LUKA 22 - Pathien Lekhabu Inthieng (BSI)

Isu chunga thu phier rûk

¹ Chun, Chawlṭhanglo Bei Ruoiṭhe, Fekân Ruoiṭhe an ti chu a hnai ta a.

² Chun, thiempu lalhai le Dân inchûktirtuhai chun ama sukhlum dân ding an zawng a, vântlâng an ṭi si a.

³ Chun, sâwm le pahnihai laia ṭhang, Juda Iskariot an iti sûnga chun Setan a lût a.

⁴ Chuongchun, ama chu a va fe a, Isu ân mantir thei dân ding thuah thiempu lalhai le manmihai a va râwn a.

⁵ Anni chu an lâwm hle a, tangka pêk an tiem ta a.

⁶ Ama chun a remtih a, mipui umnaw kâra inmantirna remchâng a zawng ta a.

A inchûktirhai leh Fekân ruoi an fâk

⁷ Chun, Chawlṭhanglo Bei ruoiṭhe ni, Fekân Ruoiṭhena berâmte thatna ding ni chu a hung tlung ta a.

⁸ Chuongchun, Isûn Peter le Johan chu, “Fekân Ruoi bu ei fâk dingin va buotsai ro,” a ta.

⁹ Anni chun a kuomah, “Khâwlai am va buotsai inlang i nuom a?” an ta.

¹⁰ Chun, ama chun an kuomah, “Ngai ta u, khawpuia in lûtin, pasal bêla tui putin intuokpui a ti cheu a, a lûtna inah zui lût el ro.

¹¹ Chun, in neitupa kuoma chun, ‘Inchûktirtuin, ka închûktirhai le Fekân Ruoi bu kan fâkna ding mikhuol pindan chu khâwlai am a na? a ti che,’ ti ro.

¹² Chuongchun, ama chun pindan chunghnung lientak, thuomhnaw umsa inentir a ti cheu a; chutaka chun buotsai ro,” a ta.

¹³ Chun, an fe ta a, an kuoma a hril ang takin an hmu a; chun, Fekân Ruoi chu an buotsai ta a.

¹⁴ Chun, a fâk a hung hun chun, ama chun thlêng a awt a, a tirkohai chun an awtpui ve a.

Lalpa Zânbu phunna

¹⁵ Chun, an kuomah, “Ka thil tuor hma hin hi Fekân Ruoi hi fâkpui cheu ka nuom bêk bêk a nih.

¹⁶ Ka hril cheu hi, hi hi Pathien rama sukfamkim a ni hmakhat chu ka fâk nâwk ta naw ding a nih,” a ta.

¹⁷ Chun, no a lâk a, lâwmthu a hril zoin, “Hi hi la unla, insem ro,

¹⁸ ka hril cheu hi, tuta inthawk Pathien ram a hung tlung hmakhat chu grêp hrui raa hi ka dâwn nâwk ta naw ding a nih,” a ta.

¹⁹ Chun, bei a lâk a, lâwmthu a hril zoin, a khawi a, an kuomah a pêk a, “Hi hi ka taksa [in aia pêk chu a nih; in mi hriet zingna dingin hi hi thaw hlak ro,” a ta.

²⁰ Chun, zân bu fâk zoin chuong ang bawkin no chu a lâk a, “Hi no hi ka thisena thuthlung thar chu a nih, in aia suok ding chu.]

²¹ “Nisienlakhawm, ngai ta u, a mîn mantirtu ding kut chu ka kuomah dawkân chungah a um zing a nih.

²² Mihriem Naupa hi ruot ang ngeiin a fe ding a nih; nisienlakhawm, ân mantirtu ding mihriem chung chu a rik ie!” a ta.

²³ Chun, annin, “Eini laia thil chuong ang thaw ding chu tû am nîng ei ta le?” an ta, anni le anni an indawn a.

A ropuitak ni nuom leia insêlna

²⁴ Chun, anni laia tû tak am ropui taka ngai ding ti thuah insêlna a suok a.

²⁵ Chun, ama chun an kuomah, “Jentailhai lalhai chu an chungah an inlal hlak a; an chunga thuneituhai chu, ‘Thilṭha thawtu’ tia ko an ni hlak.

²⁶ Nisienlakhawm, nangni chu chuong ang chu ni naw ti niu; in laia ropui tak chu a chîn lem angin um sienla, ân lal tak chu rawngbâwltu angin um lem raw se.

²⁷ Tû am a ropui lem a? Bu fatu am, rawngbâwltu? Bu fatu chu a ni naw am a nih? Nisienlakhawm, kei chu nangni laia rawngbâwltu angin ka um hi.

²⁸ “Rinum ka tuok sûng po nangni a mi umpuituhai in na;

²⁹ ka Pain ram a mi ruotpêk angin ram ka ruotpêk cheu hi,

³⁰ chuongchun, ka rama ka dawkâna in fâka in dâwn theina dingin; chuongchun, Israel hnam sâwmpahnihai ro rêlpêkin lalṭhungphaah la ṭhung in tih.

Peterin ân phat ding thu hrillâwkna

³¹ “Simon, Simon, ngai ta, Setanin, bu rel anga a rel theina ding cheuin, nangni rawi hi a hni cheu annaw;

³² nisienlakhawm, i ringna a bo nawna dingin ka ṭawngṭaipêk che a nih, i ngha kîr nâwk pha nangin i unauhai sukdet rawh,” a ta.

³³ Ama chun a kuomah, “Lalpa, intângna ina le thinaa khawm i kuoma fe ve ka huom a nih,” a ta.

³⁴ Ama chun, “Peter, ka hril che hi, i mi hrietnaa hin vawi thum i mîn phat hmakhat chu vawisûn hin âr khuong naw ni,” a ta.

Tangka ip, mansa, kekawk le kâwlhnâm

³⁵ Chun, an kuomah, “Tangka ip boa, mansa boa, kekawk boa ka tir suok cheu khan thil hrim hrim in tlasam am?” a ta. Anni chun, “Tlasam lo,” an ta.

³⁶ Chun, ama chun an kuomah, “Tu ruok hin chu tûkhawm tangka ip nei chun chawi raw se, mansa leh; tûkhawm kâwlhnâm nei naw chun a puon zawr sienla inchaw raw se.

³⁷ Ka hril cheu hi, ‘Ama chu mi suol lai an tiem sa tah,’ ti ziek kha ka chungah a hung tlung ding a nih; ka chungchâng thuhai kha a tlung zo ding a ni tah,” a ta.

³⁸ Chun, anni chun, “Lalpa, en ta, hi kâwlhnâm pahni a um,” an ta. Ama chun an kuomah, “A hun chu,” a ta.

Oliv tlânga Isu ṭawngṭaina

³⁹ Chun, ama chu a suok a, a dân pângngaiin Oliv tlânga chun a fe ta a; inchûktirhai khawmin an zui a.

⁴⁰ Chun, a hmun chu a va tlung chun an kuomah, “Thlêmnaa in lût nawna dingin ṭawngṭai ro,” a ta.

⁴¹ Chun, lung dêng phâk chenah a tumin a va fe a; chun, a dingṭhaṭhuon a, a ṭawngṭai a,

⁴² “Pa, rem i ti chun, hi no hi ka kuoma inthawkin la hmang rawh; nisienlakhawm, keia thu ni lovin, nangma thu thu ni lem raw se,” a ta.

⁴³ [Chun, vâna inthawkin vântirko pakhat a sukhar dingin a hung inlâr a.

⁴⁴ Chun, a lung ân rim bêk bêk leiin ṭhahnemngai nâwk zuolin a ṭawngṭai a, a thlan chu thi far lientak angin, hnuoiah a zuk far a.]

⁴⁵ Chun, a ṭawngṭai zoa a thoin, inchûktirhai kuomah a hung a, an lungngai leiin an lo in a hmu a;

⁴⁶ chun, an kuomah, “Iengdinga in in am? Thlêmnaa in lût nâwna dingin tho unla, ṭawngṭai ro,” a ta.

Isu mana a um thu

⁴⁷ Chun, a la hril zing laiin, ngai ta, mipui an hung a, sâwm le pahni laia ṭhang Juda an iti khan an hma a hung ṭhuoi a; chun, fâwp tumin Isu a hung pan a.

⁴⁸ Nisienlakhawm, Isu chun a kuomah, “Juda, Mihriem Naupa hi fâwpin în mantir ding a ni maw?” a ta.

⁴⁹ Chun, a vêla mihai chun thil hung tlung ding chu an hrietin, “Lalpa kâwlhnâmin sât kan ti?” an ta.

⁵⁰ Chun, anni laia tûin amanih Thiempu Laltak suok chu a sât a, a nakâwr chang tieng a sât thlâkpêk a.

⁵¹ Chun, Isûn a biek a, “Hi po hi ni raw se,” a ta, a nakâwr chu a them a, a sukdam ta a.

⁵² Chun, Isûn a kuoma hung thiempu lalhai, Pathien biekin hotuhai le, upahai kuoma chun, “Kâwlhnâmhai, hembâwkhai chawiin, suomhmang man ding ang elin in hung a ni maw?

⁵³ Pathien biekina in kuoma ni tin ka um laihai khan mi man tumin in mi ban si naw a; nisienlakhawm, tuhi nangni hun a nih, inthim thuneina leh,” a ta.

Peterin Isu ân phat

⁵⁴ Chun, an man a, an ṭhuoi a, Thiempu Laltak ina chun an ṭhuoi lût ta a.

⁵⁵ Chun, Peterin hlataka inthawkin a zui a. Chun, in inhuon sûng tuollai chun mei an sêm a, an ṭhung khâwm a, Peter chu anni lai a va ṭhung ve a.

⁵⁶ Chun, mei vara a ṭhung laiin, nunghâk tûin amanih a hmu a, a en zing a, “Hi mipa khawm hi a kuoma um kha a ni hi,” a ti a.

⁵⁷ Ama ruok chun, “Nuhmei, ama chu ka hriet nawh,” tiin ân phat a.

⁵⁸ Chun, anakie deu chun mi dangin a hung hmu nâwk a, “Nang khawm anni laia mi i ni hi,” a ta. Peter ruok chun, “Mihriem, ka ni naw ie,” a ta.

⁵⁹ Chun, dâr kâr khat lai hnunga chun, mi dangin , “Hi mipa khawm hi a kuoma um kha a ni ngei el; Galili ram mi a nih annâwm,” a ti tlat a.

⁶⁰ Chun, Peterin, “Mihriem, i thu hril chu ka hriet nawh,” a ta. Chun, kârlovin, a ṭawng laitak chun âr a khuong nghâl ta a.

⁶¹ Chun, Lalpa chu a ngha a, Peter chu a en a. Peter chun Lalpain, “Vawisûn hin âr a khuong hmain vawi thum mîn phat i tih,” a kuoma a ti thu kha a hung hriet dawk nâwk ta a.

⁶² Chun, a suok a, a ṭap ta ngawi ngawi a.

Isu nuiza siemnaa an hmang thu le an vuok thu

⁶³ Chun, Isu cheltuhai chun nuiza siemnân an hmang a, an vuok a.

⁶⁴ Chun, a mit an tuom a, “Hril rawh, tûin am a vuok che a?” tiin an indawn hlak a.

⁶⁵ Thu dang tamtak khawmin an hrilsietin an hal a.

Isu rorêlna hmaa a ngîr

⁶⁶ Chun, khawvar phingleh, vântlâng upahai, thiempu lalhai le Dân inchûktirtuhai chu an inrâwn khâwm a, an rorêlnaa chun an ṭhuoi a;

⁶⁷ “Krista i ni tak zet chun mi hril rawh,” an ti a. Chun, ama chun an kuomah, “Hril lang cheu khawm awi naw ti niu;

⁶⁸ indawn lang cheu khawm dawn naw ti niu.

⁶⁹ Nisienlakhawm, tuta inthawk chu Mihriem Naupa hi Pathien thilthawtheina changtieng ṭhung tâng a tih,” a ta.

⁷⁰ Chun, an rêngin, “Nang hi Pathien Naupa chu i ni am a nih?” an ta. Chun, ama chun an kuomah, “Ka nih ti in hril zing chu teh,” a ta.

⁷¹ Chun, anni chun, “Ieng hrietna dang am ngai tâng ei ta? Eini ngeiin ama bau suok ei hriet tah annâwm,” an ta.