MATTHAI 19 - Pathien Lekhabu Inthieng (BSI)

Nuhmei mâk thua inchûktirna

¹ Chun, Isûn chuong thu chu a hril zo phingleh Galili rama inthawk a suok a, Jordan vadung râla Judai rama chun a va fe a;

² chun, mipui nasatakin an zui a; chutaka chun anni chu a sukdam ta a.

³ Chun, Pharisaihai a kuomah an hung a, ama fie dingin, “Ieng lei khawmin mîn a nuhmei a mâk a thieng am?” an ta.

⁴ Chun, ama chun, “Hi thu hi in tiem ngai naw am a nih? A tîra inthawka anni siemtu khan nuhmei le pasalin a siem le,

⁵ ‘Hi lei hin pasalin a nu le pa mâksan a ta, a nuhmei chel a tih; chuongchun, an pahni chun tisa pumkhat ni tâng an tih,’ ti hi.

⁶ Chuongchun, pahni an ni ta naw a, tisa pumkhat an ni ta lem a nih. Chuleiin, Pathienin a izawm ta chu mihriemin ṭhe naw raw se,” a ta, a dawn a.

⁷ Anni chun a kuomah “An leh iengdinga Mosiein inmâkna lekha pêka mâk ding thu a pêk si am a na?” an ta.

⁸ Ama chun an kuomah, “Mosiein in lungril ngar leiin annâwm in nuhmeihai mâk a phal; nisienlakhawm, a tîra inthawkin chuong ang a ni si nawh.

⁹ Kei chun ka ti cheu hi, tukhawm tlangvâl dit lei ni lova, nuhmei maa, mi dang nei taphawt chu a uire a nih; mâk hnung chu nei taphawt khawm a uire a nih,” a ta.

¹⁰ Inchûktirhai chun a kuomah, “Nuhmei kawngah pasal thu chuong ang a ni si chun, innei a ṭha naw ie,” an ta.

¹¹ Ama ruok chun an kuomah, “Chu thu chu mi nazawngin an pawm thei nawh, a ipêkhai chau naw chun.

¹² Mi tillâk an nu phîng sûnga inthawka chuong anga insieng hrim an um a; mi tillâk mihriem kuta lâk khawm an um bawk a; mi tillâk vân ram leia tillâka insiem fâwm khawm an um bawk a. Tukhawm a pawm thei taphawt chun pawm raw se,” a ta.

Isûn naupangtehai mal a sâwm

¹³ Chun, an chunga a kut innghat a, a iṭawngṭaipêk dingin a kuomah naupangtêhai an hung ṭhuoi a; chun, inchûktirhai chun an lo hal a.

¹⁴ Isu ruok chun, “Naupangtêhai ka kuomah inhungtir unla, khap naw ro; vân ram chu hieng ang mi ta a ni si a,” a ta.

¹⁵ Chun, an chungah a kut ân nghat a, chutaka inthawk chu a fe ta a.

Tlangvâl hausa chatuon hringna zawngtu

¹⁶ Chun, mi pakhat a hung a, a kuomah, “Inchûktirtu, kumkhuoa hringna ka nei theina dingin thil ṭha ieng am thâwng ka ta?” a ta.

¹⁷ Chun, ama chun a kuomah, “Thil ṭha thu iengdinga i mîn dawn? Ṭha chu pakhat chau a um, iengkhawm ni sienla, hringnaa lût i nuom chun thupêkhai chu zâwm rawh,” a ta.

¹⁸ Ama chun a kuomah, “A ieng tak am ie?” a ta. Isûn, “ ‘Tuol i that ding a ni nawh, i uire ding a ni nawh; în rûk ding a ni nawh, hrietpuina inkhêl i pêk ding a ni nawh,

¹⁹ I nu le pa chawimawi rawh,’ tihai le, ‘Nangma în hmangai angin i vênghai i hmangai ding a nih,’ ti hi,” a ta.

²⁰ Tlangvâl chun a kuomah, “Chuong thu po po chu ka zâwm hlak, ieng am ka la bâk a?” a ta.

²¹ Isûn a kuomah, “Ṭha famkima um i nuom chun, fe la, i nei chu zawr la, pasiehai kuomah pe rawh; chuongchun, vânah ro nei i tih; chun hung la, mi hung zui rawh,” a ta.

²² Tlangvâl ruok chun chuong thu chu a hrietin lungngaitakin a fe hmang ta a; sum tamtak nei a ni leiin.

²³ Chun, Isûn a inchûktirhai kuoma chun, “Titakzetin ka hril cheu hi, mi hausa ta dingin vân rama lût chu intak tak a nih.

²⁴ Ka hril nâwk cheu hi, mi hausa Pathien rama a lût nêkin, sanghâwngsei ṭhimnaa a lût thleng a awl lem,” a ta.

²⁵ Chun, inchûktirhai chun chu chu an hriet chun, mak an ti nasa bêk bêk a, “Tu am sandam ni thei a ta?” an ta.

²⁶ Chun, Isûn anni chu a en a, an kuomah, “Chu chu mihriem ithaw ruol a ni naw a; Pathien ding ruok chun iengkim thaw thei a nih,” a ta.

Vân rama inchûktirhai ngirhmun ding

²⁷ Chun, Peterin a kuomah, “Ngai ta, keinin iengkim mâksanin kan zui ta che a; ieng am hmûng kan ta le?” a ta, ân dawn a.

²⁸ Isûn an kuomah, “Titakzetin ka hril cheu hi, siemtharnaa chun, Mihriem Naupa a ropuina ṭhungphaah a ṭhung phaleh nangni a mi zuituhai rawi hi, Israel hnam sâwm le hnam hnihai chu ngaituoin, lalṭhungpha sâwm le pahniah la ṭhung vêng in tih.

²⁹ Chun, mi tukhawm inhai amanih, unauhai amanih, farnuhai amanih, pa amanih, nu amanih, nuhmei amanih, nauhai amanih, ramhai amanih, ka hming leia fesan taphawt chun, a let za hmûng an ta, kumkhuoa hringna chang bawk an tih.

³⁰ “Nisienlakhawm, mi tamtak, a hmasatakhai chu, a nuhnungtakah la um an ta; a nuhnungtakhai khawm a hmasatakah la um an tih.