an um a, zinga khin kir nâwk unla, Tuipui Sen lampui tieng thlalêrah lût ro,” a ta.

²⁶ Lalpa chun Mosie le Aron a biek a,

²⁷ “Hieng mi rilo pungkhâwmhai, ka chunga chier hlakhai hi ieng chen am dâwng ka ti aw? Israel mipuihai chierna, ka chunga an chiernahai chu ka hriet deh.

²⁸ An kuomah, ‘ka hringna sâlin ka hril a nih, ka na hriet ngeia in hril angtakin in chungah thâwng ka ta; in ruonghai chu thlalêra hin um a ta;

²⁹ nangni laia mi tiem ta sa po po, kum sâwmhni chen chungtieng mi ka chunga chierhai po po chu,

³⁰ bân phar meua, Inumtir ka ti cheu, ka tina rama chun Jephunne naupa Kaleb le Nun naupa Josua chau naw chu lût naw tawp in tih.

³¹ Amiruokchu, man el ding nîng an ta, in iti in nau le tehai ruok hi chu ṭhuoi lût ka tih, in dit naw ram chu hluong an tih.

³² Nangni ruok chu in ruonghai chu hi thlalêra hin um a tih.

³³ In nauhai chu thlalêrah kum sâwmli intawi intawi an ta, thlalêra in ruong hai a riral hmakhat chun in ringum nawna lei chun tuor an tih.

³⁴ Ram in va enthlâk ni zât; ni sâwmli chu, ni khat aiah kum khat pei, kum sâwmli sûng zet in bawsietna chu tuor phâng in ta, chuongchun, ka lungni nawzie hi hre tâng in tih.

³⁵ Kei Lalpa hin mi rilo pungkhâwm, kei mi dodâla pungkhâwmhai chungah hi hi thâwng ka tih ka lo ti ta a; hi thlalêra hin bohmang an ta, chutaka chun thîng an ta, Lalpain a tih,’ ti ro,” tiin.

Enthlatu rilohai thina

³⁶ Chun, ram enthla dinga Mosiein a tir, hung kîr nâwk a ram chanchin a ṭha naw tienga hung hril a, a chunga pungkhâwmhai inchiertirtu,

³⁷ ram a ṭha naw tienga hung hriltuhai chu Lalpa hmaah hriin an thi ta a.

³⁸ Ram enthla dinga fe Nun naupa Josua le Jephunne naupa Kaleb ruok chu an thi ve naw a.

Hormaa Israelhai hneha an um thu

³⁹ Mosiein chuong thuhai chu Israel mihai po po chu a hril a; chuongchun, mipuihai chu an lungngai ta hle el a.

⁴⁰ Chuongchun, zîngkâr an tho a, tlâng sîpa chun an hang fe a, “Ngai ta, hi kan hung a nih, Lalpain a mi tiemna hmuna chun fêng kan tih, kan lo suol tah a nih,” an ta.

⁴¹ Chun, Mosiein, “Tluongtlungna ni naw ni ti hriet zing sain iengdinga Lalpa thupêk in bawsiet ding am a na?

⁴² Nangni lai Lalpa a um si naw a, hmêlmahai lo that el dingin hang fe naw ro.

⁴³ In hmaa khin Amalek mihai le Kanaan mihai an um a na, kâwlhnâma sâthlum ni el in tih. Lalpa chu in nghatsan tâk leiin nangni lai Lalpa chu um naw ni,” a ta.

⁴⁴ Nisienlakhawm, tlâng sîpa chun fe an tum ṭâl a; amiruokchu, Lalpa thuthlungna bâwm le Mosie chu bûka inthawk chu an suok ve nawh.

⁴⁵ Chuongchun, chu tlânga um Amalek mihai le Kanaan mihai chu an hung thla a, an thaw a, Horma chenin an hnawt a, an vuokthlûk rum el a.