LEVI DÂN 23 - Pathien Lekhabu Inthieng (BSI)

Ruoiṭhe hunbihai

¹ Lalpa chun Mosie a biek a,

² “Israel mipuihai chu be la, an kuomah, ‘Lalpa ruoiṭhe hunbi, inkhâwmpui inthienga in siem ding ka ruoiṭhe hunbi chu hienghai hi an nih.

³ Ni ruk sûng sin thaw ding a na, ni sari ni ruok chu ursûntaka inser châwlna, inkhâwmpui inthieng a nih; ieng sin khawm in thaw ding a ni naw a, in chêngna taphawta chun Lalpa ta dinga châwlni a nih.

⁴ Lalpa ruoiṭhe hunbi, inkhâwmpui inthieng, a hun tak peia in siem dinghai chu hieng hi an nih.

⁵ Thla khatna ni sâwmpali ni, zântieng chu Lalpa fekân ruoiṭhe a nih.

⁶ Chu thla ma, ni sâwmpanga ni chu, Lalpa kuoma Chawlṭhanglo bei ruoiṭhe a na, ni sari sûng chu chawl ṭhanglo bei in fâk ding a nih.

⁷ A ni khat ni chun inkhâwmpui inthieng nei in ta, sin hrim hrim in thaw ding a ni nawh.

⁸ Ni sari sûng mei hmanga thilinhlân Lalpa kuomah in inhlân ding a nih: a ni sari ni chu inkhâwmpui inthieng a na, sin hrim in thaw ding a ni nawh,’ ti rawh,” tiin.

⁹ Lalpa chun Mosie a biek a,

¹⁰ “Israel mipuihai chu hril la an kuomah, ‘Ram ka pêk cheu chu in va tlung a, chutaka chun bu dâm in sîk pha chun, in ra hmasaa mi buphal pakhat chu thiempu kuomah in hung chawi ding a nih.

¹¹ Chun, pawmpêk thei cheu a nina dingin, ama chun buphal chu Lalpa hmaa chun thên a tih; châwlni zînga chun thiempu chun a thên ding a nih.

¹² Buphal in thên ni chun berâmte a chal demkailo kum khat mi, pumrawhmang thilinhlân dingin Lalpa kuomah in inhlân ding a nih.

¹³ Chutaka fâkmi thilinhlân chu beiphit inditak epha hmun sâwma ṭhea hmun hni hrieka hmet Lalpa ta dinga rim inhniktak, mei hmanga thilinhlân a ni ding a nih; chun, chutaka dâwnmi thilinhlân chu uoin hin hmun lia ṭhea hmun khat a ni ding a nih.

¹⁴ In Pathien ta dinga thilinhlân chu in inhlân hmakhat, chu ni tlung hmakhat chun, bei amanih, bu zêu amanih, a vui tharlâm amani khawm in fâk ding a ni nawh; hi hi in chêngna taphawtah in thlahai chena kumkhaw dân ding a nih.

Pâwl tlâk ruoiṭhe

¹⁵ “Châwlni zîng, a thêna thên thilinhlân buphal in hung chawi ni a inthawkin tiem in ta, châwlni vawi sari tiem tling in ta;

¹⁶ châwlni vawi sarina zîng chen chun ni sâwmnga tiem in ta; Lalpa kuomah bu thar fâkmi thilinhlân chu in inhlân ding a nih.

¹⁷ In umna hmunhaia inthawkin epha hmun sâwma ṭhea hmun hnia siem, bei tlang thên ding pahni, beiphit indi mi, chawl ṭhanga ur, Lalpa ta dinga siem hmasak tak, inhlân ding in hung chawi ding a nih.

¹⁸ Bei inhlân ruol chun berâmte pasari, demkailo kum khat mi ṭhieu le, bâwng tuoi pakhat le berâmchal pahni khawm in inhlân ding a nih; chuonghai chu, an fâkmi thilinhlân le an dâwnmi thilinhlânhai le chun, Lalpa ta dinga pumrawhmang thilinhlân, Lalpa ta dinga rim inhniktak, mei hmanga thil inhlân nîng a tih.

¹⁹ Chun, suol inthâwina dingin kêl chal pakhat le, inremna thilinhlân inthâwina dingin berâmte a chal pahni kum khat mi in inhlân ding a nih.

²⁰ Thiempu chun siem hmasak tak bei chu berâmte pahni le chun, Lalpa hmaa thêna thilinhlân dingin thên a ta; chuonghai chu Lalpa ta dinga inthieng thiempu chanpuol nîng a tih.

²¹ Chu ni chun thu puong in ta; inkhâwmpui inthieng nei in ta; sin hrim in thaw ding a ni naw a; hi hi in chêngna taphawtah in thlahai chena dingin kumkhaw dân nîng a tih.

²² “In loa bu in sîk pha chun, in hnâwmkâwl rawt chen in sîk ding a ni naw a, bu hnung khawm in zawng ding a ni nawh; mi rimsi le ram dang mihai in hlapêk ding a nih: Kei hi Lalpa in Pathien chu ka nih,’ ti rawh,” tiin.

Kum thar ruoiṭhe

²³ Lalpa chun Mosie a biek a,

²⁴ “Israel mipuihai chu hril la, an kuomah, ‘Thla sarina, chu thla ni khat ni chu in ta dingin ursûntaka insera châwlna, tawtawrâwt mûta hrietzingna, inkhâwmpui inthieng nîng a tih.

²⁵ Sin hrim hrim in thaw ding a ni naw a; Lalpa kuoma mei hmanga thilinhlân in inhlân ding a nih,’ ti rawh,” tiin.

Tlanna Ni

²⁶ Lalpa chun Mosie a biek a,

²⁷ “Thla sarina ni sâwm ni ruok hi chu intlanna ni a na; in ta dingin inkhâwmpui inthieng nîng a ta, insukrinum in ta: Lalpa kuoma mei hmanga thilinhlân in inhlân ding a nih.

²⁸ Chu ni chun ieng sin khawm in thaw ding a ni nawh: Lalpa in Pathien hmaa intlanna siemna dinga intlanna ni a ni si a.

²⁹ Tukhawm chu nia insukrinum lo chu a chipuihaia inthawkin tuithlârin um a tih.

³⁰ Tukhawm chu nia sin iengkhawm thaw taphawt chu, chu mi chu a chipuihaia inthawkin sukbohmang ka tih.

³¹ Ieng sin khawm in thaw ding a ni nawh; hi hi in chêngna taphawtah in thlahai chena kumkhaw dân ding a nih.

³² In ta dinga châwlni ursûntaka inser châwlna nîng a ta, in insukrinum ding a nih; chu thla ni kuo ni zântieng, chu zântienga inthawka zântieng nâwk chenin châwlniah in hmang ding a nih,” tiin.

Bâwkte ruoiṭhe chu

³³ Lalpa chun Mosie a biek a,

³⁴ “Israel mipuihai chu hril la, an kuomah, ‘Thla sarina ni sâwmpanga ni le ni sari sûng chu Lalpa ta dingin bâwkte ruoiṭhena a nih.

³⁵ A ni khatna chu inkhâwmpui inthieng nîng a ta, sin hrim hrim in thaw ding a ni nawh.

³⁶ Ni sari sûng chun, mei hmanga thilinhlân Lalpa kuomah inhlân in ta, a ni riet ni chu in ta dingin inkhâwmpui inthieng nîng a ta; mei hmanga thilinhlân Lalpa kuomah in inhlân ding a nih; inkhâwmpui ursûn a na; sin hrim hrim in thaw ding a ni nawh.

³⁷ Hienghai hi an nih Lalpa ruoiṭhe hunbi, Lalpa kuoma mei hmanga thilinhlân dâm, pumrawhmang thilinhlân dâm, fâkmi thilinhlân dâm, inthâwinahai dâm, dâwnmi thilinhlân dâm, an ni bîk senga inhlânna dinga inkhâwmpuina inthienga in inser dinghai chu:

³⁸ Lalpa châwlnihai, in thilpêkhai, in thutiemhai po po le nuomthua in thilinhlânhai po po bâkah; chuong chu Lalpa kuoma in pêk hlak hrim an nih.

³⁹ Thla sarina ni sâwmpanga nia, in lo ra suok in lâk khawm huna chun, Lalpa ruoiṭhe chu ni sari inawtir in ta; a ni khat ni chu châwl ṭawk ṭawk ni nîng a ta, a ni riet ni khawm chu châwl ṭawk ṭawk ni ni bawk a tih.

⁴⁰ A ni khat ni chun thing kûng mawi tak tak rahai, intûm kâuhai, thing inbuktak zârhai, vadunga phahrâm kâuhai chawi in ta, Lalpa in Pathien hmaa chun ni sari sûng in insukhlim ding a nih.

⁴¹ Hi hi Lalpa kuoma ruoiṭhe angin kum khatah ni sari sûng in hmang ding a nih; in thlahai chena kumkhaw dân ding a nih; thla sarinaah in nei hlak ding a nih.

⁴² Bâwkteah ni sari sûng um in ta, Israel ram mi po po chu bâwkteah in um ding a nih;

⁴³ chuongchun, in thlahai chun, Israel thlahai chu Aigupta rama inthawka ka ṭhuoi suok lai khan bâwkteah kân umtir ti hre thei an tih: Kei hi Lalpa in Pathien chu ka nih,’ ti rawh,” tiin.

⁴⁴ Chuongchun, Mosie chun Lalpa ruoiṭhe hunbi siemhai chu Israel thlahai lai chun a puong ta a.