NAMBAR 13 - Pathien Lekhabu Inthieng (BSI)

Enthlatu sâwmpahni Kanaan tieng an tir

¹ Chun, Lalpain Mosie a biek a,

² “Israel mihai ka pêk Kanaan ram va enthla dingin mihai tir rawh; an pahnam tina mi, an ṭhuoituhai laia mi pakhat pei i tir ding a nih,” a ta.

³ Chuongchun, Mosie chun Paran thlalêra inthawk chun Lalpa thupêk angin ân fetir tâwl ta a; an rêng chun Israel mihai laia ṭhuoitu seng an nih.

⁴ Hieng hi an hming a nih. Reuben hnama mi Zakkur naupa Sammua.

⁵ Simeon hnama mi Hori naupa Saphat.

⁶ Juda hnam laia mi Jephunne naupa Kaleb.

⁷ Issakar hnama mi Josef naupa Igal.

⁸ Ephraim hnama mi Nun naupa Hosea.

⁹ Benjamin hnama mi Raphu naupa Palti.

¹⁰ Zebulun hnama mi Sodi naupa Gaddiel.

¹¹ Josef hnam, (Manasse hnam an ti) laia mi Susi naupa Gaddi.

¹² Dan hnama mi Gemali naupa Ammiel.

¹³ Aser hnama mi Mikael naupa Sethur.

¹⁴ Naphtali hnama mi Vophsi naupa Nahbi.

¹⁵ Gad hnama mi Maki naupa Geuel.

¹⁶ Hieng hi ram enthla dinga Mosiein a tirhai hming chu a nih. Nun naupa Hosea chu Mosie chun Josua tiin a thleng a.

¹⁷ Chuongchun, Mosie chun Kanaan ram enthla dingin anni rawi chu a tir a, an kuomah, “Simtieng fe phawt unla, tlângram tieng chun fe pei unla.

¹⁸ ram chu ieng ang am a nih ti dâm, chuonga chêng mipuihai chu an hrât le hrât naw dâm, an tlâwm le an tam dâm,

¹⁹ an umna ram chu a ṭha le ṭha naw dâm, an umna khuohai dâm chu ieng ang am a na, puon in el amanih, annawleh kul neiin am a ni ti dâm, chun, ram chu a chênghnâwng le hnâwng naw, a ram upa le upa naw dâm khawm va enthla unla.

²⁰ Chun, huoitakin um unla, chu rama theirahai chu hung phur ro,” a ta. Grêp ra hmasa ra hun lai tak a nih.

²¹ Chuongchun, an hang suok ta a, ram chu Zin thlalêra inthawka Hamath lûtna Rehob chenin an enthlâk vawng a.

²² Simtienga chun an hang fe phawt a, Hebron an va tlung a, chutaka chun Anak thlahai, Ahiman mihai, Sesai mihai, Talmai mihai an um a, (Hebron chu Aigupta rama Zoan inngîr hma kum saria inngîr tah a nih).

²³ Chun, Eskol ruom an va tlung a, chutaka grêp ra bâwr khat a kâu pumin an sât bawng a, hmawlin mi pahniin an zâwn a; theibufaihai le theichanghai an hâwn bawk a.

²⁴ Chu hmun chu Eskol ruom an ta; Israel mihaiin chutaka grêp bâwr chu an sat thlâk leiin.

²⁵ An ram va enthlâk chu ni sâwmli an thang a, an hung kîr nâwk ta a.

²⁶ Chuongchun, Paran thlalêra Kades a chun Mosie le Aron le Israel mipui po po kuom chu an hung tlung a, chu ram theihai chu an inentir a.

²⁷ Mosie kuomah, “I mi tirna rama chun kan fe a, nênêtui le khuoizu luongna a lo ni ngei el; hi hi a rama thei a nih.

²⁸ Amiruokchu, a rama mi umhai chu mi hrâttak tak el an na, khuohai khawm kul nei, ropuitak tak an nih; chun, Anak thlahai khawm kan hmu bawk a.

²⁹ Amalek mihai chu sim rama chun an um a, Hit mihai, Jebus mihai, Amor mihai chu tlângahai chun an um a; chun, Kanaan mihai chu Mediterranean tuipui pang le Jordan vadung pangah an um,” tiin an hril a.

³⁰ Amiruokchu, Kaleb chun, Mosie hmaa mipui chu a sukto ṭhuop a, “Hang inthawk vak ei tiu khai, hang la el ei tiu, hne ngei ngei ei tih,” a ta.

³¹ Nisienlakhawm, a fepuihai chun, “Hang hne thei tâwl nâwm ei ni ie, eini nêkin an hrât lem si a,” an ti a.

³² Chuongchun, Israel mihai kuoma chun an ram hang enthlâk chu, “Ram enthla dinga kan hei fang chu, a sûnga umhai fa zo hmang a na, chun, a umhai kan hmuhai khawm chu mi âwmkhautak tak el an na;

³³ chutaka chun Anak thlahai, mi lienhai, âwmkhautak tak el kan hmu a, keini chu khâu ang chauin kan inhmu el a nih; anni khawma khâu ang chauin an mi hmu hrim a,” tiin a ṭha naw tiengin an hril a.