MATTHAI 6 - Pathien Lekhabu Inthieng (BSI)

Inrûka lunginsiet thilpêk thu

¹ “In thil ṭha thawhai chu mihriem hmaa, an ihmu dinga thaw lo dingin fimkhur ro; chuong naw chun in Pa vâna mi kuomah lâwmman nei naw ti niu.

² Chuongchun, mi kuoma thil i pêkin, mi vervêkhaiin mi inpâk an hlaw theina dinga, inkhâwmna inhaia le, kawtthlêrhaia an thaw hlak angin, i hmaah tawtawrâwt inmûttir naw.

³ Titakzetin ka hril cheu, an lâwmman chu an hmu zo tah. Nang ruok chun mi kuoma thil i pêkin, i kut changtiengin a thaw chu i kut vawitiengin hre naw raw se; i thilpêk chu a rûk a ni theina dingin;

⁴ chuongchun, i Pa a rûka hmutu che chun thung a ti che.

Inrûka ṭawngṭai ding thu

⁵ “Chun, in ṭawngṭaiin, mi vervêkhai angin in thaw ding a ni nawh, mîn an hmu theina dingin, inkhâwmna inahai, kawtthlêr ṭhuom laitakahai ngir puma ṭawngṭai an ngaina si a. Titakzetin ka hril cheu, an lâwmman chu an hmu zo tah.

⁶ Nang ruok chun i ṭawngṭaiin, i pindan sûng rilah lût la, i kawt khâr la, i Pa arûka um kuoma chun ṭawngṭai rawh; chuongchun, i Pa arûka hmutu che chun thung a ti che.

⁷ “Chun in ṭawngṭaiin, Jentailhai angin hril ngai hril mei mei naw ro; an ṭawng tam leiin hrein an ring a nih.

⁸ Chuongchun, anni angin um naw ro; ama in hni hmain in Pa chun ieng ieng am in pawimaw ti chu a hriet zing a nih.

Lalpa ṭawngṭaina

⁹ “Chuongchun, nangni chu hieng ang hin ṭawngṭai ro: Kan Pa vâna mi, I hming inzaum raw se, I ram hung tlung raw se.

¹⁰ I dit zâwng vâna mîn an thaw angin, hnuoia mîn thaw raw hai se,

¹¹ Nitin kan fâk khawpin bu mi pe la,

¹² Kan chunga thil suksuoltuhai kan ngaidam angin, Nang khawmin kan thil suksuolhai mi ngaidam la,

¹³ Suol dinga thlêmnaa chun mi ṭhuoi lût naw la, Mi suol laka chun mi sanhim lem rawh. “Ramhai, thilthawtheinahai, ropuinahai, chatuona i ta a ni si a, Amen.

¹⁴ “Mi an bawsiethai in ngaidam chun, in Pa vâna mîn ngaidam vêng a ti cheu.

¹⁵ Nisienlakhawm, mihai in ngaidam si naw chun, in Pain in bawsietnahai ngaidam bîk naw ni.

Bunghei thu

¹⁶ “Bu in nghei pha khawmin, mi vervêkhai angin ngui hmêl put naw ro; anni chun mi mithmua bungheia an inlang theina dingin an hmêl an sukpawr hlak si a. Titakzetin ka hril cheu hi, an lâwmman chu an hmu zo tah.

¹⁷ Nang ruok chun bu i nghei pha i lu sahriek nâl la, i hmai phi rawh;

¹⁸ chuongchun, i Pa arûka um mithmua chau naw chun, mihriem mithmuah bungheiin inlang naw ti ni; chuongchun, i Pa arûka hmutu che chun thung a ti che.

Ro inkhâwl thu

¹⁹ “Hnuoia hângthim le tuiêkin a fâk sietnaah, inruhaiin an verpawpa an inrûknaa hin in ta dingin rohai inkhâwl naw ro.

²⁰ Vânah, hângthim le tuiêkin a fâk siet nawnaah, inruhaiin an verpawpa an inrûk nawnaa chun, in ta dingin rohai siekhâwl lem ro;

²¹ i ro umna taphawtah i lungril khawm a um ding a ni si a.

Varna le Inthimna

²² “Taksa khâwnvar chu mit hi a nih; i mit a var chun i taksa a rêngin var suok a tih.

²³ I mit a se ruok chun i taksa a rêngin inthim vawng a tih. Chuongchun, i sûnga var chu inthim ni sien chu, inthim chu a va nasa awm ngei de!

Taksa lungkhamna

²⁴ “Tukhawmin hotu pahni rawng bâwl kawp thei naw ni hai; pakhat theidain pakhat dit an tih, annawleh, pakhat ṭanin pakhat hmusit an tih. Pathien le sum rawng bâwl kawp thei naw ti niu.

Inlungkhamna

²⁵ “Chuleichun, ka hril cheu hi, ‘Ieng am dâwnin ieng am fa tâng ka ta?’ tiin, in hringna thu le, ‘Ieng am silin bil ka ta aw?’ tiin, in taksa thu lungkham naw ro. Fâkding nêkin hringna a hlu lem a ni naw am a nih? Silfên nêkin taksa khawm a hlu lem a ni naw am a nih?

Pathiena innghat ding a nih

²⁶ “Chunglêng vatehai hi en ta u; bu an tu naw a, an sîk bawk naw a; bu ina khawm an sêklût bawk nawh, nisienlakhawm, in Pa vâna mi chun a châwm si a. Nangni chu anni nêkin nasatakin in hlu lem a ni naw am a nih?

²⁷ Chun, nangni lai tuin am lung- kham leiin mâni dung tieng tawng khata suksâng chuong thei cheu?

²⁸ Chun, silfên thuah iengdinga in lungkham am a na? Ram tûktinpâr inṭhangzie hi ṭha takin ngaituo ro; sin an thaw nawh, pat khawm an kher bawk nawh;

²⁹ nisienlakhawm, ka hril cheu hi, Solomon meu khawm a ropuina po poa ân thuom khan hieng tûktinpâr pakhat tluk khawm hin cheiin a um nawh.

³⁰ Chuongchun, ram hlohna, vawisûn anga hringa, a zînga thuka ti nâwk el ding hman Pathienin chuong ang lâwma a chei chun, aw! nangni ringna tlâwmhai, silfên a pêk lem hman hman ding cheu a ni naw am a nih?

³¹ Chuongchun, ‘Ieng am fâng ei ta?’ ‘Ieng am dâwn ei ta?’ amanih, ‘Ieng silin am um ei ta?’ ti amanih, lungkham naw ro. Jentailhaiin chuong po po chu an zawng hlak a nih.

³² Chuong po po chu in pawimaw ti in Pa vâna miin a hriet zing a nih.

³³ A ram le a felna chu zawng hmasa lem ro; chuongchun, chuong po po chu a pêk sa ding cheu a nih.

³⁴ Chuongchun, a zînga dingin lungkham naw ro, a zîng chun ama ding chu a lungkham fâwm ding a ni si a. Ni khat dingin ni khat rimsik a hun a nih.