LEVI DÂN 24 - Pathien Lekhabu Inthieng (BSI)

Khâwnvar enkawl dân

¹ Lalpa chun Mosie a biek a,

² “Israel mipuihai chu oliv hriek inthiengtak, sit dinga sâwr, khâwnvar sukchawk zingna dinga i kuoma hung la dingin thu pe rawh.

³ Intuokna puon ina thuinhriettirna puonzâr puotienga chun, zântienga inthawka zîngkâr chena dingin, Lalpa hmaah Aron chun sie fel raw se; hi hi in thlahai chena kumkhaw dân ding a nih.

⁴ Lalpa hmaah khâwnvar siena inthiengtak chunga chun khâwnvarhai chu sie fel hlak raw se.

Inentirna bei chu

⁵ “Chun, beiphit indi mi la la, chu chu bei sâwmpahnia siemin ur la, bei pakhat chu epha hmun sâwma ṭhea hmun hni peia siem ding a nih.

⁶ Lalpa hmaa dawkân inthieng chunga chun tlar hniin, tlar khata paruk ve vein în tlar ding a nih.

⁷ A tlar hnia chun beraw hlîr hlak i sie ve ve ding a nih, chu chu bei le chun hrietzingna, Lalpa kuoma mei hmanga thilinhlân ang a hung ni theina dingin.

⁸ Châwlni taphawtah Lalpa hmaah Aron chun a sie fel hlak ding a nih, kumkhaw thuthlungna, Israel mipuihai ta ding a nih.

⁹ Chun, Aron le a naupasalhai chanpuol nîng a ta, hmun inthiengah an fâk ding a nih; kumkhaw dâna Lalpa kuoma mei hmanga thilinhlânhai laia mi, a chanpuol inthieng tak a ni si a,” tiin.

Pathien hrilsietna hremna dân

¹⁰ Israel nuhmei naupa, a pa chu Aigupta mi, pakhat chu Israel mipuihai lai a va fe a; chu Israel nuhmei naupa le Israel mi pakhat riebûka chun an insuol a;

¹¹ Israel nuhmei naupa chun ṭawngsie inphurin Pathien hming a hrilsiet a; chuongchun, ama chu Mosie kuomah an hung ṭhuoi a. A nu hming chu Selomith a na. Dan chi Dibri naunu a nih.

¹² Lalpa baua thu suok nghâkna dingin intângna inah an khum a.

¹³ Chun, Lalpa chun Mosie a biek a,

¹⁴ “Ṭawngsiea inkhâmtu chu riebûk puoah ṭhuoi unla, a hretuhai po po chun a luah an kut innghat hai sienla, mi po po chun lungin dêng raw hai se.

¹⁵ Chun, Israel mipuihai chu hril la, an kuomah, ‘Tukhawm a Pathien ṭawngsie inphur taphawt chun a suol maw chu phur a tih.

¹⁶ Chun, Lalpa hming hrilsetu taphawt chu sukhlum ngei ding a nih; mi po poin lungin dêng an ta; Lalpa hming an hrilsiet chun ram dang mi khawm, a ram mi khawm sukhlum ding an nih.

¹⁷ Tuolthattu chu sukhlum ngei ding a nih.

¹⁸ Ran thattu taphawt chun a thung ding a nih, hringna aiah hringna.

¹⁹ Mîn a tuolbâwm a sukhmêlhem chun, a thaw angtak chun a chungah thaw ve ding a nih; ru tliek aiah ru tliek, mit aiah mit, ha aiah ha;

²⁰ mi a sukhmêlhem angin ama chunga khawm thaw ve ding a nih.

²¹ Ran sukhlumtu chun a thung ding a nih; mi sukhlumtu chu sukhlum ve ding a nih.

²² Ram dang mihai le a ram mihai ta dingin dân hmunkhat in nei ding a nih; kei hi Lalpa in Pathien chu ka ni si a,’ ti rawh,” tiin.

²³ Chuongchun, Mosie chun Israel mipuihai chu a biek a; ṭawngsiea inkhâmtu chu riebûk puoah an ṭhuoi suok a, lungin an dêng a. Israel mipuihai chun Lalpain Mosie thu a pêk ang chun an thaw ta a.