LUKA 17 - Pathien Lekhabu Inthieng (BSI)

Suol dinga thlêmna

¹ Chun, Isûn a închûktirhai kuomah, “Tlûknahai hi um hlak sienla khawm, tlûkna inumtirtu chung chu a rik!

² Hieng mi chînhai laia pakhat khawm sukthlûk nêk chun, a sukthlutu ding rînga chun bu râwt nawina lung inhlitirin, tuisuorietah thlâk ni sienla, a ta dingin ṭha lem a tih.

³ “Fîmkhur ro, i unauin thil a suksuol chun kâwk rawh; ân sîr chun ngaidam rawh.

⁴ Ni khatah vawi sari i chungah thil suksuolin, vawi sari, ‘Kân sîr,’ tia nanga tieng a ngha nâwk chun, i ngaidam ding a nih,” a ta.

Kan ringna sukpung rawh

⁵ Chun, tîrkohai chun Lalpa kuomah, “Kan ringna sukphui deu raw khai,” an ta.

⁶ Chun, Lalpa chun, “Anṭam mu mal khat ang ringna in nei chun, hi thingtheihmi kûng kuoma hin, ‘Hung inphawi la, tuisuorietah lo inphun rawh,’ tîng in ta, in thu awi el a tih.

Suok sinthaw ding

⁷ “Nisienlakhawm, nangni laia tûkhawm hnuoi inletin amanih, berâm vêngin amanih, suok nei sienla, a lo fe hung pha, ‘Bu hung fa nghâl rawh,’ a lo ti ding am a nih?

⁸ ‘Ka fâk ding mi siempêk la, puon dierkei la, ka fâk ka dâwn khawp hmakhat chun ka rawng bâwl rawh; chu hnunga chun nangin fain, dâwn i tih,’ a lo ti lem naw ding am a nih?

⁹ In thu anga a thaw leiin in suok kuomah lâwmthu in hril hlak am a nih?

¹⁰ Chuong ang bawkin, nangni khawmin in kuomah thupêk ang po poa in thaw zo phaleh, ‘Suok ṭhahnem naw kan ni ie; kan thaw ding hrim kan thaw a nih,’ ti ro,” a ta.

Isûn inphâr sâwm a sukthieng

¹¹ Chun, Jerusalema an fe dingin, Samari le Galili ram chu a fe thleng a.

¹² Chun, khaw ienga manih a lût dingin, mi inphâr ruok sâwmin an intuokpui a; chuonghai chu hlatakah an ngîr a,

¹³ chun, râwl inringtakin, “Isu inchûktirtu, mi lunginsiet rawh,” an ta.

¹⁴ Chun, ama chun anni chu a hang hmu chun, “Thiempuhai kuomah vân entir ro,” a ta. Chun, an fe lai chun an hung inthieng tâwl ta a.

¹⁵ Chun, anni laia pakhat chun a dam tah ti ân hriet phingleh, râwl inringtaka Pathien inpâk pei pumin a kîr nâwk ta a;

¹⁶ chun, a ke bulah a bawkkhup a, a lâwmthu a hril a; chun, ama chu Samari mi a ni nghe nghe a.

¹⁷ Chuongchun, Isûn a dawn a, “Mi sâwm kha in hung inthieng tah a ni naw am a nih? Pakuohai kha khâwlai am an um a?

¹⁸ Pathien inpâk dinga kîr nâwk, hi hnam dang mi chau naw hi tukhawm hmuin an um naw a ni maw?” a ta.

¹⁹ Chun, a kuomah, “Tho la, fe rawh, i ringna hi i dampui a ni hi,” a ta.

Ram hung tlung ding chu

²⁰ Chun, Pharisaihaiin Pathien ram hung tlung ding hun an indawn leiin an kuomah, “Pathien ram chu hmu theiin a hung tlung naw ie,

²¹ ‘En ta, hitaka hi,’ amanih, ‘Sawtaka saw,’ amanih ti bawk naw ni hai; ngai ta u, Pathien ram chu nangniah a um a nih,” a ta, a dawn a.

²² Chun, inchûktirhai kuoma chun, “Mihriem Naupa dam lai nihai ni khat bêk hi in hmu nuom nihai la um a tih; nisienlakhawm, hmu ta si naw ti niu.

²³ Chun, in kuomah, ‘En ta sawtaka saw!’ ‘En ta, hitaka hi!’ tîng an ti cheu; fe suok naw unla, anni chu zui bawk naw ro,

²⁴ kâwlkawdawng khing tienga kâwl ân lep a, kâwlkawdawng khing tieng chenah a var hlak ang hin, Mihriem Naupa hi a hung ni chun a um ding a ni si a.

²⁵ Nisienlakhawm, chu hma chun thil tamtak tuor a ta, hi ruoltharhai ditnawin um bawk a tih.

²⁶ “Noa dam laia thil umzie ang khan, Mihriem Naupa a hung nâwk nihai chun um bawk a tih.

²⁷ Noa lawngah a lût a, tui a hung lêt a, an rênga a sukhlum vawng ni kha a tlung hmakhat chun, an fâkin an dâwn a, nuhmei pasal an innei hlak.

²⁸ “Chuong ang bawkin Lota dam laiin a hung um a: an fâkin an dâwn a, an inchâwkin an zawr a, an chîngin an bâwl hlak a;

²⁹ nisienlakhawm, Sodom khuoa inthawka Lota a suok ni chun vâna inthawkin mei le kâtin a sûr a, an rêngin a sukhlum vawng ta a.

³⁰ Chuong ang bawk chun Mihriem Naupa hung inlâr ni chun um a tih.

³¹ Chu ni chun tûkhawm a sum in sûnga uma, ama in chunga um chu, inchu dingin ṭum naw raw se; loa um chu hung bawk naw raw se.

³² Lota nuhmei hre zing ro.

³³ “Tûkhawm a hringna humhim- na zawng taphawt chun chân a ta, tûkhawm a hringna chân taphawt chun humhim a tih.

³⁴ “Ka hril cheu hi, chu zân chun khum pakhatah mi pahni um an ta, pakhat chu fe hmangpuiin um a ta, pakhat chu mâksanin um a tih.

³⁵ Nuhmei pahni bu râwtnawiin um an ta, pakhat chu fe hmangpuiin um a ta, pakhat chu mâksanin um a tih.

³⁶ [Mi pahni loah um an ta, pakhat chu fe hmangpuiin um a ta, pakhat chu mâksanin um a tih,”] a ta.

³⁷ Chun, anni chun a kuomah, “Lalpa, khâwlai am ie?” an ti a, an dawn a. Ama chun an kuomah, “Saruong umna taphawtah mulukawlhai khawm um khâwm an tih,” a ta.