MATTHAI 8 - Pathien Lekhabu Inthieng (BSI)

Phâr sukdam

¹ Tlânga inthawka a hung ṭumin mipui nasatakin ama an zui ta a.

² Chun, ngai ta, a kuomah phâr a hung a, “Lalpa, i nuom chun i mi sukthieng thei,” tiin chibai a bûk a.

³ Isûn a hang ban a, a them a, “Ka nuom ie, lo inthieng ta rawh,” a ta, kâr lovin a phâr chu a lo inthieng nghâl ta a.

⁴ Chun, Isûn a kuomah, “Tukhawm hril lo dingin fîmkhur raw aw; amiruokchu, thiempu kuomah vân entir la, Mosiein pêk dinga a ruothai kha inhlân rawh, an hriet felna dingin,” a ta.

Sipai za hotu suokpa sukdam thu

⁵ Chun, Kapernaum a lûtin, a kuomah sipai za hotu a hung a,

⁶ “Lalpa, ka naupang a zeng a, inah a zâl zing a, nasataka suknatin a um a nih,” tiin a ngên a.

⁷ Ama chun a kuomah, “Hung ka ta, sukdam ka tih,” a ta.

⁸ Sipai za hotu chun, “Lalpa, ka in sûng i lûtna tlâk a ni naw ie; thu chau hril la ka naupang dam el a tih.

⁹ Kei khawm mi thua um ka na, ka hnuoiah sipaihai an um a; chu mipa kha mipa chu, ‘Fe rawh,’ ka ti leh a fe hlak; mi dang kuoma khawm, ‘Hung rawh,’ ka ti leh a hung hlak, ka suok kuoma khawm, ‘Ahi thaw rawh,’ ka ti leh a thaw hlak,” tiin a dawn a.

¹⁰ Isûn chuong thu chu a hrietin mak a ti hle a, ama zuituhai kuoma chun, “Titakzetin ka hril cheu, Israelhai lai khawm hieng ang lâwma ringna nasa hi ka hmu nawh.

¹¹ Ka hril cheu hi, sak le thlanga inthawkin mi tamtak hung an ta, vân rama chun Abraham hai, Isak hai, Jakob hai kuomah ṭhung an ta;

¹² ram nauhai ruok chu tuol inthima chun hnawt dawkin um an ta; chutaka chun ṭap le harâwt chu um a tih,” a ta.

¹³ Chun, Isûn sipai za hotu kuoma chun, “Fe ta rawh, i ring angin i chungah hung tlung raw se,” a ta. Chuongchun, naupang chu chu dâra chun a lo dam ta a.

Peter tarpinu sukdam thu

¹⁴ Chun, Isu chu Peter ina a lûtin, a nuhmei nu chu khawsika zâlin a hmu a.

¹⁵ Chuongchun, a kut chu a them pêk a, a khawsik chu a bo ta a, chun, a tho a, a rawng a bâwlpêk ta a.

Khawhri iman le damnaw tamtak sukdam thu

¹⁶ Chun, khuo a hung inhnu chun, a kuomah khawhri imanhai tamtak an hung ṭhuoi a; thuin khawhrihai chu a hnawt dawk a, damnaw po po chu a sukdam bawk a:

¹⁷ zâwlnei Isaiin, “Ama ngeiin ei hrâtnawnahai a lâk a, ei natnahai a phur a,” tia a hril kha a hung tlung theina dingin.

Inchûktir ni tumtuhai ta dinga fiena

¹⁸ Chun, Isûn, mipui nasatak a vêla a hmuin râl khingtienga fe dingin thu a pêk a.

¹⁹ Chun, Dân Inchûktirtu pakhat a hung a, a kuomah, “Inchûktirtu, i fena taphawtah zui ka ti che,” a ta.

²⁰ Isûn a kuomah, “Sihalhaiin kuo an nei a, chunglêng vatehai khawmin bu an nei a, Mihriem Naupa ruok hin chu a lu innghatna a nei nawh,” a ta.

²¹ Chun, inchûktirhai laia mi dangin a kuomah, “Lalpa, fea ka pa hung vui hmasa phawt dingin mi phal rawh,” a ta.

²² Nisienlakhawm, ama chun a kuomah, “Mi zui rawh, mithiin anni mithi chu vui raw se,” a ta.

Tuifâwn hal re thu

²³ Chun, lawngah a chuong a, a inchûktirhai chun an zui a.

²⁴ Chun, ngai ta, dila chun thlipui nasatak a hung hrâng a, chuongchun, tuifâwn chun lawng chu a chîm pup pup el a; ama ruok chu a in a.

²⁵ A kuomah an hung a, an keitho a, “Lalpa, mi sanhim rawh, kan bohmang ding annâwm hi,” an ta.

²⁶ Ama chun an kuomah, “Ringna tlâwmhai, iengdinga in ṭi?” a ta. Chuongchun, a tho a, thli le dîl chu a hal a, chun, a hung re ta duok el a.

²⁷ Mihai chun mak an ti hle a, “Hi mipa hi mi ieng am a na, thli le dîl chen khawma a thu an awi hi?” an ta.

Gadarin rama khawhri iman sukdam thu

²⁸ Chun, râl khingtieng Gadarin mihai ram chu a tlungin, khawhri iman pahni, thlâna inthawka hung suokin, an hung intuokpui a; an hrâng bêk a; chuongchun, chu lampuia chun tukhawm an fe thei naw a.

²⁹ Chun, ngai ta, anni chun, “Pathien Naupa, nang le keini ieng am ei inzâwlna? A hun tlung hmain a mi sawisa dinga hitaka hung am i nih?” tiin an khêk a.

³⁰ Chun, an kâwla inthawka hla reia chun vawk ruol tamtak an tla a.

³¹ Khawhrihai chun, “I mi hnawt dawk chun vawk ruol sûngahai sawn mîn fetir rawh,” tiin a kuomah an ngên a.

³² Ama chun an kuomah, “Fe ta ro am,” a ta. Chuongchun, an hung suok a, vawkhai sûnga chun an va lût a; chun, ngai ta, vawk ruol po po chu râwlah an tlân thla hum hum el a; dîlah an tla lût a, tuia chun an tla hlum ta a.

³³ Chun, a vâituhai chu an tlân a, khuoa chun an fe a, iengkim an hril ta a, khawhri iman chunga thil tlunghai khawm chu.

³⁴ Chun, ngai ta, akhuoin Isu tuok dingin an hung suok a; chun ama an hmu phingleh an rama inthawka suok dingin an ngên ta a.