MATTHAI 21 - Pathien Lekhabu Inthieng (BSI)

Jerusalema Isu chawimawia a lût

¹ Chun, Jerusalem an tlung dinga Bethphage khuo, Oliv tlâng chu an tlung chun Isûn a închûktirhai pahni a tir a,

² an kuomah, “In hma zâwna khuoa sawn va fe unla, sabengtung thlung, a kâwla a tê leh hmûng in ta; sût unla, ka kuomah hung kei ro.

³ Tukhawmin in kuomah, iengkhawm an lo hril chun, ‘Lalpain a mamaw a nih,’ tîng in ta; chun, ama chun hung tîr nghâl el a tih,” a ta.

⁴ Zâwlnei baua hieng thu hrila um ta kha a hung tlung theina dingin chuong chu a hung um ta a nih.

⁵ “ ‘En ta, i Lal chu thuhnuoirawltakin, Sabengtung chungah, sabengtungtê chunga ngeia chuongin, I kuomah a hung ding a nih,’ tiin, Zion naunu chu hril rawh,” ti hi.

⁶ Chuongchun, inchûktirhai chu an va fe a, Isûn an kuoma thu a pêk ang ngeiin an thaw a,

⁷ sabengtung le a tê chu an hung kei a, an chunga chun puonhai an pha a, ama chun a chuongpha ta a.

⁸ Chun, mipui laia a tam lemin lampuia chun an puonhai an pha a, mi dangin thinga sâwlhna an sât a, lampuiah an pha bawk a.

⁹ Chun, mipui a hma tienga fe le a zuihai chun, “David naupa kuomah Hosanna! Lalpa hminga hung chu inpâkin um raw se! Achunghnungtaka khin, Hosanna!” tiin an khêk a.

¹⁰ Chun, Jerusalem a lût chun, a khuoin, “Hi mipa hi tu am a na?” tiin an inhnîng sup sup a.

¹¹ Chun, mipuihai chun, “Hi hi zâwlnei Isu, Galili rama, Nazaretha mi chu a nih,” an ta.

Pathien biekin a sukthieng

¹² Chun, Isu Pathien biekina chun a va lût a, biekina iengkhat zawrtuhai le inchawtuhai po po chu a hnawt dawk a, tangka thlengtuhai dawkânhai le vaṭhu zawrhai ṭhungphahai dâm chu a nam thlûkpêk a,

¹³ an kuomah, “ ‘Ka in chu ṭawngṭaina in tîng an tih,’ ti ziek a na, nangni ruok chun suomhmanghai pûkin in siem lem hlak a nih,” a ta.

¹⁴ Chun, Pathien biekina chun mitdelhai le kebaihai a kuomah an hung a, anni a sukdam a.

¹⁵ Nisienlakhawm, thiempu lalhai le Dân inchûktirtuhai chun a thilmak thawhai le, biekina, “David naupa kuomah Hosanna” tia, naupang khêkhai chu an hmuin, an lungninaw bêk bêk a,

¹⁶ a kuomah, Hienghai thu hril hi i hriet am?” an ta. Chun, Isûn an kuomah, “Hre e: ‘Nautêhai le nene ne laihai baua suok chun, Inpâkna i sukṭhafamkim tah,’ ti hi in tiem ngai naw am a nih?” a ta.

¹⁷ Chun, anni chu a mâksan a, khawpuia inthawk chun a suok a, Bethaniah a fe a; chutaka chun a riek ta a.

Theichang kûng ra naw chu

¹⁸ Chun, zîngkâra khawpui tienga a kîr nâwk laiin a phîng a hung ṭâm ta a.

¹⁹ Chun, lam sîra chun theichang kûng a hmu a, a va pan a, a hna chau naw chu iengkhawm a hmu naw a.

²⁰ Chun, a kuomah, “Kumkhawtluongin lo ra ta dêr naw rawh,” a ta. Chun, theichang chu a thêm nghâl el ta a. Chun, inchûktirhai chun chu chu an hmuin, “Iengtiziea theichang hi a thêm nghâl el am a na?” tiin mak an ti hle a.

²¹ Chun, Isûn an kuomah, “Titakzetin ka hril cheu hi, ringna in nei a, in ringhla naw chun, theichang chunga thaw ang chau hi thaw naw ti niu a, hi tlâng kuoma khawm hin, ‘Lo insawn la tuisuorietah lo inpei rawh,’ in ti chun, in ti ang chun lo um a tih.

²² Chun, iengkim ringtaka ṭawngṭaia in hni taphawt chu hmûng in tih,” a ta, a dawn a.

Isu thuneina an indawn

²³ Chun, Pathien biekina a lût hnunga ân chûktir lai chun, thiempu lalhai le vântlâng upahai chu a kuomah an hung a, “Tu thuin am hieng thil hi i thaw a? Tuin am thu a pêk che a?” an ta.

²⁴ Chun, Isûn an kuomah, “Kei khawmin thu bau khat indawn vêng ka ti cheu, chu chu in mi hril chun tu thuin am hieng thilhai hi ka thaw, hril vêng ka ti cheu.

²⁵ Johan baptisma kha khâwlaia mi thu am a na? Vâna mi thu am a ni mihriem thu?” tiin, ân dawn a. Chun, an inngaituo a, “Vâna mi thu, ei ti chun, ‘Iengdinga a thu in awi naw am a na’ mi ti sîng a ta.

²⁶ Chun, ‘Mihriem thu’ ei ti chun mipui chu ei ṭi si a; mi po poin Johan chu zâwlneiin an ngai si a,” an ta.

²⁷ Chuongchun, Isu an dawn a, “Kan hriet nawh,” an ta. Ama khawm chun an kuomah, “Kei khawmin tu thuin am hieng thil hi ka thaw a hril bîk naw ning cheu.

Naupa pahni tekhithu

²⁸ “Nisienlakhawm, nangnîn iengtin am in ngai a? Mi tuin amanih naupasal pahni a nei a. Pakhat kuoma chun a va fe a, ‘Ka nau, vawisûn grêp huonah sin va thaw rawh,’ a ta.

²⁹ Ama chun, ‘Ka nuom nawh,’ a ta, a dawn a; nisienlakhawm, a nakie chun a lungril ân thleng a, a fe ta a.

³⁰ Chun, pakhat kuoma khawm chun a va fe a, chuong ang bawkin a va ta. Ama chun, ‘Pu, fêng ka tih’ a ta, a dawn a, nisienlakhawm, a fe ta si naw a.

³¹ Chuonghai pahni atu lem chun am an pa dit zâwng an thaw a?” a ta. Anni chun, “A hmasa lem chun,” an ta. Isûn an kuomah, “Titakzetin ka hril cheu hi, siedâwltuhai le nawchizawrhai chun, Pathien ramah an lût khal ding cheu a ni hi.

³² Johan chu felna kawnga chun in kuomah a hung a, ama chu in awi si naw a; nangni chu in hmu hnung khawmin ama chu in awi theina dingin in inlet chuong si naw a.

Grêp huon tekhithu

³³ “Tekhithu dang ngai ro, mi tu amanih in neitu a um a, ama chun grêp huon a siem a, palin ân huon vêl a, grêp sâwrna khur a cho a, in insâng a bâwl a; chun, lo enkawltuhai kuomah thlohlaw dingin a pêk a, ram dangah a fe ta a.

³⁴ Chun, a ra lo a hun ding chun, a ra lo dingin lo enkawltuhai kuomah a suokhai a tir a.

³⁵ Chun, lo enkawltuhai chun a suokhai chu an lo man a, pakhat an vuok a, pakhat an sukhlum a, pakhat lungin an dêng a.

³⁶ Chun, suok dang a hmasa pâwl nêka tam lem a tir nâwk a; annihai chunga khawm an hmaa mihai an thaw ang bawkin an lo thaw nâwk a.

³⁷ Chu hnunga ruok chun, ‘Ka naupa hi chu inza ngei an tih,’ tiin a naupa chu an kuomah a tir a.

³⁸ Nisienlakhawm, lo enkawltuhai chun a naupa chu an lo hmu phingleh, ‘Hi mipa hi rohluotu ding chu a nih; that ei tiu a, a ro hluo ding hi nei pêk ei tiu,’ an ta.

³⁹ Chuongchun, ama chu an man a, grêp huona inthawk chun an pei dawk a, an sukhlum ta a.

⁴⁰ Chuongchun, grêp huon neitupa a hung pha chun chuong lo enkawltuhai chunga chun iengtin am thaw tâng a ta le?” a ta.

⁴¹ Anni chun a kuomah, “Chuong mi suolhai chu rimsitakin sukbohmang a ta, grêp huon chu lo enkawltu dang, a lo pha po leh a rahai chu a kuomah pe pei dinghai kuomah thlohlaw dingin pêng a tih,” an ta.

⁴² Isu chun an kuomah, “Pathien lekhaa, ‘In bâwltuhai lung dit naw kha, Chu ngei chu a kia lung ṭhangkai tak a hung ni tah. Chu chu Lalpa thaw a na, Ei mithmua hin a mak a nih,’ ti hi in tiem ngai naw am a nih?

⁴³ “Chuleichun, ‘Pathien ram chu in kuoma inthawkin lâk hmang nîng a ta, ra insuo ding hnam kuomah pêk nîng a tih,’ ti ka hril cheu hi.

⁴⁴ Chun, chu lung chunga tlu chu kawi dar a ta; a idel lem chu râwt nawi a tih” a ta.

⁴⁵ Chun, thiempu lalhai le Pharisaihai chun a tekhithuhai chu an hrietin, anni chungthu a hril ti an hriet ta a.

⁴⁶ Chun, ama chu man an tum a; nisienlakhawm, mipuihai chu an ṭi si a, zâwlneiin an ruot leiin.