LEVI DÂN 9 - Pathien Lekhabu Inthieng (BSI)

Aronin inthâwina ân hlânhai

¹ A ni riet ni chun Mosie chun Aron le a naupasalhai le Israel upahai chu a ko a;

² Aron kuoma chun, “Suol inthâwina dingin bâwngte a chal, le pumrawhmang thilinhlân dingin berâmchal demkailo ve ve kei la, Lalpa hmaa chun inhlân rawh.

³ Chun, Israel mipuihai kuoma chun, ‘Suol inthâwina dingin kêlchal, pumrawhmang thilinhlân dingin bâwngte le berâmte kum khat mi ve ve demkailo ṭhieu,

⁴ le bâwngchal le berâmchal Lalpa hmaa inremna thilinhlân dinga inhlân dingin hung kei unla; hrieka hmet fâkmi thilinhlân leh, vawisûn hin in kuomah Lalpa a hung inlang ding a nih,’ tiin hril rawh,” a ta.

⁵ Chun, Mosiein thu a pêk ang chun intuokna puon in tuola chun an hung kei a; chun, mi po po chun an va hnai a, Lalpa hmaa chun an va ngîr a.

⁶ Mosie chun, “Hi hi a nih, in thaw dinga Lalpain thu a pêk cheu kha; chuongchun, Lalpa ropuina chu nangni lai hung inlang a tih,” a ta.

⁷ Chun, Mosie chun Aron kuomah, “Maichâm kha hung hnai la, i suol inthâwina dâm, i pumrawhmang thilinhlân dâm inhlân la; nangma ta ding le mipuihai ta dingin intlanna siem rawh; chun, mipuihai thilinhlân chu inhlân la, intlanna siempêk rawh, Lalpain thu a pêk ta angin,” a ti a.

⁸ Chun, Aron chun maichâm chu a va hnai a, ama puola suol inthâwina bâwgte chu a that a.

⁹ Aron naupasalhai chun thisen chu a kuoma chun an inhlân a, thisena chun a kutpâr chu ân chie a, maichâm kihaia chun a nâl a; thisen chu maichâm bula chun a bunthlâk a;

¹⁰ suol inthâwina thâu dâm, a kal dâm, a thin tuomtu duorda dâm chu maichâm chunga chun a raw a, Lalpain Mosie thu a pêk ang khan.

¹¹ A sa le a vun chu riebûk puoah a raw a.

¹² Chun, pumrawhmang thilinhlân chu a that a, Aron naupasalhai chun thisen chu ama an pêk a, ama chun maichâm chu a the huol a.

¹³ Pumrawhmang thilinhlân sa tlin chu a tum tumin a lu leh an pêk a, ama chun maichâma chun a lo raw a.

¹⁴ A sûnghai le a kehai chu a sâwp a, maichâm chunga chun pumrawhmang thilinhlân leh a raw a.

¹⁵ Chun, mipuihai thilinhlân chu ân hlân a; mipuihai ta dinga suol inthâwina kêl chu a kei a, a that a, a hmaa mi ang bawk khan suol inthâwina ding chun ân hlân a.

¹⁶ Chun, pumrawhmang thilinhlân chu ân hlân a, a dân ang peiin ân hlân a nih.

¹⁷ Chun, fâkmi thilinhlân chu ân hlân a, chutaka mi chu a vei khatin a lâk a, zingkâr pumrawhmang thilinhlân ti naw khawm chu maichâma chun a râw bawk a.

¹⁸ Mipui puola inremna inthâwina thilinhlân bâwngchal le berâmchal chu a that bawk a; Aron naupasalhai chun a thisen chu an pêk a, maichâm chu a the huol a.

¹⁹ Bâwngchal thâu le berâmchal thâu dam, a mei thâu tak dâm, a rîlbâwtu dâm, a kal dâm, a thin tuomtu duorda dâm chu an pêk bawk a.

²⁰ A thâu chu a ir chunga chun an sie a; ama chun a thâu chu maichâma chun a lo raw a.

²¹ A ir le a mal changtieng ruok chu Aron chun Lalpa hmaa thêna thilinhlân dingin a thên a, Mosie thupêk angin.

²² Chun, Aron chun mipui tieng a bân a phar a, mal a sâwm tâwl a; suol inthâwina le pumrawhmang thilinhlân le inremna thilinhlân ân hlân zo chun a hung ṭum a.

²³ Chun, Mosie le Aron chu intuokna puon ina chun an va lût a; an hung suok nâwk a, mipuihai chu mal an sâwm a; chun, Lalpa ropuina chu mi po po chunga chun a hung inlang ta a.

²⁴ Lalpa hmaa inthawk chun mei a hung suok a, pumrawhmang thilinhlân le a thâuhai chu maichâma chun a kâng hmang ta a; chu chu mipui po poin an hmu chun an khêk dur dur a, an bawkkhup ta ṭhuop a.