MATTHAI 3 - Pathien Lekhabu Inthieng (BSI)

Baptistu Johan le a thuhril

¹ Chuong lai chun Baptistu Johan chu, Judai thlalêrah thuhrilin a hung a,

² “Sim ro, vân ram chu a hnai tah,” tiin.

³ Ama chu a nih, zâwlnei Isaiin, “Thlalêra mi khêk rawl chun, ‘Lalpa lamlien buotsai unla, A lampuihai suktlûn ro,’ a tih,” tia a hril kha.

⁴ Chun, Johan chun sanghâwngsei hmul puon a sil a, a kâwng chu savun kâwngkhiin ân khit a; a bu chu khâuṭhikṭhi le ram khuoizu a nih.

⁵ Chu lai chun Jerusalema mi dâm, Juda rama mi po po dâm, Jordan vadung vêla mi po po an suok a, a kuom tieng an fe a;

⁶ an suolhai thupha chawiin Jordan vadungah ama kuomah Baptisma an chang tâwl a.

⁷ Nisienlakhawm, Pharisaihai le Saddukaihai tamtak a baptisma chang dinga hung a hmu phingleh, an kuomah, “Rûl thlahai, lungsenna hung tlung ding hi tlânsan dingin tuin am a kâwk cheu a?

⁸ Chuongchun, sim hming input tlâkin ra ro.

⁹ “ ‘Abraham ei thlatu a nih annawm,’ tiin inngaituo naw ro; Pathienin hieng lunghai hi Abraham thlahai dingin ân ngirtir thei ti ka hril cheu hi.

¹⁰ Tuta inthawk el khawmin thing bul tinah hreipui an sie tah; chuongchun, thing tin ra ṭhaa ra naw phawt chu an phûr a, meiah an pei hlak.

¹¹ Kei chun chu simna dingin tuiin ka baptis hlak cheu a; nisienlakhawm, ka hnunga hung ding chu keia nêkin a ropui lem a, a kekawk chawi tlâk khawm ka ni nawh. Ama chun Thlarau Inthieng le meiin baptis a ti cheu.

¹² A kutin a leipup a chawi a, a hrizâwl zâp fai hieu a ta, a pangah a bû hlûng a ta, a si ruok chu mei rêm thei lovin râw hmang a tih,” a ta.

Isu baptisma changna

¹³ Chu lai chun a kuoma baptisma chang dingin Isu Galili rama inthawkin Jordan vadungah Johan kuomah a hung a.

¹⁴ Johan ruok chun, “I mi baptis ka ṭûl lem si a, ka kuomah i hung lem a ni maw?” tiin khap a tum a.

¹⁵ Nisienlakhawm, Isûn a kuomah, “Tuhin remti hrâm rawh, hieng anga felna po po sukkim hi ei ta dingin a mawi a nih,” tiin a dawn a. Chuongchun, rem a ti ta a.

¹⁶ Chun, Isu baptisma a chang phingleh, tuia inthawk chun a suok nghâl ta a; chun, ngai ta, a ta dingin vân a hung inhawng a, Pathien Thlarau chu vaṭhu anga hung ṭuma a chunga hung fu a hmu a.

¹⁷ Chun, ngai ta, vâna inthawkin râwlin “Hi hi ka Naupa dittak, ka ilâwm bêk bêk chu a nih,” a ta.