MATTHAI 23 - Pathien Lekhabu Inthieng (BSI)

Dân Inchûktirtuhai le Pharisaihai a kâwk

¹ Chun, Isûn mipuihai le a inchûktirhai kuomah thu a hril a,

² “Dân inchûktirtuhai le Pharisaihai chu Mosie ṭhungphaah an ṭhung hlak.

³ Chuleichun, thaw dinga an hril taphawt cheu chu zâwm unla, thaw pei ro, an thilthaw ang ruok chu thaw ve naw ro, hril chu an hril hlak a, an thaw ngai si naw a.

⁴ Phurrik rinumtakhai an siem a, mihai an hnâwk hlak a; anni ruok chun an kutpâr khawmin an tâwk nuom nawh.

⁵ An thilthaw po po chun mihriem hmu dingin a nih an thaw lem hlak; an iengkhat bunhai le khumhai chu an suklien a, an puon hmawrkai an sukbuk hlak a;

⁶ ruoiṭhenaah hmun ṭhatakhai, inkhâwmna inah ṭhungpha ṭhatakhai,

⁷ dâwr hmuna chibai bûkhai, mihaiin, ‘Rabbi’ an itihai an ngaina hlak si a.

⁸ “Nangni ruok chu, ‘Rabbi’, tia koin um naw ro; in inchûktirtu chu pakhat chau a nih; nangni po po chu unau in ni si a.

⁹ Chun, hnuoi chunga hin tukhawm, ‘Pa,’ ti naw ro; in Pa chu pakhat chau a nih, vâna mi khi.

¹⁰ ‘ṭhuoituhai’ tia ko khawmin um naw ro; in ṭhuoitu chu pakhat chau a nih, Krista chu.

¹¹ In laia ropuitak chu in rawngbâwltu a um lem ding a nih.

¹² Tukhawm ân ngaihlu phawt chu tlâwm a ta, tukhawm ân ngaitlâwm phawt chu chawimawiin um a tih.

¹³ “Nisienlakhawm, nangni Dân inchûktirtu le Pharisai vervêkhai, in chung a rik; vân ram lampui chu mihai in khâr pêk si a; nangni hlak in lût si naw a, mi a lût dinghai khawm in inlûttir phal ngai si naw a.

¹⁴ [Nangni Dân inchûktirtu le Pharisai vervêkhai, in chung a rik! Hmeithaihai sum in fâk zo a, mi hlêmna dingin sâwttak tak in ṭawngṭai a; chuleiin, thiemnaw changna nasa nâwkzuol hmûng in tih.]

¹⁵ Nangni Dân inchûktirtu le Pharisai vervêkhai in chung a rik; Saphun pakhat khawm siem dingin tuisuoriet le khawmuol in fe huol si a, chun, chuong anga a hung um phaleh ama chu nangni lethni rauin Hremhmun naupaah in siem hlak.

¹⁶ “Nangni ṭhuoitu mitdel, ‘Tu- khawm Pathien biekin sâla inkhâm po chu iengkhawm a ni nawh; tukhawm Pathien biekina rângkachak sâla inkhâm po chun hlen ding a nih,’ tituhai, in chung a rik!

¹⁷ Nangni mi invêt, mitdelhai, a ieng am a ropui lem a, rângkachak am, Pathien biekin rângkachak sukthiengtu chu?

¹⁸ Chun, ‘Tukhawm maichâm sâla inkhâm po chu iengkhawm a ni nawh, a chunga thilpêk sâla inkhâm po ruok chun hlen ding a nih,’ in ta.

¹⁹ Nangni mitdelhai! A ieng am a ropui lem a, thilpêk am, maichâm thilpêk sukthiengtu chu?

²⁰ Chuongchun, tukhawm mai- châm sâla inkhâm taphawt chun maichâm le a chunga um po po sâlin ân khâm hlak.

²¹ Tukhawm Pathien biekin sâla inkhâm taphawt chun, Pathien biekin le a sûnga um chu sâlin ân khâm hlak.

²² Tukhawm vân sâla inkhâm taphawt chun Pathien ṭhungpha le a chunga ṭhung chu sâlin ân khâm hlak a nih.

²³ “Nangni Dân inchûktirtu le Pharisai vervêkhai, in chung a rik! pudina dâm, mohuri dâm, zira dâm chu sâwma pakhat in pêk hlak a, dân thu pawimaw lem felna dâm, lunginsietna dâm, ringumna dâm chu in ngaitha si hlak; nisienlakhawm, chuong chu a nih in sawnnaw in thaw ding chu, a danghai chu thaw ṭhul chuong lovin.

²⁴ Nangni ṭhuoitu mitdel, thosi thlitfaia sanghâwngsei lem si hlakhai!

²⁵ “Dân inchûktirtu le Pharisai vervêkhai, in chung a rik! no le thlêng puo tieng in sâwp fai a, a sûng ruok chu hlêprûkna le insûm nawnain a sip si a.

²⁶ Nang Pharisai mitdel, no le thlêng sûng tieng chu sâwp fai hmasa rawh, a puo tieng khawm a hung fai theina dingin.”

²⁷ “Dân inchûktirtu le Pharisai vervêkhai, in chung a rik! Thlân nâl vâr, puo tienga mawitaka inlang, a sûng tieng ruok chu mithi ruhai le hmunhnawk tinrênga siphai ang chu in nih in sawnnaw.

²⁸ Nangni khawm chuong ang takin puo tieng chun, mihriem mithmua chun feltakin in inlang hlak, in sûng tienga ruok chun vervêkna le suolnain in sip si a.

²⁹ “Nangni Dân inchûktirtu le Pharisai vervêkhai, in chung a rik! zâwlnei thlân inhai in bâwl a, mi fel thlânhai khawm in cheimawi a,

³⁰ ‘Ei puhai dam lai khan lo um ve inla khawm, zâwlneihai thisen an insuonaa chun ṭhang ve nâwm ei nih,’ in ti hlak a.

³¹ Chuongchun, zâwlneihai thattuhai nau in nih ti in inhriettir a nih.

³² In puhai inkhîna chu suksip nghâl nghâl ro.

³³ Rûlhai, rûl thlahai, Hremhmun rorêlna chu iengtin am pumpel thei in ta?

³⁴ “Ngai ta u, chuleichun, in kuomah zâwlneihai, mi varhai, inchûktirtuhai, ka hung tir ding a nih; ṭhenkhat sukhlum in ta, krawsah hemdêng in tih, ṭhenkhat inkhâwmna inhaiah savun hruiin vuong in ta, khaw tinah suknawmna zui pei in tih.

³⁵ Chuongchun, Abel mi feltak thisena inthawkin Pathien biekin le maichâm inkâra Baraki naupa Zakari in ithat a thisen chen khan, hnuoi chunga mi fel thisen an insuo po po chu nangni chungah la hung tlung thei a tih.

³⁶ Titakzetin ka hril cheu hi, chuong po po chu tulai ruoltharhai chunga hin la tlung a tih.

Jerusalem a ṭapkhum

³⁷ “Aw Jerusalem, Jerusalem! zâwlneihai thattu, i kuoma an hung tirhai lunga lo dêng hlumtu, ârpuiin a têhai a thla hnuoia a awp khâwm angin, i nauhai vawi iengzât am awp khâwm ka tum a! Nisienlakhawm, in nuom si nawh.

³⁸ En ta u, in in chu a ruoka mâksan cheuin a um tah.

³⁹ Ka hril cheu hi, ‘Lalpa hminga hung chu inpâkin um raw se,’ in ti hmakhat chun tuta hnung in mi hmu nâwk ta naw ding a nih,” a ta.