MATTHAI 11 - Pathien Lekhabu Inthieng (BSI)

Baptistu Johanin a inchûktirhai Isu kuoma a tir

¹ Chun, Isûn a inchûktir sâwm le pahni hai chu thu a pêk zo phingleh chutaka inthawkin an khuohaia inchûktir le thu hril dingin a fe ta a.

² Chun, Johanin Krista thilthawhai chu intângna inah a lo hrietin a inchûktirhai ân palaitir a, a kuomah,

³ “A hung ding chu i ni, mi dang kan la ngai ding?” tiin.

⁴ Chun, Isûn an kuomah, “Fe nâwk ta unla, thil in hmu le in hriet hi Johan kuomah va hril ro;

⁵ mitdelhai an mit a lo var tah, kebaihai kein an lâwn tah, phârhai an lo inthieng tah, nasêthai an na a lo var tah, mithihai keithoin an um tah, pasiehaiin Chanchin Ṭha thu hril an dawng tah.

⁶ Chun, tukhawm ka chunga lungninawna hmu naw chu, a hamṭha,” tiin a lo dawn a.

⁷ Chun, chuhai chu an fe phingleh, Isûn mipui kuoma chun Johan thu a hril ta a, “Ieng en dingin am thlalêrah in fe suok kha? Luong thli imût hnîng maw?

⁸ Annawleh, ieng en ding takin am in fe suok kha? Puon innêm sil maw? Ngai ta u, puon innêm silhai chu lal inahai in sawnnaw an um.

⁹ Annawleh, ieng lei takin am in fe suok kha? Zâwlnei en dingin maw? A ni ngei kha, ka ti cheu hi, zâwlnei nêk khawma ropui lem,

¹⁰ ‘En ta, ka tirko i hmaah ka tir a nih. Ama chun i hmaah i lampui siem a tih,’ tia a chanchin an inziek kha ama hi a nih.

¹¹ Titakzetin ka hril cheu hi, nuhmei sûnga insieng laiah Baptistu Johan nêka ropui lem an la suok ngai nawh, nisienlakhawm, vân rama mi chîn deu khawm ama nêkin an ropui lem si a.

¹² Baptistu Johana inthawk tu chen hin vân ram chun thaw rakna a tuok hlak a, a thaw rakhai chun an pâwnglâk hlak.

¹³ Zâwlneihai po po le Dân thu chun, Johan hung um chen khan an hril lâwk hlak a nih.

¹⁴ In awi nuom chun, chu chu Elija, a hung ding chu a nih.

¹⁵ Tukhawm hrietna dinga na nei chun hre raw se.

¹⁶ “Nisienlakhawm, tulai ruoltharhai hi ieng lêm hrilkhîng ka ta? Naupang dâwr hmunahai ṭhung a, an ruolhai ko a,

¹⁷ ‘Theihle kan mût pêk cheu a, in lâm si naw a, Kan ṭap rak a, âwm in chum si naw a,’ tihai ang hi an nih.

¹⁸ “Johan chu a hung a, a fâkin a dâwn naw a, ‘Khawhri a zâwl a ni hi,’ an ta.

¹⁹ Mihriem Naupa a hung a, a fâkin a dâwn a, ‘En ta u, bu he mi, uoin he mi, siedâwltuhai le mi suolhai ruolpa saw,’ an ti si a. Nisienlakhawm, Varna chu a thilthawhaiin thiem ân changtir,” a ta.

Ring nawtu khawpuihai chungrikna

²⁰ Chun, an sim naw leiin a thilmak thaw tamna tak khuohai chu a hal ta a.

²¹ “Korazin, i chung a rik! Bethsaida, i chung a rik! Nangnia thilmak thawa umhai kha, Tura le Sidona thaw ni sienla, saiip puon sila vut laia ṭhungin um tâng an tih.

²² Nisienlakhawm, ka ti cheu hi ngaituo nia chun nangni tuor nêkin Tura le Sidon tuor chu a dân um lem a tih.

²³ Chun, nang Kapernaum, vân chena chawimawi i ni ding am a nih? Mithi khuo chenin i zu fe ding i sawnnaw. Nangmaa thilmak thawa umhai kha Sodoma thaw ni sienla, tu chen hin la um zing a tih.

²⁴ Nisienlakhawm, ka ti che hi, ngaituo nia chun i tuor nêk chun Sodom ram tuor ding chu a dân um lem a tih,” a ta.

Chauhai ta dinga châwlna

²⁵ Chu lai chun Isûn a biek a, “Aw Pa, hnuoi le vân Lalpa, nangin mi var le mi bengvârhai kuomah hieng thu hi i ip a, nautehai kuomah i puong lei hin kân pâk che.

²⁶ Anih, Pa, chuong anga thaw chu i ngaiin a ṭha a nih.

²⁷ Ka pain thil iengkim a mîn kawltir tah; Pa naw chun Naupa hi tukhawmin an hriet nawh. Chun, Naupa le Naupain a puong nuomnahai chau naw chun tukhawmin Pa chu an hriet bawk nawh.

²⁸ “Nangni sininrim le phur rik phur po pohai, ka kuomah hung unla, keiin inchâwltir ka ti cheu.

²⁹ Ka rîngkawl bât unla, ka kuomah inchûk ro; thuhnuoirawl le lungrila inngaitlâwmtak ka ni hi; chuongchun, in thlarau ta dingin châwlna hmûng in tih.

³⁰ Ka rîngkawl chu ân hâwi a, ka phur khawm a zâng a nih,” a ta.