MATTHAI 5 - Pathien Lekhabu Inthieng (BSI)

Tlâng chunga a thuhril inṭanna

¹ Chuongchun, mipuihai chu a hmuin tlângah a lâwn a; chun, a ṭhung a, a inchûktirhai a kuomah an hung a;

² chuongchun, thu a hril a, anni ân chuktir a:

³ “Thlaraua pasiea inhriehai chu an hamṭha; vân ram an ta a ni si a.

⁴ “Thlainvaihai chu an hamṭha; thlamuongin an la um ding a ni si a.

⁵ “Zainêmhai chu an hamṭha; hnuoi ro hi an la hluo ding a ni si a.

⁶ “Felnaa phîngṭâma dangchârhai chu an hamṭha; an la tlai ding a ni si a.

⁷ “Mi chunga zângaitheitakhai chu an hamṭha; zângaina an la hlaw ding a ni si a.

⁸ “Lungrila inthienghai chu an hamṭha; Pathien an la hmu ding a ni si a.

⁹ “Inremna siemtuhai chu an hamṭha; Pathien nauhai inbûkin an la um ding a ni si a.

¹⁰ “Felna leia suknawmnatna tuor hnunghai chu an hamṭha; vân ram an ta a ni si a.

¹¹ “Miin keima leia an hal cheu a, an suknawmna cheu a; khêla suol tinrêngin an hêk pha cheu, in la hamṭha ding a nih.

¹² “Lâwm unla, nasatakin hlim ro; vânah in lâwmman a um râwn si a; chuong ang bawkin in hmaa zâwlnei umhai khawm an suknawmna hlak kha.

Khâwnvar le machia inthawka inchûklai

¹³ “Hnuoi machi in nih; nisienlakhawm, machi hin alna lo inhmang ta sien, iengin am sukal nâwk thei a ta? Peihâwna, mihriemhai sir mei mei ding chau naw chun, ienga ding khawmin a ṭha ta nawh.

¹⁴ “Khawvêl var in nih. Tlâng sîpa khaw um chu thuphmang thei a ni nawh.

¹⁵ Mîn khâwnvar sitin leikhâwr hnuoiah an sie ngai nawh; a sienaah an sie lem hlak; chuongchun, in sûnga mi po po a ên hlak.

¹⁶ Chuong ang bawkin in var chu mi mithmuah var raw se; chuongchun, in thilthaw ṭhathai hmûng an ta, in Pa vâna mi chawimawi thei an tih.

Dân hlui le Isu Dân thar chu

¹⁷ “Dân thu amanih, zâwlneihai thu amanih sukbo dinga hung ka ni ring naw ro, sukbo dinga hung ka ni naw a, sukkim dinga hung ka ni lem.

¹⁸ Titakzetin ka hril cheu hi, hnuoi le vân hi a bo hmakhat chun Dân thua sunhâng chite amanih, thaihâng chite amanih, pakhat khawm, bo naw tawp a tih, a rênga a tlung kim hmakhat chun.

¹⁹ Chuongchun, tukhawm hieng thupêk laia pakhat, a chîntak khawm bawsea, chuonga thaw ve dinga mihai inchûktir taphawt chu, vân rama chun mi chîn tak tîng an tih; amiruokchu, tukhawm zâwma inchûktir taphawt chu, vân rama chun mi lien tîng an tih.

²⁰ In felnain Dân inchûktirtuhai le Pharisaihai felna a khûm naw chun vân ramah lût naw tawp in tih ti ka hril cheu a ni hi.

Lungsenna le tuolthatna

²¹ “Tienlaia mihai kuoma chun, ‘tuol i that ding a ni nawh,’ ti le, ‘tukhawm tuolthat chu rorêlna hmabâk zingin um a tih’ an tih ti in hriet tah;

²² kei ruok chun, tukhawm a unau chunga lunginsen taphawt chu rorêlna hmabâk zingin um a tih; chun tukhawm a unau kuoma, ‘Hmangnabopa’ ti taphawt chu rorêlna hmabâk zingin um a tih; chun tukhawm, ‘Invêtpa’ ti taphawt chu Hremhmun meia pei hmabâk zingin um a tih ti ka hril cheu hi.

²³ Chuongchun, maichâm bula i thilpêk în hlân lai taka, i unauin i chungah lungninawna a nei ti i hriet dawk nâwk chun,

²⁴ chutaka maichâm hmaa chun i thilpêk chu mâksan la, fe la, i unau rem zet la, chu hnunga chun i thilpêk chu inhlân rawh.

²⁵ I khingpui chu lampuia in intlawn laiin rem vat rawh; chuong naw chun, i khingpui chun rorêltu inmantir a ti che a, rorêltu chun mi man hotu kuomah pêng a ti che a, intângna inah khum hlau rawi an ti che.

²⁶ Titakzetin ka hril che hi, pawisa khat chena i pêk kim nek hma chun, chutaka inthawk chun suok naw tawp i tih.

Inthiengnawna chu

²⁷ “ ‘I uire ding a ni nawh,’ an tih ti in hriet tah.

²⁸ Kei ruok chun, tukhawm nuhmei dit ena en taphawt chun, a lungrilah a uire zing a nih ti ka hril cheu hi.

²⁹ Chun, i mit changtiengin a suk- thlûk che chun khel dawk la, pei dai rawh; i taksa a puma Hremhmuna peia a um nêkin, i taksa pêng pakhat bo chu i ta dingin a ṭha lem a nih.

³⁰ I kut changtiengin a sukthlûk che chun, tan la, pei dai rawh; i taksa a puma Hremhmuna peia a um nêk chun, i taksa pêng pakhat a bo chu i ta dingin a ṭha lem a nih.

Inmâkna le uiretna

³¹ “Chun, ‘Tukhawm nuhmei ma chun inmâkna lekha a kuomah pe raw se,’ an ti bawk a.

³² Kei ruok chun, tukhawm tlangvâl dit lei ni lova mâni nuhmei ma taphawt chun, ama chu ân uirettir a nih; tukhawm mâk hnung chu nei taphawt chu a uire a nih ti ka hril cheu hi.

Inkhâmna le indikna

³³ “Tienlaia mihai kuoma chun, ‘Khêlin inkhâm naw la, Lalpa kuomah în khâmna chu hlen lem rawh,’ an tih ti in hriet ta bawk a.

³⁴ Kei ruok chun ka ti cheu hi, vânni hrim hrim khâm naw ro, vân sâlin amanih inkhâm naw ro, achu Pathien Lalṭhungpha a ni si a; hnuoi sâl khawmin inkhâm naw ro, achu a ke innghatna a ni si a;

³⁵ Jerusalem sâlin inkhâm bawk naw ro, achu lal ropuitak khawpui a ni si a.

³⁶ I lu sâlin în khâm ding a ni bawk naw a, samzai pakhat khawm i sukvârin, i sukdum thei si naw a.

³⁷ ‘A nih,’ in ti chu ‘a nih,’ ni sienla, ‘A ni nawh’ in ti chu ‘a ni nawh’ ni el raw se, chuonghai bâk chu suola inthawka suok a nih.

Phubalâk thu

³⁸ “ ‘Mit sikah mit, ha sikin ha,’ an tih ti in hriet tah.

³⁹ Kei ruok chun ka hril cheu hi, mi suol khing naw ro. I bieng changtienga ben taphawt che chu a khing tieng khawm dawpêk lem rawh.

⁴⁰ Tukhawmin i kuomah thupawi siemin, i zakuo lâk a tum chun, i puon khawm inlâktir nghâl rawh.

⁴¹ Mêl khat fe dinga phût luitu taphawt che kuoma chun mêl hni fe rawh.

⁴² A hnitu che kuoma chun pe la, i kuoma pûk nuomtu chu nghatsan naw.

Hmangaina le nungchang famkim thu

⁴³ “ ‘I vênghai hmangai la, i hmêlma theida rawh,’ an tih ti in hriet tah.

⁴⁴ Kei ruok chun ka hril cheu hi, in hmêlmahai chu hmangai unla; a suknawmnatuhai cheu chu ṭawngṭaipêk ro;

⁴⁵ in Pa vâna mi nauhai in ni theina dingin; ama chun mi suolhai le mi ṭhahai chunga chun a nisa ân suoktir a, mi fel le mi fel nawhai chunga khawm ruo ân sûrtir hlak a nih.

⁴⁶ A hmangaituhai cheu chau in lunginsiet hin lâwmman ieng am hmûng in ta? Siedâwltuhai khawmin chuong angin an thaw ve a ni naw am a nih?

⁴⁷ chun, in unauhai chau chibai in bûk hin a ieng am in thaw tam bik a? Jentailhai khawmin chuong angin an thaw ve a ni naw am a nih?

⁴⁸ Chuongchun, in Pa vâna mi a ṭhafamkim angin in ṭhafamkim ding a nih.