NAMBAR 1 - Pathien Lekhabu Inthieng (BSI)

Sinai tlânga Israelhai tiemna

¹ Aigupta rama inthawka an hung suok kum hni kum, thla hnina, ni khat ni chun, Sinai thlalêra intuokna puon inah Lalpain Mosie a biek a,

² “Israel mi pungkhâwmhai po po chu a chi chiin, a sûngkuo kuoin, an hming indawt dân ang peiin pasal po po tiem vawng rawh.

³ Kum sâwmhni chin chungtieng Israelhai laia mi râl kâpa fe thei chin chu Aron le nangin a pâwl pâwlin in tiem vawng ding a nih.

⁴ I kuomah hnam tin laia mi pakhat, sûngkaw puipa an um pei ding a nih.

⁵ Hieng hi i kuoma um ding hai hming chu a nih. Reuben hnama mi Sedeur naupa Elizur.

⁶ Simeon hnama mi Zurisaddai naupa Selumiel.

⁷ Juda hnama mi Amminadab naupa Nason.

⁸ Issakar hnama mi, Zuar naupa Nethanel.

⁹ Zebulun hnama mi Helon naupa Eliab.

¹⁰ Josef thla, Ephraim hnama mi Ammihud naupa Elisama. Manasse hnama mi Pedahzur naupa Gamaliel.

¹¹ Benjamin hnama mi Gideon naupa Abidan.

¹² Dan hnama mi Ammisaddai naupa Ahiezer.

¹³ Aser hnama mi Okran naupa Pagiel.

¹⁴ Gad hnama mi Deuel naupa Eliasaph.

¹⁵ Naphtali hnama mi Enan naupa Ahira.

¹⁶ Hienghai hi mipuihai laia thlang, an pahnama ṭhuoitu, Israel sûngkuo puipahai chu an nih,” tiin.

¹⁷ Chuongchun, Mosie le Aron chun chuong an hming lama umhai chu an ṭhuoi a,

¹⁸ mipui po po chu thla hnina, ni khat ni chun an ko khâwm vawng a, a chi chiin a sûngkuo kuoin, an hming indawt dân ang peiin kum sâwmhni chin chungtieng po po chu an thlatuhai hming an târlang a.

¹⁹ Lalpain Mosie thu a pêk angin Sinai thlalêra chun a tiem ta a.

²⁰ Israel naupa upatak Reuben thla suonhai chu a chi chiin, an pahnam hnamin, an hming indawt dân ang peiin, pasal kum sâwmhni chin chungtieng, râl kâp thei chin,

²¹ Reuben thla po po chu sîng li sâng ruk le za nga an nih.

²² Simeon thla suonhai chu a chi chiin, an pahnam hnamin, an hming tam ang peiin pasal kum sâwmhni chin chungtieng, râl kâp thei chin,

²³ Simeon thla po po chu sîng nga sâng kuo le za thum an nih.

²⁴ Gad thla suonhai chu a chi chiin, an pahnam hnamin, an hming tam dân ang peiin kum sâwmhni chin chungtieng, râl kâp thei chin,

²⁵ Gad thla po pohai chu sîng li sâng nga za ruk le sâwmnga an nih.

²⁶ Juda thla suonhai chu a chi chiin; an pahnam hnamin, an hming tam dân ang peiin kum sâwmhni chin chungtieng, râl kâp thei chin,

²⁷ Juda thla po pohai chu sîng sari sâng li le za ruk an nih.

²⁸ Issakar thla suonhai chu, an chi chiin, an pahnam hnamin, an hming tam dân ang peiin, kum sâwmhni chin chungtieng, râl kâp thei chin,

²⁹ Issakar thla po pohai chu sîng nga sâng li le za li an nih.

³⁰ Zebulun thla suonhai chu a chi chiin, an pahnam hnamin, an hming tam dân ang peiin, kum sâwmhni chin chungtieng, râl kâp thei chin,

³¹ Zebulun thla po pohai chu sîng nga sâng sari le za li an nih.

³² Josef thla laia mi Ephraim thla suonhai chu a chi chiin, an pahnam hnamin, an hming tam dân ang peiin kum sâwmhni chin chungtieng, râl kâp thei chin,

³³ Ephraim thla po pohai chu sîng li le za nga an nih.

³⁴ Manasse thla suonhai chu a chi chiin, an pahnam hnamin, an hming tam dân ang peiin, kum sâwmhni chin chungtieng, râl kâp thei chin,

³⁵ Manasse thla po pohai chu sîng thum sâng hni le za hni an nih.

³⁶ Benjamin thla suonhai chu a chi chiin, an pahnam hnamin, an hming tam dan ang peiin, kum sâwmhni chin chungtieng, râl kâp thei chin ,

³⁷ Benjamin thla po pohai chu sîng thum sâng nga le za li an nih.

³⁸ Dan thla suonhai chu a chi chiin, an pahnam hnamin, an hming tam dân ang peiin, kum sâwmhni chin chungtieng, râl kâp thei chin,

³⁹ Dan thla po pohai chu sîng ruk sâng hni le za sari an nih.

⁴⁰ Aser thla suonhai chu a chi chiin an pahnam hnamin, an hming tam dân ang peiin, kum sâwmhni chin chungtieng, râl kâp thei chin,

⁴¹ Aser thla po pohai chu sîng li sâng khat le za nga an nih.

⁴² Naphtali thla suonhai chu a chi chiin, an pahnam hnamin, an hming tam dân ang peiin kum sâwmhni chin chungtieng, râl kâp thei chin,

⁴³ Naphtali thla po pohai chu sîng nga sâng thum le za li an nih.

⁴⁴ Chuonghai chu an nih Mosie le Aronin Israel puipa sâwmpahni, sûngkaw puipahai le an tiemhai chu.

⁴⁵ Chuongchun, râl kâp thei chin po po, Israel thla a pahnam hnama kum sâwmhni le a chungtieng po Israel rama mi chu an tiem a;

⁴⁶ an tiemhai po po nuoi ruk sâng thum za nga le sâwmnga an nih.

Biekbûk enkawltu dinga Levi chihai ruota an um thu

⁴⁷ Levi mihai chu an thlatu hnam anga a chi chia tiemnaa chun an ṭhang ve nawh.

⁴⁸ Lalpain Mosie kuomah,

⁴⁹ “Levi chihai chu i tiem ve ding a ni naw a, Israel mihai lai i tiem sa ding a ni bawk nawh;

⁵⁰ Levi mihai chu inhriettirna biekbûk enkawltua le a thuomhnaw po po le chutaka thil um po pohai enkawltu dingin i ruot lem ding a nih; biekbûk le a thuomhnaw po po chu zâwn hlak an ta, enkawl an ta, biekbûk chu a vêlah um ngha hlak an tih.

⁵¹ Chun, biekbûk chu a suok ding po leh Levi mihai chun ṭhiek hlak an ta, chun, biekbûk chu keizar ding a ni po leh, Levi mihai chun keizar hlak an tih, hnam dang a hung inrawl ve taphawt chu sukhlum ding nîng a tih.

⁵² Chun, Israel mihai chun mâni hmun sengah, a pâwl pâwlin an tam dân izir peiin an puon inhai chu zar an tih.

⁵³ Levi mihai ruok chun Israel mi pungkhâwmhai chunga lunginsenna a um nawna dingin inhriettirna biekbûk vêla chun an zar ding a nih. Levi mihai chun inhriettirna biekbûk chu an enkawl ding a nih,” tiin a lo hril ta si a.

⁵⁴ Chuong ang chun Israel mihai chun an thaw a; Lalpain Mosie thu a pêk ang po po chun an thaw ta a.