LUKA 3 - Pathien Lekhabu Inthieng (BSI)

Baptistu Johan thuhril

¹ Chun, Tiberia Kaisar ân lala inthawka kum sâwmpanga kumah (Pontia Pilat chu Judai ram Bawrsâp a na, Herod chu Galili ram lal a nih, a unau Philip chu Iturea le Trakonitis ram lal a nih, Lusani chu Abilene ram lal a nih.

² Anna le Kaiapha chu Thiempu Laltakhai an nih), thlalêra Zakaria naupa Johan kuoma chun Pathien thu a hung tlung a.

³ Chun, ama chu Jordan vadung pang vêl ram tinah a fe a, thil suksuol ngaidamna dingin simna baptisma thu a hril pei a.

⁴ Zâwlnei Isai thu buah, “Thlalêra mi khêk râwl chun, ‘Lalpa lamlien buotsai unla; A lampuihai suktlûn ro;

⁵ Ruom tin sung sip ni vawng a ta, Tlâng tin, muol tin sukhnuoi ni bawk a tih. Lampui kâwihai hung tlûn a ta, Lampui inṭumnawhai hung inruol bawk a tih;

⁶ Chun, mi po poin Pathien sandamna hmûng an tih,’ a ta,” tia ziek ang khan.

⁷ Chun, ama chun baptisma chang dinga a kuoma mipui hung suokhai kuoma chun, “Rûl thlahai, lungsen hung tlung ding hi tlânsan dingin tuin am a kâwk cheu a?

⁸ Chuongchun, sim hming put tlâkin ra ro, ‘Abraham kan thlatu a nih annâwm,’ in lungrilin ti el naw ro; Pathienin hieng lunghai hi Abraham thlaahai ân ngîrtir thei ti ka hril cheu hi.

⁹ Tu ngei khawm hin hreipui thing bul tinah an sie tah; chuongchun, thing tin ra ṭhaa ra naw taphawt chu an phûr a, meiah an pei hlak,” a ta.

¹⁰ Chun, mipuihai chun a kuomah, “Anleh ieng am kan thaw ding a na?” an ta, an indawn a.

¹¹ Ama chun an kuomah, “Tukhawm zakuo pahni nei chun a nei naw kuomah pe raw se; tukhawm fâk nei chun chuong ang bawkin thaw raw se,” a ta, a dawn a.

¹² Chun, siedâwltuhai khawm baptisma chang dingin an hung a, a kuomah, “Inchûktirtu, iengam kan thaw ding?” an ta.

¹³ Ama chun an kuomah, “An rêlpêk cheu bâk chu va phût naw ro,” a ta.

¹⁴ Chun, sipaihai khawmin a kuomah, “Keini teh ieng am kan thaw ding?” an ta, an indawn a. Ama chun an kuomah, “Tukhawm suknawmnain va hêk naw ro; in hlaw tâwk taphawta chun lungawi ro,” a ta.

¹⁵ Chun, mihaiin an beisei a, mi po poin Johan chungthu an lungrilah, “Krista a lo ni el khat rawi am?” tia an ngaituo laiin,

¹⁶ Johan chun a dawn a, an rênga kuomah, “Kei chun chu tuiin ka baptis hlak cheu a; nisienlakhawm, keia nêka ropui lem a hung ding a nih, a kekawk hrui sût tlâk khawm ka ni nawh; ama chun Thlarau Inthieng le meiin baptis a ti cheu a,

¹⁷ a kutin leipup a chawi a, a hrizâwl zâp fai hieuna ding le, a bupanga a bu hluna dingin; a si ruok chu mei rêm thei lovin raw hmang a tih,” a ta.

¹⁸ Chun, infuina thu dang tamtakin mihai kuomah Chanchin Ṭha a hril hlak a.

¹⁹ Nisienlakhawm, Lal Herod chu a unaupa nuhmei Herodi chung thua le a suksuol po po chunga chun Johan chun a kâwk leiin,

²⁰ a thil suksuol po po belsain ama chu intângna inah a khum ta a.

Isu baptisma changna

²¹ Chun, mi po poin baptisma an chang zoin, Isu khawmin baptisma a chang a, a ṭawngṭai a, vân a hung inhawng a,

²² Thlarau Inthieng chu taksa putin vaṭhu angin a hung ṭum a, a chungah a fu ta a; chun, vâna inthawkin râwl a hung suok a, “Nang ka Naupa dittak i nih; i chungah ka lâwm ngawt el,” a ta.

Isu thlatuhai chanchin

²³ Chun, Isûn ân chûktir ṭan lai vêl khan ama chu kum sâwmthum lai a ni ta a, mi ngai chun Josef naupa a na, Ama chu Heli nau a na,

²⁴ Ama chu Matthat nau a na, Ama chu Levi nau a na, Ama chu Melki nau a na, Ama chu Janai nau a na, Ama chu Josef nau a na,

²⁵ Ama chu Mattathi nau a na, Ama chu Amos nau a na, Ama chu Nahum nau a na, Ama chu Esli nau a na, Ama chu Naggai nau a na,

²⁶ Ama chu Maath nau a na, Ama chu Mattathi nau a na, Ama chu Semei nau a na, Ama chu Josek nau a na, Ama chu Joda nau a na,

²⁷ Ama chu Joanan nau a na, Ama chu Rhesa nau a na, Ama chu Zerubbabel nau a na, Ama chu Sealtiel nau a na, Ama chu Neri nau a na,

²⁸ Ama chu Melki nau a na, Ama chu Addi nau a na, Ama chu Kosam nau a na, Ama chu Elmadam nau a na, Ama chu Era nau a na,

²⁹ Ama chu Josua nau a na, Ama chu Eliezer nau a na, Ama chu Jorim nau a na, Ama chu Matthat nau a na, Ama chu Levi nau a na,

³⁰ Ama chu Simeon nau a na, Ama chu Juda nau a na, Ama chu Josef nau a na, Ama chu Jonam nau a na, Ama chu Eliakim nau a na,

³¹ Ama chu Melea nau a na, Ama chu Menna nau a na, Ama chu Mattatha nau a na, Ama chu Nathan nau a na, Ama chu David nau a na,

³² Ama chu Jessai nau a na, Ama chu Obed nau a na, Ama chu Boaz nau a na, Ama chu Salmon nau a na, Ama chu Nason nau a na,

³³ Ama chu Aminadab nau a na, Ama chu Aram nau a na, Ama chu Hesron nau a na, Ama chu Perez nau a na, Ama chu Juda nau a na,

³⁴ Ama chu Jakob nau a na, Ama chu Isak nau a na, Ama chu Abraham nau a na, Ama chu Tera nau a na, Ama chu Nahor nau a na,

³⁵ Ama chu Serug nau a na, Ama chu Reu nau a na, Ama chu Peleg nau a na, Ama chu Eber nau a na, Ama chu Sela nau a na,

³⁶ Ama chu Kainan nau a na, Ama chu Arphaksad nau a na, Ama chu Sem nau a na, Ama chu Noa nau a na, Ama chu Lamek nau a na,

³⁷ Ama chu Methusela nau a na, Ama chu Enok nau a na, Ama chu Jered nau a na, Ama chu Mahalalel nau a na, Ama chu Kainan nau a na,

³⁸ Ama chu Enos nau a na, Ama chu Seth nau a na, Ama chu Adam nau a na, Ama chu Pathien nau a nih.