MIKA 2 - Pathien Lekhabu Inthieng (BSI)

Pasiehai sukrimsituhai chungrikna

¹ An khum laizâwla khawhlona suongtuotuhai le thil ṭha naw ngaituo suoktuhai chu an chung a rik de! Zîngkâra khuo a hung var hin chu chu an thaw hlak a, anni kut thilthawtheina a ni si leiin.

² Mi lohai an inhnar a, an lâkpêk a, inhai an inhnar a, an lâk el bawk a; mi le an sûnghai, mi le an ro chenin an hnuoisie a.

³ Chuleiin, Lalpain hieng ang hin a tih: Ngai ta, hi sûngkaw chunga hin thil ṭha naw ka suongtuo a nih; chutaka inthawk chun in rîng la hmang naw ti niu a, chapotakin fe ta naw bawk in tih; hun ṭha naw a ni ding a ni si a.

⁴ Chu nia chun nangni demin tekhithu hril an ta, ṭap hla lungriemithlâk umtaka inzâwtin, “Rawk vawngin ei um ta a nih, ka mihai chan a sukdanglam a, ka kuoma inthawkin a tâwl hmang tah a ni hi! Hel hmanghai kuomah ei lo a sem dar tah a ni hi,” tîng an tih.

⁵ Chuleiin, Lalpa mihai inkhâwmhai lai chun ṭhum vâwra a, hruia inkhipêktu tukhawm nei naw ti ni.

⁶ “Thu hril naw rawh,” tiin an hril hlak a. Hieng mihai kuoma hin thu hril naw ni hai, hrilsietna chu inkieng naw bawk a tih.

⁷ Aw Jakob sûnghai, Lalpa thlarau chu hnâwdein a um am a nih? Hieng hi a thilthaw am a ni ti a ni dîm a nih? Indiktaka umhai chunga chun ka thu hin thil ṭha a thaw naw am a nih?

⁸ Nisienlakhawm, ka mihai chu tulai hnaia hin hmêlma angin an hung ngîrdawk a nih; indo nuom lo a, râlmuongtaka mi inlawnhaia inthawkin an silfên zakawfuolhai in hlîppêk a.

⁹ Ka mi nuhmeihai chu an in inhawitaka inthawkin in hnawt dawk a, an naupangtêhaia inthawkin ka ropuina chu in lâk hmang sawng a nih.

¹⁰ Tho unla, fe hmang ro; hi hi in châwlna hmun a ni si naw a; sietna nasatak chena sukse hlaktu inthiengnawna chu a um leiin.

¹¹ Mumal neilo le indik nawtaka, “Uoin le zu chungchang thu i kuomah hril ka tih,” tia miin khêl a hril chun hieng mihai zâwlnei hi ni chau a tih.

¹² Aw Jakobhai, in rêngin ko khâwm ngei ka ti cheu a; Israel mi la um sunhai chu ṭhuoi khâwm ngei ka tih; Bozra khaw berâm angin sie khâwm ka ta, ran ruol an hlo petna hmuna um angin; mipui an ni lei chun sa mur mur an tih.

¹³ Nêr thlengtu chu an hmaa chun fêng a ta, nêr thleng an ta, kawtkhâr chenin fe pei an ta, chutaka chun fe suok an tih: chun, an lal chu an hmaa chun fêng a ta, Lalpa chun an hma ṭhuoi a tih.