LEVI DÂN 8 - Pathien Lekhabu Inthieng (BSI)

Aron le a naupasalhai inthienna

¹ Lalpa chun Mosie a biek a,

² “Aron chu a naupasalhai leh ṭhuoi la, silfênhai, hriek nâlmi dâm, suol inthâwina ding bâwngchal dâm, berâmchal pahni, chawl ṭhanglo bei bâwm khat le chun chawi bawk la;

³ chun, mi po po chu intuokna puon in tuollai chun inumkhâwmtir rawh,” tiin.

⁴ Mosie chun Lalpain thu a pêk ang chun a thaw a, mi po po chu intuokna puon in tuollaia chun an um khâwm a.

⁵ Mosie chun a hung khâwmhai kuoma chun, “Hi hi a nih, Lalpain thaw dinga thu a pêk chu,” a ta.

⁶ Mosie chun Aron le a naupasalhai chu a hung ṭhuoi a, ân siltir a.

⁷ Chuongchun, zakuo chung ân hâktir a, kâwng khitna chun a khit a, zakawfuol khawm chu ân hâktir a, zakawsîng ân hâktir bawk a, zakawsîng hrui thiemtaka khâwng chun a khitde a.

⁸ Chun, âwmbel chu a bel a; âwmbela chun Urim le Thummim a sie a.

⁹ Lukâwmm khawm ân kâwmtir a; lukâwm hmatieng chun rângkachak phêk suktuma um inchikna inthieng chu a bel a, Lalpain Mosie thu a pêk ang khan.

¹⁰ Chun, Mosie chun hriek nâlmi chu a lâk a, biekbûk le a sûnga thil umhai po po chu a nâl a, a sukthieng tâwl a.

¹¹ Chu hriek chun maichâm chu vawi sari a the a; maichâm le a hmangruo po pohai, maihûn le a ṭhuthai dâm, sukthiengna dingin hriek a nâl a.

¹² A sukthiengna dingin hriek nâlmi chu Aron lu chunga chun a bur a, a nâl ta a.

¹³ Chun, Mosie chun Aron naupasalhai chu a hung ṭhuoi a, zakuo ân hâktir a, kâwng khitna chun anni chu a khit a, lukhum ân khumtir a, Lalpain Mosie thu a pêk angin.

¹⁴ Chun, suol inthâwina ding bâwngchal chu a hung kei a, Aron le a naupasalhai chun, suol inthâwina ding bâwngchal lu chunga chun an kut an innghat a.

¹⁵ Mosie chun a that a; thisen chu a lâk a, intlanna siemna dingin, maichâm kihaia chun a kutpârin a vêlin a nâl a, maichâm chu ân hlân thieng a, maichâm bula chun thisen chu a bunthlâk a, a sukthieng ta a.

¹⁶ A rîlbâwtu po po dâm, a thin tuomtu duorda dâm, a kal pahni le a thâu dâm chu a lâk a, maichâma chun Mosie chun a râw ta a.

¹⁷ Bâwngchal chu a vun leh a sa leh, a êk leh riebûk puoah a raw a, Lalpain Mosie thu a pêk ang khan.

¹⁸ Pumrawhmang thilinhlân berâmchal chu a hung inhlân a, Aron le a naupasalhai chun berâmchal lu chunga chun an kut an innghat a.

¹⁹ Mosie chun a that a, maichâm chu thisen chun a the huol a.

²⁰ Berâmchal chu a chan a, a lu le a sa tlinhai le a thâuhai chu a raw a.

²¹ A sûng le a kehai chu a sâwp a; berâmchal chu maichâmah a pum chun a râw vawng ta a; chu chu riminhnik dinga pumrawhmang thilinhlân, Lalpa kuoma mei hmanga thilinhlân chu a nih, Lalpain Mosie thu a pêk ang khan.

²² Chun, berâmchal dang, hlânthiengna berâmchal chu a hang inhlân nâwk a; Aron le a naupasalhai chun berâmchal lu chunga chun an kut an innghat a.

²³ Mosie chun a that a, a thisen chu a lâk a, Aron nakâwr changtieng hmawra dâm, a kut changtieng kutpuia dâm, a ke changtieng kepuia dâm chun a nâl a.

²⁴ Chun,Mosie chun Aron naupasalhai chu a ṭhuoi a, thisen chu an nakâwr changtieng hmawra dâm, an kut changtieng kutpuia dâm, an ke changtieng kepuia dâm chun a nâl a; chun, maichâm chu thisen chun a the huol a.

²⁵ A thâu dâm, a mei thâu tak dâm, a rîlbâwtu po po dâm chu, a thin tuomtu duorda le a kal pahni le a thâu dâm leh, a mal changtieng a lâk a.

²⁶ Lalpa hmaa chawl ṭhanglo bei bâwma inthawk chun chawl ṭhanglo bei pakhat le, hrieka hmet beiphêk pakhat leh, beiphêk inphân pakhat leh a lâk a, sathâu chunga le a mal changtieng chunga chun a sie a.

²⁷ A rêng chun Aron le a naupasalhai kuta chun a sie a; Lalpa hmaa chun thêna thilinhlân dingin an thên a.

²⁸ Chun, Mosie chun an kuta inthawk chun a lâk a, pumrawhmang thilinhlân chungah maichâma chun a raw a; chu chu riminhnik dinga suktumna thilinhlân, Lalpa kuoma mei hmanga thilinhlân a nih.

²⁹ Chun, Mosie chun a ir chu a lâk a, Lalpa hmaa thêna thilinhlân dingin a thên a, chu chu suktumna berâmchala Mosie chanpuol a nih, Lalpain Mosie thu a pêk ang khan.

³⁰ Mosie chun hriek nâlmia inthawk le, maichâma thisena mi chu a lâk a, chu chun Aron le a silfênhai a the a, a naupasalhai le an silfênhai khawm; Aron le a silfênhai chu a hlân thieng a, a naupasalhai le an silfênhai khawm.

³¹ Mosie chun Aron le a naupasalhai kuoma chun, “Intuokna puon in kawtkhâr bulah sa kha suong unla, ‘Aron le a naupasalhai chun fa rawhai se,’ tia thu pêka ka um angin inhlân thiengna leikhâwra bei le chun chutaka chun fa ro.

³² Chun, sa le bei a la chuong chu meiah in râw ding a nih.

³³ In inhlân thieng nihai a kim hmakhat chun, ni sari sûng chu intuokna puon in kawtkhâra inthawk chun suok naw tawp ro, hi inhlân thiengna hin ni sari sûng a aw ding a ni si a.

³⁴ Tuta thaw ang hin intlanna siempêk ding cheuin Lalpa chun thaw ding thu a pêk a nih.

³⁵ Intuokna puon in kawtkhâr bula chun ni sari, sûn le zân um zing in ta, in thi nawna dingin Lalpa thupêk chu in zâwm ding a nih, chuong anga thu pêk chu ka nih,” a ta.

³⁶ Chuongchun, Lalpain Mosie hmanga thaw dinga thu a pêkhai po po chu Aron le a naupasalhai chun an thaw a.