MIKA 1 - Pathien Lekhabu Inthieng (BSI)

Samaria le Jerusalem ta dinga ṭap hla

¹ Juda lal Jotham, Ahaz le Hezekia hai inlal laia Moreseth mi Mika kuoma Lalpa thu hung tlung, Samaria khuo le Jerusalem chungchâng thu a hmu chu.

² Nangni mipuihai, in rêngin hre unla, aw leihnuoi le a sûnga um po pohai; ngai ro, Lalpa PATHIEN, Lalpa chu a biekin inthienga inthawkin nangni kala in chungthu hretu ni raw se.

³ Ngai ta u, Lalpa chu a hmuna inthawkin a hung suok a, hung ṭum a ta, hnuoi hmun insânghai chu a chîl ding a ni si a.

⁴ Mei bula khuoihlu ang le hmun inṭêna tui inkhaw thla ang elin, tlânghai chu a hnuoia chun intui an ta, vadung ruomhai chu kakintan an tih.

⁵ Hieng po po hi Jakob bawsietna le Israel sûngkuo suolnahai lei a nih. Jakobhai bawsietna chu ieng am a na? Samaria ni lo am a nih? Juda bâwlhmunhai chu ieng am a na? Jerusalem ni lo am a nih?

⁶ Chuleiin, Samaria chu phûla thil se um khâwm angin siem ka ta, grêp huon hmun ang elin; chun, chu hmuna lunghai chu vadung ruom tieng inhlum thlâng ka ta, a lungphûmhai chu suklang ka tih.

⁷ A milem siemfâwmhai po po chu sukkawi hâwp vawng nîng an ta; a nawchizawr manhai chu meia raw hmang nîng a tih, a milemhai po po chu sukbohmang ka tih; nawchizawr mana a lâk khâwm a ni leiin, nawchizawr man bawkin ṭhang an tih.

⁸ Hi hi lei hin ṭap ka ta, khêk rak rak ka ta, ke lâwng le saruokin invâk ka ta, sihalhai angin khêk ka ta, varîngseihai angin inrûm ka tih.

⁹ A hliemnahai chu sukdam thei a ni nawh; Juda ram a tlung ta hiel si a; ka mihai kawtkhâr, Jerusalem meu khawm a tlung a nih.

¹⁰ Gath khuoa chun hril naw unla, ṭap dêr naw ro; Beth-le-Aphra khuoa chun pilvutah inbuol ro.

¹¹ Aw Sapphir mi, saruok le inzaktakin fe hmang rawh; Zaanan mi chu a hung suok nawh; Bethezel ṭapna chun ngîr chankhal a ti cheu.

¹² Maroth mi chun chanṭha chang a nghâkhla hlie hlie el a, Lalpa kuoma inthawka thil ṭha naw chu Jerusalem kawtkhâr bul chena a hung tlung thlâk leiin.

¹³ Aw Lakis mi, tawlailîr chu sakawr hrâta chun bel rawh; ama hi Zion naunu suolna bul a nih, Israelhai bawsietnahai chu nangmaa hin a um a lo ni si a.

¹⁴ Chuleiin, Moreseth-gath kuoma chun inthlana thilpêk i pêk ding a nih: Akzik inhai chu Israel lalhai ta dingin hlêmna nîng a tih.

¹⁵ Aw Maresa mi, nangma neitu ding i kuomah la hung ṭhuoi ka tih; Israelhai ropuina chu Adullam chen rauin hung a tih.

¹⁶ Invâw kawl la, i nau dittakhai lei chun invâw kawl rawh; mulukawl ang elin insukkawl nasa rawh, i kuoma inthawka sala ṭhuoiin an um ta si a.