LEVI DÂN 22 - Pathien Lekhabu Inthieng (BSI)

Inthâwina thilinhlânhai inthiengna

¹ Lalpa chun Mosie a biek a,

² “Aron le a naupasalhai kuomah hril la, Israel mipuihaiin thil inthieng ka kuoma an inhlân laiin insiekieng raw hai se, ka hming sukse rawi an tih. Kei hi Lalpa ka nih.

³ An kuomah, ‘In suonhai chena in thlahai po po lai tukhawm inthiengnaw puma Israel mipuihaiin Lalpa kuoma an inhlân thil inthieng hung hnai taphawt chu keimaa inthawka tuithlârin a um ding a nih. Kei hi Lalpa chu ka nih.

⁴ Aron thla tukhawm inphârna amanih, thipût amani chun ân thieng hmakhat chun, thil inthienghai laia mi chu a tâwk taphawt le,

⁵ tukhawm ama sukpawrche thei, bawkinvâk chi hrim hrim amanih, pawrchena kai thei tâwk taphawt chu,

⁶ chuong ang tâwktu chu zântieng chen chun inthieng naw nîng a ta; chun, ân sil naw chun thil inthienghai laia mi chu a fâk ding a ni nawh.

⁷ Nisa a tlâk hnung ruok chun inthieng tâng a ta, chu hnung chun thil inthienghai laia mi khawm chu fa thei tâng a tih; a fâk ding a ni leiin.

⁸ Insukpawrche dingin mânia thi amanih, sa se amanih a fâk ding a ni nawh. Kei hi Lalpa chu ka nih,’ tiin hril rawh.

⁹ Chuleiin, ka thupêk chu an pawm ding a nih, chuong naw chun suol maw chu phurin, anni insukpawrchein thi pal rawi an tih: Kei hi Lalpa anni sukthiengtu chu ka nih.

¹⁰ “Ram dang mîn thil inthieng chu a fâk ding a ni nawh; thiempu kuoma khawsa amanih, inhlawfa amani chun thil inthieng chu a fâk ding a ni nawh.

¹¹ Thiempuin ama suma ân châwk ruok chun fa thei a tih; chun, a ina pienghai chun a fâk ding chu fa thei an tih.

¹² Thiempu naunuin ram dang mi a nei chun, thêna thilinhlân, thil inthienghai laia mi chu a fâk ding a ni nawh.

¹³ Amiruokchu, thiempu naunu chu nau bovin hmeithaiin amanih, mâkin amanih a hung um a, a pa in tieng a kir nâwk chun, a nunghâk lai ang bawk khan a pa fâk ding chu fa vêng a tih; nisienlakhawm, ram dang mi chun an fâk ding a ni nawh.

¹⁴ Mîn hre lova thil inthieng chu a fâk chun, a hmun ngaa ṭhea hmun khat chu sie sâng a ta, thil inthieng chu thiempu a pêk ding a nih.

¹⁵ Israel mipuihai thil inthieng, Lalpa kuoma an inhlân chu, thiempuhai chun an sukpawrche ding a ni naw a,

¹⁶ chuong ang chun, an thil inthienghai fapêkin rîtlona le bawsietna maw an inphurtir ding a ni nawh; Kei hi Lalpa anni sukthiengtu chu ka ni si a,’ ti rawh,” tiin.

¹⁷ Lalpa chun Mosie a biek a,

¹⁸ “Aron le a naupasalhai le Israel mipui po po be la, an kuomah, ‘Israel sûngkuo laia mi amanih, Israelhai laia um ram dang mi amanih, tukhawma thilinhlân thutiemna khawm, nuomthua thilinhlân khawm, Lalpa kuoma pumrawhmang thilinhlâna a hung inhlân pha,

¹⁹ pawm tlâk dingin bâwng amanih, berâm amanih, kêl amanih demkailo a chal in inhlân ding a nih.

²⁰ Demkai hrim hrim chu in inhlân ding a ni nawh; pawmpêk tlâk cheu a ni âwm si naw a.

²¹ Tukhawmin thutiem sukpuitling dingin amanih, mâni nuomthua thilinhlâna dingin amanih, Lalpa kuoma inremna thilinhlâna dinga, ran ruol laia amanih, berâm ruol laia mi amanih ân hlân chun, pawm tlâk a ni theina dingin demkai dêrlo a ni ding a nih; demkaina hrim a um ding a ni nawh.

²² A mitdel dâm, a ru tliek dâm, a silawng dâm, inpânna nei dâm, pang inthakna nei dâm, pang inhlip dâm chu Lalpa kuomah in inhlân ding a ni naw a, Lalpa kuoma mei hmanga thilinhlâna dingin buotsai ding a ni nawh.

²³ Mâni nuomthua thilinhlâna ding chun, bâwngchal khawm, berâmte khawm, kut le ke sei taluo amanih, tawi taluo amani khawm inhlân thei in tih; thutiemnaa ding ruok chun pawm ni naw nih.

²⁴ A tilmu sukduk amanih, sukpêr amanih, sukkawi amanih, lâk amani chu Lalpa kuomah in inhlân ding a ni naw a; in rama hin chuong ang chu inthâwina dingin in hmang ding a ni bawk nawh.

²⁵ Ram dang mihai kuoma inthawka lain chuong ang laia mi hrim hrim chu in Pathien fâk ding thilinhlânah in inhlân ding a ni nawh, chuonga chun sietna le demkaina a um lei chun, pawmpêk thei cheu ni naw ni,’ ti rawh,” tiin.

²⁶ Lalpa chun Mosie a biek a,

²⁷ “Bâwngchal amanih, berâm amanih, kêl amanih a hung piengin, a pui kuomah ni sari a um ding a nih; ni riet nia inthawka hnung tieng chun Lalpa kuoma mei hmanga thilinhlânah pawm thei nîng a tih.

²⁸ Bâwngpui amanih, berâmpui amanih, a tê leh ni khat sûng in that ding a ni nawh.

²⁹ Lâwmthu hrilna inthâwia Lalpa kuoma in inthâwi pha, pawm tlâk in ni theina dingin in inthâwi ding a nih.

³⁰ Chu ni chun fâk zo ding a na, a zînga chena dingin iengkhawm in khêk ding a ni nawh: Kei hi Lalpa chu ka nih.

³¹ “Chuleiin, ka thupêkhai hi in pawmin in zâwm ding a nih: Kei hi Lalpa chu ka nih.

³² Chun, ka hming inthieng hi in suksiet ding a ni naw a, Israel mipuihai laia chun chawimawiin ka um ding a nih;

³³ Kei hi nangni sukthiengtu in Pathien ni dinga Aigupta rama inthawka ṭhuoi suoktu cheu ka nih: Kei hi Lalpa chu ka nih,” tiin.