LEVI DÂN 25 - Pathien Lekhabu Inthieng (BSI)

Sabbath kumhai le Jubili kum

¹ Sinai tlângah Lalpa chun Mosie a biek a,

² “Israel mipuihai hril la, an kuomah, ‘Ram ka pêk cheu in va tlung pha chun, ram chu Lalpa hmingin a châwl ding a nih.

³ I loa chun kum ruk sûng chu thil chîng i ta, grêp huon chu kum ruk sûng chu sât der i ta, a ra suokhai sîk i ta;

⁴ a kum sari kum ruok chu ram châwl dêrna, Lalpa hminga châwlna nîng a tih; i loa chun thlai i chîng ding a ni naw a, i grêp huon khawm chu i sât der ding a ni bawk nawh.

⁵ I lohmaa amaa mâwng chu i sîk ding a ni naw a, i enkawl naw grêp chu i lo ding a ni bawk nawh; ram châwl dêrna kum a ni ding a nih.

⁶ Ram châwl kum chun in fâkfâwm ding insuopêk a ti cheu a; i ta ding dâm, i siehlawpa le i siehlawnu ta ding dâm, i inhlawfa ta ding dâm, i kuoma khawsa ram dang mi ta ding dâm,

⁷ i bâwng ruol ta ding dâm, i rama ranhai ta ding dâm, chutaka a hung ra suok po po chu fâkfâwm ding nîng a tih.

Zalênna kum chu

⁸ “Chun, châwl kum kum sari tiem i ta, kum sari hmun sari nîng a ta, châwl kum kum sari sûng chu kum sâwmli pakuo nîng a ta.

⁹ Chu hnung thla sarina ni sâwm ni chun tawtawrâwt inringtak chu inmût vêltir i ta; intlanna nia chun in ram po poah tawtawrâwt in inmût vêltir ding a nih.

¹⁰ Chu kum sâwmngana chu inser thieng i ta, ram sûnga um po pohai kuomah zalênna thu in puong ding a nih; in ta dingin jubili nîng a ta; mi tinin mâni ta ngai nei nâwk in ta; mi tin chu mâni insûng khur sengah in um nâwk ding a nih.

¹¹ Chu kum sâwmngana chu in ta dingin jubili nîng a ta; iengkhawm chîng naw ti niu a, amaa mâwng khawm sîk bawk naw ti niu a, grêp enkawl naw ra chu in lo ding a ni bawk nawh.

¹² Jubili a ni si a; in ta dingin kum inthieng a ni ding a nih; in lova thil ra suok chu in fâk ding a nih.

¹³ Hi jubili kum hin mi tinin mâni ta ngei in chang nâwk seng ding a nih.

¹⁴ I tuolbâwm kuomah ieng amanih i zawr a, i tuolbâwma inthawkin ieng amanih în châwk khawma i hlêm ding a ni nawh;

¹⁵ jubili hnunga kum zât ang peiin i tuolbâwm thil chu inchâwng i ta, bu le bâl tam kum izirin i kuomah a zawr ding a nih.

¹⁶ A kum tam dân zir peiin a man chu sukpung i ta, a kum tlâwm dân zir peiin a man chu i suktlâwm ding a nih; lohma suok pung kum zirin i kuoma chun zawr a ni ding a nih.

¹⁷ In inhlêm ding a ni naw a, in Pathien chu in ṭi ding a nih: kei hi Lalpa in Pathien chu ka ni si a.

Kum sari kum ṭhatna

¹⁸ “Chuleiin, ka thuruothai chu in zâwmin, ka rorêlhai chu in pawmin in ṭi ding a nih; chuongchun, chu rama chun thlamuongtakin in khawsa ding a nih.

¹⁹ Ram chun ra insuong a ta, tlaitakin chên in ta, thlamuongtakin in va khawsa ding a nih.

²⁰ ‘Iengkhawm kan chîng naw a, thlai ra iengkhawm kan sîk naw bawk ding chun, kum sarina kum chun ieng am fâng kan ta?’ in ti a ni thei a;

²¹ a kum ruk kum chun ka malsâwmna in chungah intlungtir ka ta, kum thum sûnga ding chun ra insuong a tih.

²² Chun, a kum riet kum chun chîng in ta, thil ra suok in kawl, a hluihai chu fâng in ta, kum kuo kum chun, a hung thar nâwk chen chun, a hlui in kawlhai chu in fâk ding a nih.

Thil pêkkîr nâwk dân

²³ “Kumkhuoa dingin ram chu zawr sawng ding a ni nawh, ram chu ka ta a ni si a; ka kuoma khawsa mikhuol le khuolchâm el in ni si a.

²⁴ Chun, ram in hluo po poa chun, ram intlan in phal ding a nih.

²⁵ “I unau chu hung pasein, a ram ṭhenkhat lo zawr sienla, a laibung bul takin a unauin a lo zawr chu a hung intlan ding a nih.

²⁶ Chun, mîn intlanpêktu ding a nei naw a, ama a hung khawsa thei a, intlanna ding khawp a hung nei chun,

²⁷ a lo zawr china kum chu sut sienla, a zawrnapa kuoma chun a intêl chuong chu pe kîr raw se; chuongchun, a ram chu ama ma chun hluo nâwk a tih.

²⁸ A ta dinga ân tlan kîr nâwk thei naw chun, a zawr ta chu jubili kum chenin ân chawtu kuta chun um raw se; chun, jubili kum chun suok nâwk a ta, ama chun a ram chu hluo nâwk a tih.

²⁹ “Kul nei khuoah mîn in a zawr chun, a zawra inthawka kum khat pumhlûm sûng intlan nâwk thei a tih; kum khat pumhlûm sûng chun intlan nâwk theina nei a tih.

³⁰ Kum khat sûnga ân tlan nâwk thei naw chun, kul nei sûnga khuoa in chu, ân chawtu nei sawng dinga siem nîng a ta, a thlahai chena an ta ni tâng a ta, jubilia khawm suok chuong naw nih.

³¹ Kul nei naw khuoa inhai ruok chu, thingtlâng ram anga ngai nîng a ta, intlan nîng a ta, jubili chun insuo nîng an tih.

³² Amiruokchu, Levi mihai khuo, an chanpuola khuoa inhai chu Levi mihai chun ieng lai khawma intlan thei an tih.

³³ Chun, Levi mihai laia mîn ân tlan naw chun zawr tah in le, a chanpuol khuo chu jubilia chun suok a tih; Levi mihai khuoa inhai chu Israel mipuihai laia an chanpuol a ni si a.

³⁴ An khaw kâwl vêla lohai ruok chu zawr thei ni naw nih, an kumkhaw chanpuol a ni si a.

Mi rimsihai kuoma thil inpûktir

³⁵ “Chun, i unau a hung pasie a, a hung bêl che chun i lo sawmdâwl ding a nih; mikhuol le khuolchâm i kuoma khawsa angin i umpui ding a nih.

³⁶ A kuomah tangka amanih, thil amanih, a pung la naw rawh; Pathien ṭi lem rawh; i unau chu i kuoma a khawsak theina dingin.

³⁷ A pung hnawtin i sum în pûktir ding a ni naw a, a pung hnawtin i fâk ding lai hai khawm inpûktir naw rawh.

³⁸ Kei hi Lalpa in Pathien, Kanaan ram pe ding cheu le, in Pathien ni dinga Aigupta rama inthawka ṭhuoi suoktu cheu ka nih.

Suokhai insuo dân

³⁹ “I unau a hung pasie a, i kuoma a hung tlulût chun, suok angin i sawr ding a ni naw a;

⁴⁰ inhlawfa ang le i kuoma khawsa ve angin i umpui ding a nih; Jubili kum chen i rawng bâwl a ta;

⁴¹ chu zo chun i kuoma inthawkin suok a ta, ama le a nauhai leh; chun, anni sûngkuo pângngaia chun lût nâwk an ta, an pi le puhai in le lo an hluo nâwk ding a nih.

⁴² Aigupta rama inthawka ka ṭhuoi suok, ka siehlawhai an ni si a, suok zawra zawr ding an ni nawh.

⁴³ Rilotakin a chungah i um ding a ni naw a, i Pathien chu i ṭi ding a ni lem.

⁴⁴ Suoknu le suokpaa i nei ding chu: in vêla hnam laia mi, suoknu le suokpa ding chun în châwk ding a nih.

⁴⁵ Chun, nangni laia khawsa ram dang mihai le, in rama pieng an sûnghai laia mi khawm inchaw thei bawk in tih; anni chu in thilnei hung nîng an tih.

⁴⁶ Chun, nangni hnunga in nauhai ro hluo sâwng thilah siem in ta; chuonghai chu in kumkhaw suok dingin siem thei in ta; amiruokchu, in unau Israel mihai laia ruok chun rilotakin in um ding a ni nawh.

⁴⁷ “Ram dang mi amanih, i kuoma khawsa tu amanih a hung hausa a, a kuoma i unaupa a hung pasie a, i kuoma ram dang mi kuoma manih, i kuoma khawsa kuoma manih, ram dang mi thlahai kuoma manih a tlu lût chun,

⁴⁸ a tlûk lût hnung khawma intlan thei nîng a ta, a unauhai laia mîn intlan thei a tih.

⁴⁹ A pamiin amanih, a pami naupân amanih intlan thei a tih; a chihai laia a laibung hnaiin amani khawm intlan thei a tih; chun, ama khawm a hung hausa chun ama le ama chu intlan thei a tih.

⁵⁰ A tlûk lûtnapa leh a tlûk lûta inthawka jubili kum nâwk ding sût hmunkhat hai sienla, a tlûk lût man chu a kum zir nîng a ta; chun, inhlawfa a ruoi sûtpêk ang peia sûtpêk nîng a tih.

⁵¹ Kum tamtak a la bâk chun, a la bâk zât hu chu sûtin, ama inchâwkna mana inthawkin let kîr nîng a ta.

⁵² Jubili kum tlungna ding kum tlâwmte chau um a ni chun, sût hmunkhat hai sienla, a sinthaw ding la bâk kum izirin, ân tlanna dingin tangka chu a pêk kîr ding a nih.

⁵³ Kum khat bi peia ruoi inhlawfa angin a bêl ding a na; i mithmua chun rilotakin a thaw ding a ni nawh.

⁵⁴ Chuong ang zâwnga intlan a ni naw khawma, jubili kum chun suok a ta, ama le a nauhai leh.

⁵⁵ Israel mipuihai chu keima siehlawhai an ni si a, Aigupta rama inthawka ka ṭhuoi suok, ka siehlawhai an nih: Kei hi Lalpa in Pathien chu ka nih.