MATTHAI 1 - Pathien Lekhabu Inthieng (BSI)

Isu Thlatu chanchin

¹ Abraham naupa, David naupa, Isu Krista thlatuhai inthlazie chanchin chu:

² Abrahamin Isak a thla a; Isakin Jakob a thla a; Jakobin Juda le a unauhai a thla a;

³ Judain Tamar leh, Perez le Zera a thla a; Perezin Esrom a thla a; Esromin Aram a thla a;

⁴ Aramin Amminadab a thla a; Amminadabin Nason a thla a; Nasonin Salmon a thla a;

⁵ Salmonin Rahab leh, Boaz a thla a; Boazin Ruth leh, Obed a thla a; Obedin Jessai a thla a;

⁶ Jessaiin lal David a thla a; chun Davidin Uria nuhmei leh, Solomon a thla a;

⁷ Solomonin Rehoboam a thla a; Rehoboamin Abia a thla a; Abiain Asa a thla a;

⁸ Asain Jehosaphat a thla a; Jehosaphatin Jehoram a thla a; Jehoramin Uzzia a thla a;

⁹ Uzziain Jotham a thla a; Jothamin Ahaz a thla a; Ahazin Hezekia a thla a;

¹⁰ Hezekiain Manasse a thla a; Manassein Amos a thla a; Amosin Josia a thla a;

¹¹ Babulon tienga sala an ṭhuoi lai vel khan, Josiain Jekonia le a unauhai a thla a;

¹² Chun, Babulon tienga sala an ṭhuoi hnungin Jekoniain Salathiel a thla a; Salathielin Zerubbabel a thla a;

¹³ Zerubbabelin Abiud a thla a; Abiudin Eliakim a thla a; Eliakimin Azor a thla a;

¹⁴ Azorin Sadok a thla a; Sadokin Akim a thla a; Akimin Eliud a thla a;

¹⁵ Eliudin Eleazar a thla a; Eleazarin Matthan a thla a; Matthanin Jakob a thla a;

¹⁶ Jakobin Josef Mari pasal chu a thla a; chu Maria chun Isu Krista an ti hi a hung insieng ta a.

¹⁷ Chuongchun, suon po po chu Abrahama inthawk David chenin suon sâwmpali, Davida inthawka Babulon tienga sala an ṭhuoi chenin suon sâwmpali, Babulon tienga sala an ṭhuoia inthawka Krista chenin suon sâwmpali an nih.

Isu pieng thu

¹⁸ Chun, Isu Krista hung insiengzie chu hieng ang hi a nih: A nu Mari chu Josef le an inhuol laiin, an inpâwl hmain Thlarau Inthiengin ân raitir ti an lo hriet ta a.

¹⁹ Chun, a pasal Josef chu mi feltak a na; tlâng ihriet a nuom naw a; arûka mâk el a nuom a.

²⁰ Nisienlakhawm, chuong thu chu a ngaituo laiin, ngai ta, a mangah Lalpa vântirko a kuomah a hung inlâr a, “Josef, nang David naupa, Mari chu nuhmeia nei ṭi naw rawh; a nau vawn chu Thlarau Inthienga inthawk a nih i sawnnaw.

²¹ Naupasal nei a ta, a hmingah Isu sak i tih; ama chun a mihai an thil suksuolnaa inthawkin a sandam ding a ni si a”, a ta.

²² Lalpain zâwlnei baua,

²³ “Ngai ta, nunghâk inthieng chu inrâi a ta, Naupasal nei a ta; A hming dingin Immanuel sak an tih,” tia a hril kha a hung tlung theina dingin chuong po po chu a hung um a nih. (Immanuel chu, “Ei kuomah Pathien a um” tina a nih).

²⁴ Chuongchun, Josef chu a in a tho a; Lalpa vântirkoin a kuoma thu a pêk ang chun a thaw a; Mari chu a nei ta a;

²⁵ nisienlakhawm, naupasal a nei hmakhat chu a pâwl naw a; chun, a hming chu ISU a sak ta a.