MATTHAI 15 - Pathien Lekhabu Inthieng (BSI)

Upahai thurosie bawsiet chungthua Isu dawnna

¹ Chu lai tak chun, Jerusalema inthawkin Pharisaihai le Dân inchûktirtuhai Isu kuomah an hung a,

² “Iengdinga i închûktirhaiin upahai thurosie chu an bawsiet hlak am a na? Bei an fâk pha kut an sâwp ngai si naw a,” an ta.

³ Chun, ama chun an kuomah, “Nangni khawm iengdinga in thurosie leia Pathien thupêk in bawsiet am a na?

⁴ Pathienin, ‘I nu le pa chawimawi rawh,’ ‘Tukhawm a nu amanih, a pa amanih hrilse taphawt chu thi tei tei raw se,’ a ti si a.

⁵ Nangni ruok chun tukhawm a nu amanih, a pa amanih kuoma, ‘I mi sawrna ding hi Pathien kuoma pêk a ni tah, ti taphawt chun,

⁶ a nu amanih, a pa amanih a chawi-mawi ding a ni nawh’ in ti hlak a. Chuongchun, in thurosie leiin Pathien thu chu in baw hmang tah a ni hi.

⁷ Vervêkhai Isai hin in chungchâng thu a lo hrillâwk indik ngei el:

⁸ ‘Hi hairawi hin an bauin an mi chawimawi a, An lungril ruok chun an mi hlat si a.

⁹ Iengkhawm ni sienla, an inchûktirnaah mihriem thupêk an inchûktir leiin, An mi biek hlak hi a thlâwn el a nih,’ tiin,” a ta, a dawn a.

Mi sukthieng nawtu

¹⁰ Chun, mipui chu a ko a, an kuomah, “Ngai unla, a ngai lo thiem ro;

¹¹ baua lût chu mihriem sukthieng nawtu a ni naw a, baua suok, achu ngei chu mihriem sukthieng nawtu a ni lem,” a ta.

¹² Chu lai chun, a inchûktirhai an hung a, a kuomah, “Pharisaihaiin kha thu kha an hriet a, an lungninaw kha i hriet am?” an ta.

¹³ Ama ruok chun, “Kûng po po ka Pa vâna mi phun naw chu phâwidawkin um an tih.

¹⁴ Anni chu pawisa naw ro; ṭhuoitu mitdel an nih. Chuongchun, mitdelin mitdel ma a ṭhuoi chun khurah tla rêl an tih,” a ta, a dawn a.

¹⁵ Chun, Peterin a kuomah, “Tekhithu kha mi hrilfie ta la,” tiin a dawn a.

¹⁶ Ama chun, “Tu chen hin nangni khawm hrietna nei lovin in la um rawp maw?

¹⁷ Baua lût taphawt chu phîngah a tla thla a, inhnawmnaah pei dawkin a um ti in hriet naw am a nih?

¹⁸ Baua suokhai ruok chu lungrila hung suok a na; chuong ngei chun mihriem a sukthieng naw hlak a nih.

¹⁹ Lungrila hin ngaituona suolhai, tuolthatna hai, uiretna hai, inditna hai, inrûkna hai, inhêkna hai, hrilsietna hai a hung suok hlak si a.

²⁰ chuong chu mihriem sukthieng nawtu a nih; kut sâwp lova bu fâk ruok chun mi a sukthieng naw nawh,” a ta.

Kanaan nuhmei ringna

²¹ Chun, Isu chutaka inthawk chun a suok a; Tura le Sidon bielah a fe ta a.

²² Chun, ngai ta, chuong rama inthawk chun Kanaan nuhmei pakhat a hung suok a, “Lalpa, David naupa, mi lunginsiet rawh, ka naunu khawhriin a man tlat a nih,” tiin a khêk a.

²³ Ama ruok chun bau khat khawmin a dawn nawh. Chun, a inchûktirhai chun, “Ei hnungah a khêk a khêk si a, infetir el ta la,” tiin an hung ngên a.

²⁴ Ama ruok chun, “Israel hnam laia berâm inhmang kuoma naw chu tir ka ni nawh,” a ta, a dawn a.

²⁵ Nisienlakhawm, nuhmei chu a hung a, “Lalpa, mi san rawh,” tiin chibai a bûk a.

²⁶ Chun, ama chun, “Nauhai bei lâkpêk a, uihai kuoma pêk chu a mawi nawh ie,” a ta, a dawn a.

²⁷ Ama chun, “Lalpa, ni chu a nih; nisienlakhawm, uihai khawmin an pu dawkâna inthawka bei nawi tla chu an fâk hlak annâwm,” a ta.

²⁸ Chu phingleh Isûn a kuomah, “Nuhmei, i ringna a nasa êm el; i dit ang takin i chungah um raw se,” a ta, a dawn a. Chuongchun, a naunu chu, chu chena chun a hung dam el ta a.

Mi dang tamtak sukdam

²⁹ Chun, Isu chutaka inthawk chun a fe a, Galili dîl kâwl a hung tlung a; chun tlânga chun a hang fe a, chutaka chun a ṭhung ta a.

³⁰ Chun, mipui nasatak, kebaihai, mitdelhai, ṭawngtheinawhai, piengsuolhai hung ṭhuoiin a kuomah an hung a, a ke bulah an sie a; chun, a lo sukdam tâwl a.

³¹ Chuongchun, mipui chun, ṭawngtheinawhai chu hung ṭawng a, piengsuolhai chu hung ṭha a, kebaihai chu kea lâwn a, mitdelhai chu hmu theia an hmuin, mak an ti hle a; chuongchun, Israelhai Pathien chu an inpâk ta a.

Mipui sâng li vai

³² Chun, Isûn a inchûktirhai chu a ko a, “Mipuihai hi tuhin ka kuomah ni thum an um ta a, fâk ding iengkhawm an nei naw leiin ka lungsiet bêk bêk a nih; bu ngheiin kân fetir nuom nawh ie, chuong naw chun lam kârah châu rawi an tih,” a ta.

³³ Chun, inchûktirhai chun a kuomah, “Mipui hieng zât zât khawpna khawp beiphêk chuong zât lâwm lâwm thlalêrah khâwlai am hmûng kan ta?” an ta.

³⁴ Chun, an kuomah, “Beiphêk iengzât am in nei a?” a ta. Anni chun, “Phêk sari, ngatê tlâwmte leh,” an ta.

³⁵ Ama chun hnuoia ṭhung dingin mipui chu thu a pêk a.

³⁶ Chun, bei pasari le ngatê chu a lâk a, lâwmthu a hril a, a khawi a, inchûktirhai kuomah a pêk a; inchûktirhai chun mipuihai kuomah an pêk a.

³⁷ Chun, an rêngin an fâk a, an khawp tâwl ta a, an fâk mahla khawm chu bâwmrâng sari an rût sip a.

³⁸ A fatuhai chu nuhmei le naupang tiem lovin patling ruok khawm sâng li an nih.

³⁹ Chun, mipuihai chu ân ṭintir hnungin lawngah a chuong a, Magadan ram a hung tlung a.