MATTHAI 16 - Pathien Lekhabu Inthieng (BSI)

Inchikna inhmutir dingin an ngên

¹ Chun, Pharisaihai le Saddukaihai an hung a, ama fiena dingin vâna inthawka inchikna anni inentir dingin an hni a.

² Nisienlakhawm, ama chun an kuomah, “Zântieng a hung ni pha, ‘Khuo a ṭha ding nîng a tih, kâwl a sen êm el,’ in ti hlak a.

³ Chun, a zîngkâr chun, ‘Vawisûn chu khuo a se ding nîng a tih, kâwl a sen a, vân ân nîm êm el,’ in ti hlak a. Vân umzie in hrietthiem thei si a, nisienlakhawm, hun inchiknahai hi in hriet fie thei si naw a.

⁴ Ruolthar suol tak le uire hmanghai chun inchikna an zawng a; nisienlakhawm, Jona inchikna chau naw chu an kuomah inchikna hrim pêk ni naw ni,” a ta, a dawn a. Chun, anni a fesan a, a fe ta dai a.

Pharisai le Saddukaihai chawl

⁵ Chun, inchûktirhai chu râlkhing tieng an tlung chun, bei an lo chawi theinghil a,

⁶ Isûn an kuomah, “Pharisaihai le Saddukaihai chawla inthawk chun invêng unla, fîmkhur ro,” a ta.

⁷ Chun, anni chun, “Bei ei chawi dêr nawh,” tiin an inngaituo a.

⁸ Chun, Isûn chu chu a hriet a, “Ringna tlâwmhai, iengdinga bei in nei naw leia in inngaituo am a na?

⁹ Tu khawm hin in lungrilin in la hriet naw rawp maw? Mi sâng nga beiphêk panga le, in bâwm rût sip zât kha in hriet zing naw am a nih?

¹⁰ Mi sâng li beiphêk pasari le, in bâwmrâng rût sip zât khawm kha?

¹¹ Bei thu in kuomah ka hril nawh ti iengtiziea in hriet naw am a na? Pharisaihai le Saddukaihai chawla inthawk ruok chun fîmkhur ro,” a ta.

¹² Chu phingleh, bei chawla inthawka fîmkhur dingin a ti naw a, Pharisaihai le Saddukaihai inchûktirnaa inthawka fîmkhur dingin anni a ti lem ti an hung hriet ta a.

Peterin Isu chu Krista a ni ngeizie a phuongna

¹³ Chun, Isu chu Philip Kaisari biel a hung tlung chun, a inchûktirhai kuomah, “Mihaiin Mihriem Naupa hi tu am a nih an ti a?” tiin ân dawn a.

¹⁴ Anni chun, “Ṭhenkhatin, ‘Baptistu Johan an ti che a,’ ṭhenkhatin, ‘Elija’, ṭhenkhatin, ‘Jeremia amanih, zâwlnei tu amanih’ an ti che” an ta.

¹⁵ Ama chun an kuomah, “An leh, nangnîn tu am a nih in mi ti a?” a ta.

¹⁶ Simon Peterin, “Krista Pathien hring Naupa chu I nih,” a ta, a dawn a.

¹⁷ Chun, Isûn a kuomah, “Simon Bar-Jona, i hamṭha ie; tisa le thisenin ân hriettir che a ni si naw a, ka Pa vâna mîn ân hriettir lem che a nih.

¹⁸ Chun, nang Peter i nih ti ka hril che; hi lungpui chunga hin ka kohran rem ka ta, mithi khuo kul kawtkhârhai chun chu chu ngam naw ni hai.

¹⁹ Vân ram chabihai pêng ka ti che a, hnuoi chunga iengkhawm i phuor taphawt vânah phuor ning a ta; hnuoi chunga iengkhawm i sût taphawt chu vânah sût ning a tih,” a ta, a dawn a.

²⁰ Chu hnunga chun Krista a ni ti tukhawm hril lo dingin inchûktirhai chu a ti tlat a.

Isu a thina le a hung nâwkna ding a hrillâwkna

²¹ Chu chena inthawk chun, Isûn Jerusalema a fe dingzie dâm, upahai, thiempu lalhai, Dân inchûktirtuhaia inthawka thil tamtak a tuor dingzie dâm, sukhluma a um dingzie dâm le ni thum nia keithoa a um dingzie dâm chu a inchûktirhai chu ân hriettir phut ta a.

²² Chun, Peter chun ama chu a tumin a ṭhuoi a, “Lalpa, Pathienin lunginsiet raw se che!; chuong chu i chungah tlung naw tawp a tih,” tiin a kâwk ta a.

²³ Ama ruok chu a ngha a, Peter kuoma chun, “Setan, ka hnungah fe rawh, keia ta dingin tlûkna i nih; Pathien thil ngaituo lovin mihriem thil i ngaituo lem a ni hi,” a ta.

Mâni le mâni intheinghil dinga kona

²⁴ Chun, Isûn a închûktirhai kuomah, “Tukhawmin mi zui a nuom chun, mâni inhnâwlin, a kraws putin, mi zui raw se.

²⁵ Tukhawm a hringna hum nuom taphawt chun chân a tih; tukhawm keia leia hringna chân phawt chun hum a tih.

²⁶ Mîn khawvêl hi a pumin nei sien, ama hringna chân si sienla, a ta dingin ieng am ṭhahnem a ta? Annawleh, mîn a hringna sikin ieng am pêng a ta?

²⁷ Mihriem Naupa hi a vântirkohai leh, a Pa ropuinaa inthuomin a hung ding a ni si a; chu pha chun mi tin an thilthaw ang peiin thung seng a tih.

²⁸ Titakzetin ka hril cheu hi, hitaka ngîr a ṭhen hi, Mihriem Naupa a rama a hung an hmu hmakhat chun, thina intem tawp lo ding an um,” a ti a.